ބޭސް ލިބުމުގެ ދަތިކަމަށް ދާއިމީ ހައްލެއް ލިބޭނެ ކަމުގެ އައު ތާރީހެއް ހެލްތު މިނިސްޓަރު ދެއްވައިފި
27 ސެޕްޓެމްބަރު 2026 | އާދީއްތަ 08:13ރާއްޖެއަށް ބޭސް ގެނައުމުގެ ކަންކަން ހަރުދަނާކުރުމަށް "ސްޓޭޓް ފާމާ" ގެ ނަމުގައި ކުންފުންޏެއް އުފައްދައި، އަތޮޅުތެރޭގެ ފާމަސީތަކަށް ބޭސް ފޯރުކޮށްދިނުމުގެ އިންތިޒާމުތައް ސަރުކާރުން ދަނީ ހަމަޖައްސަމުން. މި މަސައްކަތުގެ ދަށުން އެސެންޝަލް މެޑިސިން ލިސްޓުގައި ހިމެނޭ ބޭސްތައް ނޮވެމްބަރު މަހުގެ ނިޔަލަށް ރައްޔިތުންނަށް ފޯރުކޮށްދެވޭނެ ކަމަށް ހެލްތު މިނިސްޓަރު ވިދާޅުވި
ދައުލަތު މީޑިއާގައި ހެލްތު މިނިސްޓަރު ގީލާ އަލީ ވާހަކަ ދައްކަވަނީ | ޕީއެސްއެމް
ރާއްޖެއަށް ބޭސް ލިބުމުގައި ދިމާވެފައިވާ ދަތިތަކަށް ދާއިމީ ހައްލެއް ގެނައުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މި އަހަރުގެ ނޮވެމްބަރު މަސް ނިމުމުގެ ކުރިން އެސެންޝަލް މެޑިސިން ލިސްޓުގައި ހިމެނޭ ބޭސްތައް ރާއްޖެ ގެނެސް ރައްޔިތުންނާ ހަމައަށް ފޯރުކޮށްދެވޭނެ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.
'އަހާށޭ ބުނާނަން' ޕްރޮގްރާމުގައި ވާހަކަދައްކަވަމުން މިނިސްޓަރު ގީލާ ވިދާޅުވީ، ބޭހުގެ ހާލަތު ރަނގަޅުކުރުމަށް މީގެ ކުރީގެ ސަރުކާރުތަކުން މަސައްކަތްތަކެއް ކޮށްފައިވީ ނަމަވެސް، މި ސަރުކާރުން ވެސް މިކަމުގައި ވަރަށް ބޮޑެތި ނިންމުންތަކެއް ނިންމާފައިވާ ކަމަށެވެ.
އެގޮތުން، މީގެ ކުރިން ބޭސް ފޯރުކޮށްދިނުމުގެ މައިގަނޑު ޒިންމާ އެސްޓީއޯ އަދި އަމިއްލަ ފަރާތްތަކުން އުފުލަމުން ދިޔަ ނަމަވެސް، މިހާރު ސަރުކާރުން 'ސްޓޭޓް ފާމާ' ގެ ނަމުގައި ކުންފުންޏެއް އުފައްދައި ބޭނުންވާ ހުރިހާ އެހީތެރިކަމެއް ފޯރުކޮށްދިނުމުގެ މަސައްކަތް ކުރަމުންދާ ކަމަށް މިނިސްޓަރު ގީލާ ވިދާޅުވި އެވެ.
އެ ކުންފުނީގެ ދަށުން ބޭހުގެ ސަޕްލައި ރާއްޖެއަށް ގެނައުމާއި ދެމެހެއްޓެނިވި ގޮތެއްގައި އެ ސަޕްލައި ބެލެހެއްޓުމުގެ އިތުރުން އަތޮޅުތެރޭގެ ފާމަސީތަކަށް ބޭސް ފޯރުކޮށްދިނުމުގެ އިންތިޒާމުތައް ހަމަޖައްސަމުންދާކަން ފާހަގަކުރައްވައި މިނިސްޓަރު ގީލާ ވިދާޅުވީ، ޖުލައި މަހުގެ އެއް ވަނަ ދުވަހުން ފެށިގެން އެ ކުންފުނި ފުރިހަމައަށް އޮޕަރޭޝަނަލްވެ، އެސްޓީއޯގެ ހުރިހާ ބޭސްފިހާރަތަކާއި، އެތަންތަނުގައި މަސައްކަތްކުރާ 706 މުވައްޒަފުންނާ ބައްދަލުކުރެވި، ބޭނުންވާ އަސާސީ ބޭސްތައް މިހާރު ރާއްޖެ ގެނައުމުގެ މަސައްކަތް ކުރިއަށްދާ ކަމަށެވެ.
މިނިސްޓަރު ގީލާ ވިދާޅުވީ، އެސެންޝަލް މެޑިސިން ލިސްޓާއި އެޕްރޫވްޑް މެޑިސިން ލިސްޓުގައި ހިމެނޭ ބޭސްތަކަކީ ރާއްޖެއިން ބޭރުން އުފައްދައިގެން ގެންނަންޖެހޭ ވަރަށް ގިނަ އަދަދެއްގެ ބޭސްތަކެއް ކަމަށާއި، އެހެންކަމުން މި ބޭސްތައް ރައްޔިތުންނާ ހަމައަށް ފޯރުކޮށްދިނުމަށް ސްޓޭޓް ފާމާ އާއި ހެލްތު މިނިސްޓްރީ ގުޅިގެން ވަރަށް ބުރަ މަސައްކަތްތަކެއް ކުރަމުންދާ ކަމަށެވެ.
އެސްޓީއޯގެ ހުރިހާ ބޭސްފިހާރުތަކާ އަދި ބޭސްފިހާރުތަކުގެ ހަރަކާތްތެރިވާ 706 މުވައްޒަފުންނާ ބައްދަލުކުރެވި، އަދި އެ ބޭނުންވާ އަސާސީ ބޭސްތައް މިހާރު ރާއްޖެ ގެނެވިގެން މިދަނީ. އަޅުގަނޑުމެން އުންމީދު ކުރަނީ މި އަހަރުގެ ނޮވެންބަރު ނިންމުމުގެ ކުރިން ކުރިން އެސެންޝަލް މެޑިކަލް ލިސްޓް، މެޑިސިން ލިސްޓުގައި ހިމެނޭ ބޭސްތައް ރާއްޖެއަށް ގެނެވި، ރައްޔިތުންނާ ހިސާބަށް ފޯރުކޮށްދެވޭނެ. މިއީ ވަރަށް ގިނަ އަދަދެއްގެ ބޭހުގެ ވާހަކަ އަޅުގަނޑުމެން މި ދައްކަނީގީލާ އަލީ
މީގެއިތުރުން، ޑޮކްޓަރުން ލިޔުއްވާ ބޭސް ސްޓޭޓް ފާމާ މެދުވެރިކޮށް ހޯދުމުގައި މިހާރު ވެސް ރައްޔިތުންނަށް ލުއިފަސޭހަތަކެއް ލިބެމުންދާ ކަމަށާއި، ބޭނުންވާ ބޭސް ވީ އެންމެ އަވަހަކަށް ރައްޔިތުންނާ ހަމައަށް ފޯރުކޮށްދިނުމުގެ މަސައްކަތް އެ ކުންފުނިން މެދުކެނޑުމެއްނެތި ކުރަމުންގެންދާ ކަމަށް މިނިސްޓަރު ވިދާޅުވި އެވެ.
މިނިސްޓަރު ގީލާ މިމޭރުމުން ވާހަކަ ދެއްކެވި ނަމަވެސް ރައީސް މުއިއްޒުގެ ސަރުކާރުގައި އާސަންދައަށް ސްކީމަށް ގެނައި ބަދަލުތަކާއެކު ބޭސް ލިބުމަށް ވަނީ ވަރަށް ބޮޑަށް ދަތިވެފަ އެވެ. މީގެ ކުރިން ގަވާއިދުން ރާއްޖެއިން ލިބުނު ބޭސްތައް ނުލިބޭ ކަމުގެ ޝަކުވާ ގިނަ ރައްޔިތުން ދަނީ ކުރަމުންނެވެ. އަދި ބޭހުގެ މައްސަލަ ހައްލުކޮށް ބޭސް ލިބޭނެ ކަމަށް ރައީސް މުއިއްޒުގެ އިތުރުން ސަރުކާރުގެ އިސްބޭފުޅުން އެކި ތާރީޚުތައް ދެއްވި ނަމަވެސް މިއަދާ ހަމައަށް ބޭސް ލިބުން ދަތިވާ މައްސަލައަށް ދާއިމީ ހެއްލެއް ލިބިފައިނުވެ އެވެ.
