ސްޕެއިންގައި ދެ ރޭލު ޖެހި ހިނގި އެކްސިޑެންޓުގައި މަރުވި މީހުންގެ އަދަދު 68 އަށް އަރައިފި
29 އޮކްޓޯބަރު 2026 | ބުރާސްފަތި 03:12ސްޕެއިންގައި ހިނގި ރޭލު އެކްސިޑެންޓާ ގުޅިގެން އެ ޤައުމުގައި ތިން ދުވަހުގެ ހިތާމަ ފާޅުކުރުން އިއުލާނުކޮށް، މި ހާދިސާގެ މިނިވަން ތަހުގީގެއް ހިންގާނެ ކަމުގެ ޔަގީންކަން ބޮޑުވަޒީރު ޕެދްރޯ ސަންޗެޒް ދެއްވައިފި. ރޭލު ނިޒާމުގެ ރައްކާތެރިކަން ކަށަވަރުކުރުމަށް އިދިކޮޅު ފަރާތްތަކުން ގޮވާލާފައިވާއިރު، އިހުމާލެއްވާ ނަމަ ފިޔަވަޅު އަޅާނެ ކަމަށް ސަރުކާރުން ވަނީ ބުނެފައި
ސްޕެއިންގައި ދެ ރޭލު ޖެހިގެން ހިނގި އެކްސިޑެންޓުގައި މަރުވި މީހުންގެ ހަށިތައް ހޯދުމަށް ރެސްކިއު ޓީމު އޮފިޝަލުން މަސައްކަތް ކުރަނީ | އެކްސް
މެދުތެރޭ ސްޕެއިންގައި ބާރު ދުވެލީގައި ދުއްވާފައި ދިޔަ ދެ ރޭލު ޖެހި، ހިނގި އެކްސިޑެންޓުގައި މަރުވި މީހުންގެ އަދަދު މަދުވެގެން 68 އަށް އަރައިފައިވާ ކަމަށް ބުދަ ދުވަހު ކަށަވަރުވެފައިވާ އިރު، މި ކާރިސާގެ ފުރިހަމަ ތަހުގީގެއް ހިންގަވާނެ ކަމަށް އެ ޤައުމުގެ ބޮޑުވަޒީރު ޕެދްރޯ ސަންޗެޒް ވިދާޅުވެއްޖެ އެވެ.
ހާދިސާ ހިނގި ތޮލޭދޯގެ އުރްދާއަށް ޒިޔާރަތް ކުރައްވައި ވާހަކަފުޅު ދައްކަވަމުން ބޮޑުވަޒީރު ވިދާޅުވީ، ކަމާބެހޭ އިދާރާތަކުން މި އެކްސިޑެންޓް ހިނގަން މެދުވެރިވި ސަބަބު ދެނެގަންނާނެ ކަމަށާއި، އެއްވެސް ފަރާތެއްގެ ކުށެއް ނުވަތަ އިހުމާލެއް ފެންމަތިވެއްޖެ ނަމަ ފިޔަވަޅު އަޅާނެ ކަމަށެވެ. ސަރުކާރުން މި މައްސަލައިގެ ހަގީގަތް ހާމަކުރާނެ ކަމުގެ ފުރިހަމަ ޔަގާންކަން ސަންޗެޒް ދެއްވާފައިވާ ކަމަށް ސްޕެއިންގެ މީޑިއާތަކުން ރިޕޯޓުކުރެ އެވެ.
"މި ކަމުގެ އަޑިއަށް އަޅުގަނޑުމެން ވާސިލުވާނަން. އިހުމާލެއް ވެފައިވާ ނަމަ، އެކަން ހާމަވާނެ،" ސަންޗެޒް ވިދާޅުވި އެވެ.
ސްޕެއިން ފަދަ ޤައުމެއްގައި އެއް އަހަރެއްގެ ތެރޭގައި ހަލުވި ދުވެލީގެ ރޭލު އެކްސިޑެންޓް ދެ ފަހަރަށް ހިނގުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވަމުން، އޮކްޓޫބަރު 29 އިން 31 އަށް ޤައުމީ ހިތާމައިގެ ތިން ދުވަސް ސަންޗެޒް ވަނީ އިޢުލާނު ކުރައްވާފަ އެވެ. މިއާއެކު، ޖަނަވަރީ މަހު ކޯރްދޮބާގެ އަދަމޫސްގައި ހިނގި ރޭލު އެކްސިޑެންޓަށް ވެސް އޭނާ އިޝާރާތް ކުރެއްވި އެވެ.
އިބްތިދާއީ ހޯދުންތަކުން ދައްކާ ގޮތުގައި މި ދެ އެކްސިޑެންޓް ހިނގަން މެދުވެރިވީ ތަފާތު ސަބަބުތަކަކާ ހުރެ ކަމަށް ބެލެވުނު ނަމަވެސް، އެ ކަން ކަނޑައެޅުމަކީ މިނިވަން ތަހުގީގު ޓީމުތަކާއި ޝަރުޢީ އިދާރާތަކުގެ މަސްއޫލިއްޔަތެއް ކަން ބޮޑުވަޒީރު ފާހަގަކުރެއްވި އެވެ. ހަމަމިއާއެކު، ރައްކާތެރިކަމުގެ މިންގަނޑުތަކުގައި އެއްވެސް އުނިކަމެއް ހުރިކަން ދެނެގަނެވިއްޖެ ނަމަ، ޤައުމުގެ ރޭލު ނިޒާމާމެދު ރައްޔިތުންގެ އިތުބާރު އަލުން ހޯދުމަށް ހަރުދަނާ ފިޔަވަޅުތަކެއް އަޅުއްވާނެ ކަމަށް ވެސް އޭނާ ވިދާޅުވި އެވެ.
މި ދަނޑިވަޅުގައި، އިދިކޮޅު ޕީޕަލްސް ޕާޓީގެ ލީޑަރު އަލްބެރްތޯ ނޫންޔެސް ފޭޚޯއޯ ވަނީ ސަރުކާރާއި އަދުލު އިންސާފުގެ ދާއިރާއިން ވަގުތުން ވަގުތަށް މި މައްސަލައިގެ ތަހުގީގުތައް ފެށުމަށް ގޮވާލައްވާފަ އެވެ. އޭނާ ބާރުއެޅުއްވީ އެއްވެސް ނުފޫޒެއް ނެތި، ލިބެންހުރި ހުރިހާ ވަސީލަތްތަކެއް ބޭނުންކޮށްގެން މި ތަހުގީގު ކުރިއަށް ގެންދިއުމަށެވެ.
ޤައުމުގެ އުމްރާނީ ވަސީލަތްތަކަށް ވަމުންދާ ގޮތް ސާފުކޮށް އެނގުމުގެ ހައްގު ސްޕެއިންގެ ރައްޔިތުންނަށް އޮތް ކަމަށް ވިދާޅުވަމުން، ޤައުމުގެ މުޅި ރޭލު ވިއުގަ ފުރިހަމައަށް އަދި މިނިވަންކަމާއެކު މުރާޖާކުރުމަށް ފޭޚޯއޯ ގޮވާލެއްވި އެވެ. ނަމަވެސް، މިއީ އެ ފަދަ ކަމަކާ ބަހުސްކުރަންވީ ދުވަސް ނޫން ކަމަށް ބަޔާންކުރައްވައި، މި ކާރިސާގެ ސިޔާސީ ޒިންމާއާ ގުޅޭގޮތުން ވާހަކަފުޅު ދެއްކެވުމަށް އޭނާ ވަނީ ދެކޮޅުހައްދަވާފަ އެވެ.
މި ހާދިސާގައި ވަކިވެދިޔަ މީހުންގެ ހަނދާނުގައި، ބުދަ ދުވަހުގެ ރޭ ސްޕެއިން ގަޑިން 8:00 ގައި އެ ޤައުމުގެ އެކި ކަންކޮޅުތަކުގައިވާ ޓައުން ހޯލްތަކުގައި ހަނދާނުގެ ސުކޫތުގެ 1 މިނެޓު ގެނައުމަށް ވަނީ ހަމަޖެހިފަ އެވެ. މި ހަރަކާތް އިންތިޒާމުކޮށްފައި ވަނީ ސްޕެނިޝް ފެޑެރޭޝަން އޮފް މުނިސިޕަލިޓީސް އެންޑް ޕްރޮވިންސަސް އިންނެވެ.
މަސްދަރު: އަނަދޮލު އޭޖެންސީ
