ކެލިފޯނިއާގެ ވައިން އުފައްދާ ސަރަހައްދުގައި ރޯވެ އަނދަނީ

ކެލިފޯނިއާގެ ވައިން އުފައްދާ ސަރަހައްދުގެ ބައެއްގައި ރޯވެ ބާރު މިނުގައި ފެތުރެމުންދާ އަލިފާނުގައި މަދުވެގެން 10 މީހުން މަރުވެއްޖެއެވެ.

ރައްކާތެރި ސަރަހައްދުތަކަށް މީހުން ބަދަލުކުރުމާ އެކު އުތުުރުގެ ސަރަހައްދުތަކުގައި ވަނީ ކުއްލި ނުރައްކަލުގެ ހާލަތު އިއުލާނުކޮށްފައެވެ.

މިހާތަނަށް 1،500 އެއްހާ ގެދޮރު ވަނީ ސުންނާފަތިވެފައެވެ.

ނަޕާ، ސޮނޮމާ އަދި ޔޫބާ ކައުންޓީ ދޫކޮށް 20،000 އެއްހާ މީހުން ނުކުމެފައިވާއިރު ބައެއް ފަރާތްތަކުން ބުނާ ގޮތުން މިއީ އެ ސްޓޭޓްގެ ޖަންގަލިތަކުގައި ހިނގި އެންމެ ނުރައްކާތެރި އަލިފާނުގެ ހާދިސާއެވެ.

ކެލިފޯނިއާގެ ޖަންގަލިތަކުގައި މިގޮތަށް އަލިފާނުގެ ހާދިސާ ހިނގުމަކީ އާއްމު ކަމަކަށްވާ އިރު މި ފަހަރުގެ ހާދިސާގައި ގެއްލުން ބޮޑުވެގެން ދިޔައީ ހަނަފަސްވުމާ ގަދަ ވައިގެ ސަބަބުންނެވެ.

ކުއްލި ހާލަތު އިއުލާނު ކުރައްވަމުން ގަވަރނަރ ޖެރީ ބްރައުން ވިދާޅުވީ އަލިފާނުގެ ސަބަބުން އެތައް އިމާރާތްތަކެއް ހަލާކުވެފައިވާއިރު އެތައް ހާސް ގެއަކަށް އަލިފާނުގެ ބިރު ބޮޑުވެ އެތައް ބަޔަކު ރައްކާތެރި ސަރަހައްދުތަކަށް ގެންދަން ޖެހިފައިވާ ކަމަށެވެ.

ބީބީސީ ވެދަރ އިން ބުނީ ކުރިޔަށް އޮތް ދުވަސްތަކުގައި މުސޫން ލަފާކުރާ ގޮތަށް ބަލާއިރު އަލިފާން ނިއްވާ ފަރާތްތަކަށް ކޮންމެވެސް ލުޔެއް ލިބިދާނެކަމުގެ ނިޝާންތައް ފެންނަނީ ކުޑަކޮށެވެ.

ގަޑިއަކު 80 ކިލޯމީޓަރުގެ ބާރުމިނުގައި ވައި ޖެހެމުންދާއިރު 15 ތަނެއްގައި ރޯވެފައިވާ އަލިފާނާއެކު 73،000 އޭކަރު އަނދާފައިވާ ކަމަށް އެ ސްޓޭޓްގެ ފަޔަރަ ސަރވިސްއިން ބުނެއެވެ.