ހުޅުމާލެ އެކްސިޑެންޓު: 3 މީހުން އަރުވައިގެން ދުއްވި ސައިކަލުގައި އިން މީހާ ހައްޔަރުކޮށްފި، އެއީ ޤަވާއިދާ ޚިލާފަށް ދުއްވުމުގެ ރެކޯޑު އޮތް މީހެއް!
14 އޮކްޓޯބަރު 2026 | ބުދަ 06:17ހުޅުމާލޭގައި ވަންވޭއާ އިދިކޮޅަށް ދުއްވި ސައިކަލެއް އެކްސިޑެންޓްވި މައްސަލައިގައި، ލައިސަންސް ނެތި ދުއްވި މީހާ ހަތް ދުވަހަށް ބަންދުކޮށްފި. މި ހާދިސާގައި ހައްޔަރުކުރި މީހަކީ މީގެ ކުރިން ވެސް ޓްރެފިކް ގަވާއިދުތަކާ ހިލާފުވެގެން ގިނަ ރެކޯޑުތަކެއް އޮތް މީހެއް ކަމަށާއި، އޭނާ ދުއްވި ސައިކަލަކީ ވަގަށް ނަގާފައިވާ އުޅަނދެއް ކަމަށް ބެލެވޭ ކަމަށް ފުލުހުން ބުނޭ
މި މައްސަލައިގައި ހައްޔަރުކޮށްފައިވަނީ މި އެކްސިޑެންޓުގައި ތިން މީހުން އަރުވައިގެން ދުއްވި ސައިކަލުގައި އިން އިރުމަތީގެ ލ.މާމެންދޫ، މުހައްމަދު ސައިފް | ޕޮލިސް
ހުޅުމާލެ ފޭސް 2 ގައި ވަންވޭއާ ހިލާފަށް ދުއްވި ސައިކަލެއް އެހެން ސައިކަލެއްގައި ޖެހި ހިނގި ނުރައްކާތެރި އެކްސިޑެންޓެއްގައި ހަތަރު މީހަކަށް ސީރިއަސް އަނިޔާވެފައިވާއިރު، މި މައްސަލައިގައި ހިމެނޭ މީހަކު ހައްޔަރުކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެފި އެވެ.
މި އެކްސިޑެންޓް ހިނގާފައިވަނީ 2026 އޮކްޓޫބަރު 7 ވަނަ ދުވަހުގެ ދަންވަރު 2:55 އެހައިކަންހާއިރު އެވެ.
މި މައްސަލައިގައި ހައްޔަރުކޮށްފައިވަނީ މި އެކްސިޑެންޓުގައި ތިން މީހުން އަރުވައިގެން ދުއްވި ސައިކަލުގައި އިން އިރުމަތީގެ ލ.މާމެންދޫ، މުހައްމަދު ސައިފް އެވެ.
އޭނާ ފަރުވާއަށްފަހު ދޫކޮށްލުމުން އޮކްޓޫބަރު 12 ވަނަ ދުވަހު ކޯޓު އަމުރެއްގެ ދަށުން ފުލުހުން ހައްޔަރުކޮށްފައިވާ ކަމަށް ފުލުހުން މީޑިއާތަކާ ހިއްސާކުރި މައުލޫމާތުގައިވެ އެވެ.
މުހައްމަދު ސައިފްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާ 7 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުނެ އެވެ.
ފުލުހުން ހާމަކުރި ތަފްސީލުތަކުން ދައްކާ ގޮތުގައި މުހައްމަދު ސައިފަކީ ލައިސަންސް ނެތި ދުއްވުމުގެ 13 މައްސަލައެއްގެ ރެކޯޑް އޮންނަ މީހެކެވެ. އަދި އަހަރީ ފީ އާއި ރޯޑްވާދިނަސް އަދި އިންޝުއަރެންސް ނެތި ދުއްވުމުގެ މައްސަލަތަކާއި މުވާސަލާތީ ވަސީލަތެއް ބޭނުން ކުރަމުން ދުއްވުމުގެ ރެކޯޑް ވެސް އޭނާގެ ނަމުގައި އޮންނަ ކަމަށް ފުލުހުން ހާމަކުރި އެވެ.
ފުލުހުންގެ ތަހުގީގަށް މިހާތަނަށް އެނގިފައިވާ ގޮތުގައި، މި އެކްސިޑެންޓް ހިނގަން މެދުވެރިވި އެއް ސައިކަލުގައި 3 މީހުން އަރައިގެން ދަތުރުކޮށްފައިވަނީ ވަންވޭއާ ހިލާފަށެވެ. އަދި އެއީ ވަގަށް ނަގާފައިވާ ސައިކަލެއް ކަމަށް ބެލެވޭއިރު، އެ ސައިކަލު ދުއްވަން އިނީ އެ ކެޓަގަރީގެ އެއްގަމު އުޅަނދު ދުއްވުމުގެ ލައިސަންސް އޮތް މީހެއް ނޫންކަމަށް ވެސް ފުލުހުން ވަނީ ބުނެފަ އެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
