އިދިކޮޅު އެމްޑީޕީން ހުކުރު ދުވަހުގެ ރޭ ބާއްވާ "ލޫޓުވައިފި، ލޫޓުވައިފި" މުޒާހަރާއަށް ކުޑަތަން ވެފައި ވަނިކޮށް، ވިޔަފާރިވެރިންނަށް ދޭންޖެހޭ ފައިސާ ދޫކުރުމަށް ރައީސް މުހައްމަދު މުއިއްޒު އެއްބަސްވެ އެކަން އިއުލާނު ކުރައްވާފައެވެ.

އެކްސް ކުރެއްވި ޕޯސްޓެއްގައި ރައީސް މުއިއްޒު ވިދާޅުވެފައިވަނީ، ސަރުކާރާއި ސަރުކާރު ހިއްސާވާ ކުންފުނިތަކުން ވިޔަފާރިތަކަށް ދޭންޖެހޭ އެންމެހައި ފައިސާ ކުރިއަށް އޮތް ފަސް ހަފުތާގެ ތެރޭގައި ދައްކާ ނިންމަވާނެ ކަމަށެވެ. މިއީ މިކަމާ ގުޅިގެން މިއަހަރު ތެރޭގައި ރައީސް މުއިއްޒު ދެއްވާފައިވާ ތިންވަނަ ވައުދުފުޅެވެ.

ކުރިން ވެސް މި ފައިސާ ދޫކުރެއްވުމަށް ރައީސް މުއިއްޒު ވަނީ ދެ ފަހަރެއްގެ މަތިން ސުންގަޑި ކަނޑައަޅުއްވާފައެވެ. އޭގެ ތެރޭގައި ނޮވެމްބަރު 2024 ގެ ކުރިން އަދި ރަމަޟާން މަހުގެ ކުރިން ފައިސާ ދޫކުރައްވާނެ ކަމަށް ވިދާޅުވެފައިވާއިރު، މި ވައުދުތައް އަދި މިހާތަނަށް ފުއްދަވާފައި ނުވެއެވެ.

އެމްޑީޕީގެ މުޒާހަރާއާ ދިމާކޮށް ސަރުކާރުން ވަނީ އިތުރު ފިޔަވަޅުތަކެއް ވެސް އަޅުއްވާފައެވެ. މީގެ ތެރޭގައި ސިވިލް ސަރވިސް މުވައްޒަފުންގެ މުސާރަ ބޮޑުކުރެއްވުމާއި، މަސްވެރިންނަށް ދެއްވާފައިވާ ވައުދުތައް ފުއްދަވާނެ ކަމުގެ ޔަގީންކަން ދެއްވުން ހިމެނެއެވެ.

ހުކުރު ދުވަހުގެ ރޭގެ މުޒާހަރާއަށް ތައްޔާރުވުމުގެ ގޮތުން ފުލުހުންނާއި ސިފައިންގެ އިސްވެރިންގެ ހާއްސަ ބައްދަލުވުމެއް ވެސް ވަނީ ބާއްވާފަ އެވެ. އަދި މުޒާހަރާގައި ހަމަނުޖެހުން އުފެދިދާނެ ކަމަށް ބުނެ ފުލުހުން ވަނީ ބަޔާނެއް ވެސް ނެރެފައެވެ.

އެމްޑީޕީން ހުކުރު ދުވަހުގެ ރޭ 8:30 ގައި ބާއްވާ މި މުޒާހަރާގައި އަދާލަތު ޕާޓީން ވެސް ބައިވެރިވާނެ ކަމަށް އެ ޕާޓީން ވަނީ އިއުލާނުކޮށްފައެވެ. މި މުޒާހަރާއަކީ ސަރުކާރުމް މުޅި ގައުމު ލޫޓުވަމުން ގެންދާތީ އެކަމާއި ދެކޮޅަށް ބާއްވާ މުޒާހަރާއެއް ކަމަށް އިދިކޮޅު ފަރާތްތަކުން ބުނެ އެވެ.