ފޯޅަވަހި މައްސަލައިގައި ރާއްޖެއިން އަމަލުކުރި ގޮތް ބަލަން އުފެއްދި ކޮމިޝަނުގެ ތަހުގީގު އަޑުއެހުންތައް ޓީވީން ލައިވްކުރަން ޖެހޭ: މައުރޫފް
1 ނޮވެމްބަރު 2026 | އާދީއްތަ 14:04ރާއްޖެއާއި ފޯޅަވައްސާ ދެމެދު އިން ވަކިކުރި މައްސަލަ ބަލާ ކޮމިޝަނުގެ އަޑުއެހުންތައް ޓީވީން ލައިވްކުރަން ގާނޫނީ ވަކީލު މައުރޫފް ގޮވާލެއްވި. އޭނާ ވިދާޅުވީ މި މައްސަލަ ކުއްލިއަކަށް ފެންމަތިކުރީ ރަސްމާލެ މަޝްރޫއުގެ ކަންބޮޑުވުންތައް އޮއްބާލުމަށް ކަމަށް
ރާއްޖެޓީވީގެ ފަލަސުރުހީ ޕްރޮގްރާމުގައި ރައީސް އޮފީހުގެ ކުރީގެ ލީގަލް އެފެއާޒްގެ އަންޑަރ ސެކްރެޓަރީ އަދި ގާނޫނީ ވަކީލު އަހުމަދު މައުރޫފް ވާހަކަ ދައްކަވަނީ | ރާއްޖެއެމްވީ
ރާއްޖެއާ ފޯޅަވައްސާ ދެމެދު ކަނޑުގެ ސަރަހައްދުގެ އިން ވަކިކުރުމަށް މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހެޅި މައްސަލައިގައި ރާއްޖެއިން އަމަލުކުރި ގޮތް ބެލުމަށް ރައީސް ޑރ. މުހައްމަދު މުއިއްޒު އުފެއްދެވި ޚާއްސަ ކޮމިޝަނުގެ ހުރިހާ ތަހުގީގު އަޑުއެހުންތަކެއް ޓީވީން ލައިވްކޮށް ދުރަށް ދައްކަން ޖެހޭނެ ކަމަށް ރައީސް އޮފީހުގެ ކުރީގެ ލީގަލް އެފެއާޒްގެ އަންޑަރ ސެކްރެޓަރީ އަދި ގާނޫނީ ވަކީލު އަހުމަދު މައުރޫފް ވިދާޅުވެއްޖެ އެވެ.
މައުރޫފް މިހެން ވިދާޅުވީ، އިޓްލޮސްގެ މައްސަލައިގައި ދިވެހިރާއްޖެއަށް ބޮޑެތި ގެއްލުންތަކެއް ލިބިފައިވާ ކަމަށް ބުނެ، އެ މައްސަލައިގައި ދައުލަތުން އަމަލުކުރި ގޮތް ތަހުގީގުކުރުމަށް ރައީސުލްޖުމްހޫރިއްޔާ ޚާއްސަ ރިޔާސީ ކޮމިޝަނެއް އުފެއްދެވުމާ ގުޅިގެންނެވެ.
އެކަމާ ގުޅޭގޮތުން މައުރޫފް ވިދާޅުވީ، ކަނޑުގެ އިން ވަކިކުރި މައްސަލައިގައި ކުރީ ސަރުކާރުގެ ވެރިންގެ މައްސަލަ ބަލާނެ ކަމަށް ބުނެ މި ސަރުކާރު ވެރިކަމަށް އައި ނަމަވެސް، ދައުލަތުގެ ހުރިހާ ބާރެއް ލިބި ތިބެ މިހާތަނަށް އެއްވެސް ކަމެއް ކޮށްފައި ނުވާ ކަމަށެވެ. އަދި އިޓްލޮސްގެ ނިންމުން އިސްތިއުނާފު ކުރުމަކީ ރައީސް މުއިއްޒުގެ ރިޔާސީ ވައުދެއް ނަމަވެސް، ވެރިކަމަށް ތިން އަހަރު ވެގެން ދިޔައިރު ވެސް އެކަން ކޮށްފައި ނުވާ ކަމަށް އޭނާ ވިދާޅުވި އެވެ.
މީގެއިތުރުން، އެ މައްސަލަ ތަހުގީގު ކުރަން ޖެހޭނެ ކަމަށާއި، ނަމަވެސް ހުރިހާ ތަހުގީގު އަޑުއެހުމެއް ރައްޔިތުންނަށް ފެންނާނެހެން ޓީވީން ވަގުތުން ދުރަށް ދައްކަން ޖެހޭނެ ކަމަށް މައުރޫފް ވިދާޅުވި އެވެ. އަދި އެކަމުގައި ޖަވާބުދާރީ ވާން ކުރީ ސަރުކާރު އޮތީ ތައްޔާރަށް ކަމަށް ވެސް އޭނާ ވިދާޅުވި އެވެ.
މައުރޫފް އިތުރަށް ވިދާޅުވީ، މި މައްސަލަ މިހާރު ކުއްލިއަކަށް ނަގައިގެން ސަރުކާރުން އުޅެނީ ރަސްމާލެ މަޝްރޫއާ ގުޅިގެން ދެކެވޭ ވާހަކަތައް އޮއްބާލުމަށް ކަމަށެވެ. އަދި އެކަން ރައްޔިތުންނަށް ވަރަށް ސާފުކޮށް އެނގޭ ކަމަށް ވެސް އޭނާ ވިދާޅުވި އެވެ.
