އެންމެ މީހެއްގެ މަސްލަހަތުގައި ގާނޫނުތައް ފާސްކުރަމުންދާ މަޖިލީހަކީ މިއަދު ރާއްޖެއަށް ކުރިމަތިވެފައިވާ އެންމެ ބޮޑު މައްސަލަ: މެންބަރު މައުރޫފް
15 ނޮވެމްބަރު 2026 | އާދީއްތަ 10:05ރައްޔިތުންގެ މަޖިލީހަކީ ރައީސުލްޖުމްހޫރިއްޔާގެ ފުރިހަމަ ކޮންޓްރޯލްގެ ދަށުގައި އޮތް "ރަބަރު ސްޓޭމްޕް" ޖަހާ ތަނަކަށް ބަދަލުވެ، ދައުލަތުގެ ބާރުތައް މަސްހުނިވެފައިވާ ކަމަށް ކެންދޫ ދާއިރާގެ މެންބަރު މައުރޫފް ވިދާޅުވި. ސަރުކާރު ޒިންމާދާރުކުރުވުމުގެ ނިޒާމު ގެއްލި، ގާނޫނުތައް ހަދަނީ ވަކި މީހެއްގެ މަންފާއަށް ކަމަށް ވިދާޅުވެ އޭނާ ވަނީ ކަންބޮޑުވުން ފާޅުކުރައްވާފައި. މީގެ އިތުރުން މެންބަރު މައުރޫފް ވިދާޅުވީ، މި ސަރުކާރުން ރައްޔިތުންގެ ހައްގުތަކާއި ތަރައްގީއަށް އެދެވޭ މަސައްކަތެއް ކޮށްދެވިފައި ނުވާ ކަމަށް
އާދިއްތަ ދުވަހު ގައުމީ ހަރަކާތުން ބޭއްވި ނޫސްވެރިންގެ ބައްދަލުވުމެއްގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ | ރާއްޖެއެމްވީ
މިއަދު މި ގައުމަށް ދިމާވެފައިވާ އެންމެ ބޮޑު އެއް މައްސަލައަކީ ގާނޫނުއަސާސީން ވަރަށް ބޮޑެތި ބާރުތަކެއް ދީފައިވާ ރައްޔިތުންގެ މަޖިލިސް ހިނގަމުންދާ ގޮތް ކަމަށާއި، މަޖިލީހަށް އޮތް އިތުބާރު ގެއްލި އެތަން ވަކި ބޭފުޅެއްގެ ކޮންޓްރޯލްގެ ދަށަށް ގޮސްފައިވާ މައްސަލަ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
އާދިއްތަ ދުވަހު ގައުމީ ހަރަކާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މެންބަރު މައުރޫފް ވިދާޅުވީ، ގާނޫނުއަސާސީގެ ތިން ބާރުގެ ތެރެއިން އެއް ބާރު ކަމުގައިވާ ގާނޫނު ހެދުމުގެ ބާރަކީ ރައްޔިތުންގެ މަންދޫބުންގެ ގޮތުގައި އިންތިޚާބުކުރެވި ބޮޑެތި ބާރުތަކެއް ދީފައިވާ ތަނެއް ކަމަށެވެ. ނަމަވެސް އެ މަންދޫބުން މިއަދު އަމަލުކުރަމުންދާ ގޮތުން ދިވެހި ރައްޔިތުންގެ އިތުބާރު މަޖިލީހަށް މިއަދު ނެތް ކަމަށް އޭނާ ވިދާޅުވި އެވެ.
މަޖިލިސް މިހާރު ހިންގަމުންދާ ގޮތާ ގުޅޭގޮތުން މެންބަރު މައުރޫފް ވިދާޅުވީ، ރައްޔިތުންގެ މަޖިލީހަކީ ވަކި ބޭފުޅަކު، ޚާއްސަކޮށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކޮންޓްރޯލް ކުރައްވާ ތަނެއް ކަމަށެވެ.
އެ ތިން ބާރުގެ މަފްހޫމު އެއްކޮށް ގެއްލި، ހުރިހާ ކަމެއް އެ ބޭފުޅުންގެ އަމިއްލަ ވިސްނުމާ، އެ ބޭފުޅުން އިންތިޚާބުކުރެއްވި އެ ދާއިރާތަކުގެ ރައްޔިތުންގެ ވިސްނުމާ ޚިލާފަށް ހަމައެކަނި ރަބަރު ސްޓޭމްޕް ޖަހަމުންދާ ދިއުން، އެއީ މިއަދު އަޅުގަނޑުމެންނަށް ދިމާވެފައިވާ އެންމެ ބޮޑު މައްސަލަމައުރޫފް ޒާކިރު
ވެރިކަން ހިންގުމުގެ ބާރާއި އަދުލު އިންސާފުގެ ބާރު ޒިންމާދާރުކުރުވުމުގެ ނިޒާމީ ޗެކް މިއަދު ގެއްލި، ބާރުތައް އެކުވެ މަސްހުނިވެފައިވާ ކަމުގެ ކަންބޮޑުވުން މެންބަރު މައުރޫފް ފާޅުކުރެއްވި އެވެ. އޭނާ ވިދާޅުވީ ދައުލަތުގެ ބަޖެޓު ހިތުހުރި ގޮތަކަށް ތަންފީޒުކުރަމުންދާ އިރު، މަޖިލީހަށް ހުށަހަޅާ ގާނޫނުތައް ފާސްކުރަމުން ދަނީ ވެސް އެންމެ މީހެއްގެ ފައިދާއާއި މަންފާއަށް އަމާޒުކޮށްގެން ކަމަށެވެ.
މީގެ އިތުރުން މެންބަރު މައުރޫފް ވިދާޅުވީ، މި ސަރުކާރަށް ތިން އަހަރު ދުވަސް ވެގެންދާއިރު، ރައްޔިތުން އިތުބާރުކޮށްފައި އިންތިޚާބުކުރި މަޖިލީހަށާއި ރައީސުލްޖުމްހޫރިއްޔާއަށް ރައްޔިތުން ބޭނުންވާ މިންވަރަށް ޚިދުމަތްތަކާއި ހައްގުތައް ފޯރުކޮށްދެވިއްޖެތޯ އަދި ތަރައްގީއާއި ދިރިއުޅުމުގެ ހާލަތު ރަނގަޅުކޮށްދެވިއްޖެތޯ ރައްޔިތުން ވިސްނަންޖެހޭ ކަމަށެވެ. އަދި އެއްވެސް ޝައްކެއް ނެތް މިންވަރަށް ޔަގީންކަމާއެކު އެ ގޮތަށް ރައްޔިތުންނަށް އެއްވެސް ކަމެއް ރަނގަޅަށް ކޮށްދެވިފައިނުވާ ކަމަށް މެންބަރު މައުރޫފް ވިދާޅުވި އެވެ.
