ތެލެސީމިއާ ބަލި ތަހައްމަލު ކުރަމުންދާ ފަރާތްތަކަށް ބޭސް ނުލިބި އެތައް މަސްތަކެއް ފާއިތުވަނީ: ބަލިމީހުން ބޭނުންވަނީ ވައުދެއް ނޫން
29 އޮކްޓޯބަރު 2026 | ބުރާސްފަތި 12:51ރާއްޖޭގައި ބޭސް ލިބުމުގެ ދަތިކަން އިންތިހާއަށް ބޮޑުވެ، ދާއިމީ ބަލިތަކަށް ފަރުވާކުރާ މީހުންގެ ފުރާނައަށް ނުރައްކާވަމުންދާތީ އާންމުން ދަނީ ކަންބޮޑުވުން ފާޅުކުރަމުން. ސަރުކާރުގެ އިސްވެރިންގެ މުސާރަ ބޮޑުކުރުމުގެ މަސައްކަތް ހަލުވިކަމާއެކު ކުރިއަށްދާއިރު، ކޮންމެހެން ބޭނުންވާ އަސާސީ ބޭސްތައް ހޯދުމުގައި ދިމާވާ މައްސަލަތަކަށް ދާއިމީ ހައްލެއް ނުލިބޭތީ ގިނަ ބައެއްގެ ފާޑުކިޔުން ވަނީ އަމާޒުވެފައި
ތެލެސީމިއާ ބަލި ތަހައްމަލު ކުރަމުންދާ ފަރާތްތަކަށް ބޭސް ނުލިބި އެތައް މަސްތަކެއް ފާއިތުވަނީ: ބަލިމީހުން ބޭނުންވަނީ ވައުދެއް ނޫން | އަދަދު
ތެލެސީމިއާ ބަލި ތަހައްމަލު ކުރަމުންދާ މީހުންނަށް ކޮންމެހެން ބޭނުންވާ، ހަށިގަނޑުން ދަގަނޑުގެ ބައި ބޭރުކުރާ ބޭސް، އަޔަން ކީލޭޝަން ލިބުމުގައި ދަތިތަކެއް ދިމާވެ އެ ފަރާތްތަކުން ކަންބޮޑުވުން ފާޅުކޮށްފި އެވެ.
މިކަމުގެ ކަންބޮޑުވުން ފާޅުކޮށް ތެލެސީމިއާ ތަހައްމަލު ކުރަމުންދާ މީހަކު "އެކްސް" ގައި ކުރި ޕޯސްޓެއްގައި ބުނެފައިވަނީ، ބޭސް ހުސްވާ ކޮންމެ ފަހަރަކު، އެންމެ ދެ ހަފުތާއަށް ފުދޭވަރުގެ މަދު މިންވަރެއް ދިނުމަށްފަހު، އަނެއްކާވެސް މަޑުކުރުމަށް އަންގާ ކަމަށެވެ. "ޝިޕްމަންޓެއް އެބަ އާދޭ"، "މަގުމަތީގައި ވަނީ"، "ވަރަށް އަވަހަށް ލިބޭނެ" ފަދަ ޖަވާބުތައް ލިބުނު ނަމަވެސް، ބޭސް ހުސްވުމުގެ މައްސަލައަށް ހައްލެއް ނުލިބޭ ކަމަށް އޭނާ ބުންޏެވެ.
މިއީ ދޭތެރެއަކުން ބޭނުންކޮށްލާ ބޭހެއް ނޫން ކަމަށާއި މިއީ މުޅި އުމުރަށް ކޮންމެ ދުވަހަކު ބޭނުންކުރަންޖެހޭ ބޭހެއްކަން ފާހަގަކޮށް ދެން އަންނަ ޝިޕްމަންޓެއް ލިބެންދެން ބަލި މަޑުޖައްސައި ނުލެވޭނެ ކަމަށް އޭނާ ބުނެފައިވެ އެވެ.
މިއީ ހަމައެކަނި ތަލަސީމިއާ ބަލިމީހުންނަށް ދިމާވެފައިވާ މައްސަލަ އެއް ނޫން ކަމަށާއި މުޅި ރާއްޖޭގެ އެކި ކަންކޮޅުތަކުގައި ވެސް ބޭސް ލިބުމުގެ ދަތިކަން އިންތިހާއަށް ބޮޑުވެފައިވާކަން ގަބޫލުކުރާ ކަމަށް އޭނާ ބުންޏެވެ. އަދި ހާއްސަކޮށް، މުޅި އުމުރަށް ބޭސް ބޭނުންކުރަންޖެހޭ އަދި ގަވާއިދުން އިންޖެކްޝަން ޖަހަންޖެހޭ ދާއިމީ ބަލިތަކަށް ފަރުވާ ހޯދާ މީހުންނަށް މިކަމުގެ ނޭދެވޭ އަސަރު ކުރަމުންދާކަން އޭނާ ފާހަގަކޮށްފައިވެ އެވެ.
އޮސްޓިއޯޕޮރޯސިސް އާއި ހޯރމޯން މަދުވުމުގެ މައްސަލަތަކާއި އެ ނޫންވެސް އެކި ބަލިތަކަށް ފަރުވާ ހޯދާ ބަލިމީހުންނަށް ކޮންމެހެން ބޭނުންވާ ބޭސް ނުލިބޭތާ އަށް މަސް ނުވަތަ އެއަށްވުރެ ގިނަ ދުވަސް ވެފައިވާކަން އޭނާ ފާހަގަކޮށްފައިވެ އެވެ. ބައެއް މީހުންނަށް އެންމެ މަހަކު ބޭނުންކުރާނެ ބޭސް ލިބުނު ނަމަވެސް، އޭގެ ފަހުން އަނެއްކާވެސް ކުރިމަތިލާން ޖެހެނީ ބޭސް ލިބޭނެ ދުވަހެއް ނޭނގުމުގެ ބިރުވެރިކަމުގެ އިތުރުން ބައެއް ކަހަލަ ފަރުވާތައް މެދުކެނޑުމަކީ އޭގެ ސަބަބުން ސިއްހަތަށް އިއާދަނުކުރެވޭ ފަދަ ބޮޑެތި ގެއްލުންތަކެއް ލިބިދާނެ ކަމެއް ކަމަށް އޭނާ ބުންޏެވެ. އަދި މިއީ ސީދާ އިންސާނުންގެ ފުރާނައަށް އޮތް ނުރައްކަލެއް ކަމަށް ވެސް ބުނެފައިވެ އެވެ.
ސްޓޭޓް ފާމާގެ މަގުސަދަކީ ކޮންމެހެން ބޭނުންވާ ބޭސްތައް ލިބޭނެކަން ކަށަވަރުކޮށްދިނުންކަމަށް ވާއިރު، ބަލިމީހުން ބޭނުންވަނީ ހަމައެކަނި ޝިޕްމަންޓް އަންނަ ވާހަކައާއި ފޫނެތް ވައުދުތަކެއް ނޫން ކަމަށާއި، އެމީހުން ބޭނުންވަނީ ނަތީޖާ ނެރެދޭނެ ނިޒާމެއް ކަމަށް އޭނާ ބުނެފައިވެ އެވެ. އަދި ސްޓޭޓް ފާމާއިން އެއް ބަހަނާތަކެއް ދައްކަމުންދާތާ ކިހާ ދުވަހެއް ވާނެތޯ ވެސް އޭނާ ސުވާލު އުފައްދާފައިވެ އެވެ.
ހަމައެއާއެކު، ސަރުކާރުގެ އިސްވެރިންނާއި 600 އަށްވުރެ ގިނަ ރަށު ކައުންސިލަރުންގެ މުސާރައާއި އިނާޔަތްތަކަށް އަހަރަކު 39.5 މިލިއަން ރުފިޔާ އިތުރުކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން އެންމެ 82 މިނިޓުގެ ތެރޭގައި ނިންމިކަން ފާހަގަކޮށް، އޭނާ ވަނީ އަމިއްލަ މުސާރައާއި އިނާޔަތްތަކާ ގުޅޭ ކަންކަމުގައި ނިންމުންތައް ނިންމަނީ ނުހަނު ހަލުވިކަމާއެކުގައި ނަމަވެސް، ބަލިމީހުން ކޮންމެހެން ބޭނުންވާ ބޭސްތަކަށް މަސްތަކެއް ވަންދެން އިންތިޒާރު ކުރަންޖެހޭ ކަމަށް ބުނެ ކަންބޮޑުވުން ފާޅުކޮށްފަ އެވެ.
ތެލެސީމިއާ އާއިލާތަކަށް ބޭނުންވާނެ ސިއްހީ އަދި އިޖްތިމާއީ ރައްކާތެރިކަމާއި ފުރުސަތުތައް ފަހިކޮށްދިނުމަކީ ސަރުކާރުގެ ޒިންމާއެއް ކަމަށް ރައީސް މުއިއްޒު ވިދާޅުވެފައިވީ ނަމަވެސް ތެލެސީމިއާ ބަލިމީހުންނަށް ބޭނުންވާ ބޭސް ނުލިބޭކަމުގެ ކަންބޮޑުވުން އަންނަނީ އިތުރުވަމުންނެވެ.
