ބޭރު މީހުން ދިގު މުއްދަތަކަށް ދިރިއުޅޭ ސަރަހައްދުތައް އުފެދޭ ގޮތަށް ރަސްމާލެ މަޝްރޫއު ކުރިއަށް ނުގެންދިއުމަށް އަދާލަތު ޕާޓީން ސަރުކާރަށް ގޮވާލައިފި
11 ނޮވެމްބަރު 2026 | ބުދަ 05:22ބޭރު މީހުންނަށް ދިގު މުއްދަތަށް ދިރިއުޅެވޭނެ ސަރަހައްދުތައް އުފެއްދުމަކީ ދީނީ އެއްބައިވަންތަކަމާއި ގައުމީ ސަލާމަތަށް ނުރައްކާވެދާނެ ކަމެއް ކަމަށް އަދާލަތު ޕާޓީން ވަނީ ބުނެފައި. އެހެންކަމުން ރިއަލް އެސްޓޭޓް މަޝްރޫއުތައް ހިންގުމުގައި ދާއިމީކޮށް ވަޒަންވެރިވުމުގެ ބަދަލުގައި، އިސްލާމީ އުސޫލުތަކާ އެއްގޮތަށް ޗުއްޓީ ހޭދަކުރާނެ ވަސީލަތްތައް ތަރައްގީކުރުމަށް އެ ޕާޓީން އިލްތިމާސްކުރޭ
ދިވެހި ސަރުކާރުން ކުރިއަށްގެންދާ ރަސްމާލެ ރިޔަލްއެސްޓޭޓް ޑިވެލޮޕްމަންޓް ޒޯން މަޝްރޫއާ ގުޅިގެން އަދާލަތު ޕާޓީގެ ފަރާތުން ސާފުކުރަން ބޭނުންވާ މުހިންމު ކަންކަން އޮޅުންފިލުވުމަށްޓަކައި، އެ ޕާޓީގެ ރައީސް އައްޝައިޚް މުހައްމަދު ޝިފާންގެ އިތުރުން އިސް ލީޑަރޝިޕުން މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމެންޓް ޑރ. އަބްދުالله މުއްތަލިބާ ބައްދަލުކުރެއްވުން - 1 އޮކްޓޫބަރު 2026 | އަދާލަތު ޕާޓީ
ދިވެހިރާއްޖޭގައި ބޭރުގެ ފަރާތްތަކަށް ދިގު މުއްދަތަކަށް ދިރިއުޅެވޭނެ ވަކި ޚާއްސަ ސަރަހައްދުތަކެއް އުފެދޭ ގޮތަށް އެއްވެސް މަޝްރޫއެއް ކުރިއަށް ނުގެންދިއުމަށް ސަރުކާރަށް އަދާލަތު ޕާޓީން އިލްތިމާސްކޮށްފި އެވެ.
އަދާލަތު ޕާޓީން އަންގާރަ ދުވަހު ނެރުނު ބަޔާނެއްގައި ފާހަގަކޮށްފައިވާ ގޮތުގައި، މިފަދަ ގޮތަކަށް ބޭރު މީހުން ދިގު މުއްދަތަކަށް ވަޒަންވެރިވެ ދިރިއުޅޭނެ ސަރަހައްދުތަކެއް ރާއްޖޭގައި އުފެދިގެން ދިއުމަކީ ރާއްޖޭގެ ދީނީ އެއްބައިވަންތަކަމަށާއި، އާންމު މަސްލަހަތުގެ އިތުރުން ދިވެހި ޘަގާފަތާއި ޤައުމީ ސަލާމަތާއި ރައްކާތެރިކަމަށް ބޮޑެތި ގޮންޖެހުންތަކެއް ކުރިމަތިވެދާނެ ކަމެކެވެ. އެހެންކަމުން، މިފަދަ ނުރައްކާތަކަށް ރިއާޔަތްކޮށް، އެފަދަ މަޝްރޫއުތައް އެގޮތަށް ކުރިއަށް ނުގެންދިއުމަށް އެ ޕާޓީން ވަނީ ރައީސް ޑރ. މުހައްމަދު މުއިއްޒުގެ ސަރުކާރަށް ގޮވާލާފަ އެވެ.
އެ ޕާޓީގެ ބަޔާނުގައި އިތުރަށް ބުނެފައިވަނީ، ރާއްޖޭގައި އިންޓަރނޭޝަނަލް ރިއަލް އެސްޓޭޓް މަޝްރޫއުތައް ކުރިއަށްގެންދާ ނަމަ، އެ މަޝްރޫއުތައް އަމާޒުކުރަންވާނީ ބޭރު މީހުން ދާއިމީކޮށް ނުވަތަ ދިގު މުއްދަތަކަށް ދިރިއުޅޭ ސަރަހައްދުތަކެއް ބިނާކުރުމުގެ ބަދަލުގައި، އެ ފަރާތްތަކުން ޗުއްޓީ ހޭދަކުރުމަށް ބޭނުންކުރާ ހޮލިޑޭ ހޯމްސް ފަދަ ވަސީލަތްތައް ތަރައްޤީކުރުމަށް ކަމަށެވެ.
މީގެ އިތުރުން އިސްލާމީ އުސޫލުތަކާ އެއްގޮތްވާ ގޮތުގެ މަތިން އިންޓަރނޭޝަނަލް ރިއަލް އެސްޓޭޓް އަދި ހޮލިޑޭ ހޯމްސް ފަދަ މަޝްރޫއުތައް ރާއްޖޭގައި ތަރައްޤީކޮށް ހިންގުމަކީ، ރާއްޖޭގެ އިގުތިސާދު ސިންދަފާތުކޮށް، ފުރިހަމަ ވިލުންތެރި އިގުތިސާދެއް ބިނާކުރުމަށް މަގުފަހިވެގެންދާނެ ކަމެއް ކަމަށްވެސް އަދާލަތު ޕާޓީން ވަނީ ފާހަގަކޮށްފަ އެވެ.
