ސަރުކާރުން ހިތުހުރި ގޮތަކަށް ރައްޔިތުންގެ އަނގައިގައި ޓޭޕެއް ނޭޅޭނެ: މައުރޫފް
17 ނޮވެމްބަރު 2026 | އަންގާރަ 08:43ސަރުކާރުން އަބުރުގެ ގާނޫނު އަލުން ގެނެސް ރައްޔިތުންގެ ބަސްބުނުމުގެ މިނިވަންކަން ހަނިނުކުރެވޭނެ ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ. ސަރުކާރުގެ ވައުދުތައް ނުފުއްދި، ދައުލަތުގެ ބަޖެޓުން ކުރާ ހޭދައާ އެއްވަރަށް ނަތީޖާ ނުފެންނާތީ ރައްޔިތުންގެ ފާޑުކިޔުން އަމާޒުވާނެ ކަމަށާއި، ސޯޝަލް މީޑިއާގައި ހިޔާލުފާޅުކުރުން ހުއްޓުވަން މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށް އޭނާ ފާހަގަކުރެއްވި


ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު | ރާއްޖެ އެމްވީ
ސަރުކާރުން ހިތުހުރި ގޮތަކަށް ރައްޔިތުންގެ އަނގައިގައި ޓޭޕެއް ނޭޅޭނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން މެންބަރު މައުރޫފް ވިދާޅުވީ މީގެ ކުރިން ވެސް ސަރުކާރުތަކުން ރައްޔިތުންގެ އަނގައިގައި ޓޭޕް އަޅަން މަސައްކަތް ކުރި ކަމަށެވެ. ނަމަވެސް އެކަން އޭރުގައި ވެސް ނުކުރެވޭ ކަމަށް މައުރޫފް ވިދާޅުވި އެވެ.
މިސަރުކާރުން ރައްޔިތުންނަށް ވެފައިވާ ވައުދުތައް ފުއްދަން ވީ ކަމަށާއި އަބުރު ގާނޫނު ގެންނަންވީ ނޫން ކަން ފާހަގަކުރައްވާ މެންބަރު މައުރޫފް ވިދާޅުވީ ސަރުކާރުގެ ވެރިން ދެކެ ހިތްހަމަނުޖެހިގެން ރައްޔިތުން ވާހަކަދައްކާ ހާލަތަށް އަންނަނީ ރައްޔިތުން، ރައީސުލްޖުމްހޫރިއްޔާ އަދި ވަޒީރުންނަށް ހަވާލު ކުރާ މަސްއޫލިއްޔަތު އަދާ ނުކުރެވޭތީ ކަމަށެވެ.
ހަމައެއާއެކު، ރައްޔިތުން ވަރަށް ކެތްތެރި ކަމަށާއި ރައްޔިތުން ރައްޔިތުންގެ ހަގީގީ ޒިންމާ އަދާކުރާ ކަމުގައި ވާނަމަ ރައީސް މުއިއްޒުގެ ވެރިކަން މިހާރު ނޯންނާނެ ކަމަށް މެންބަރު މައުރޫފް ވިދާޅުވި އެވެ.
އެހާ ވެސް ކަންކަން ގޯސްކޮށް މިދަނީ، އަޅުގަނޑުމެން އެތަށް ސަތޭކަ މިލިއަން ރުފިޔާއެއްގެ ބަޖެޓު ފާސްކޮށްފައި ދީފިން. އެތައް ސަތޭކަ މިލިއަން ރުފިޔާއެއް ދައުލަތުގެ އާމްދަނީ ގޮތުގައި ލިބޭ އެބަ. އެހެންނަމަވެސް ރައްޔިތުން މިއަދު އުޅެމުންދާ ހާލު ރައްޔިތުންނަށް އެބަ އެނގޭ، ރައްޔިތުންނަށް އޮތް ގާނޫނީ ޒިންމާއެއް ހައްގެއް އެއީ ނުކުމެ ސަރުކާރުތައް ޖަވާބުދާރީ ކުުރުވުމަކީ ސަރުކާރުތަކާއި ދެކޮޅަށް ނުކުމެ މުޒާހަރާ ކުރުމަކީ، ވެރިކަން ބަދަލުކުރުމަކީމައުރޫފް ޒާކިރު
އެކަންކަން ނުކޮށް ސޯޝަލް މީޑިއާގައި ޕޯސްޓެއް ކޮށްގެން ރައްޔިތުން ނުނިކުމެ ގޭގައި ތިބެނީ ރައްޔިތުން ރަނގަޅު ވީމަ ކަމަށް މެންބަރު މައުރޫފް ވިދާޅުވި އެވެ. ނަމަވެސް އެގޮތަށް މަޑުން ތިބުމުން ސަރުކާރުން ހިންގާ ޖަރީމާތަކުގެ ވާހަކަ ދެއްކުން މަނާ ކުރާ ކަމަށް މެންބަރު މައުރޫފް ވިދާޅުވި އެވެ.
އެގޮތުން މިހާރު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުގައިވާ ގޮތުން ސޯޝަލް މީޑިއާގައި މީހެއްގެ ވާހަކަދައްކާފައި އޮތް ޕޯސްޓެއް ޝެއަރ ކުރުމުން ވެސް ކުށްވެރިވާ ކަމަށް މައުރޫފް ވިދާޅުވި އެވެ.











