ރަސްމާލެ މަޝްރޫއު މަޑުޖައްސާލައި، މި މަޝްރޫއުއާ ގުޅޭ ހިސާބުތައް ދެއްކުމަށް ޒަރިޔަންދު ގޮވާލައްވައިފި
19 އޮކްޓޯބަރު 2026 | ހޯމަ 14:09ރަސްމާލެ މަޝްރޫއުން ބޮޑު ގެއްލުމެއް ވާނެކަމަށް ލަފާކުރެވޭތީ، އެ މަޝްރޫއު މަޑުޖައްސާލައި ހިސާބުތައް ހާމަކުރުމަށް މާލީ ތަޖުރިބާކާރު އިސްމާއިލް ޒަރިޔަންދު ގޮވާލައްވައިފި. މި މަޝްރޫއު ހަވާލުކޮށްފައިވާ އީގަލް ހިލްސް ކުންފުނީގެ ގާބިލުކަމާ މެދު ސުވާލު އުފައްދަވަމުން، 2037 ވަނަ އަހަރާ ހަމައަށް ދައުލަތަށް ގާތްގަނޑަކަށް 430 މިލިއަން ޑޮލަރުގެ ގެއްލުން ވާނެކަމަށް އޭނާ ވިދާޅުވި. އެހެންކަމުން މިކަމުގައި ސަރުކާރުން ގެންގުޅޭ ހިސާބުތައް ދެފުށް ފެންނަ ގޮތަކަށް އާންމުކުރުމަށް އޭނާ ވަނީ ގޮވާލައްވާފައި
ރަސްމާލެގެ މަޝްރޫއުއާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި | ރާއްޖެ އެމްވީ
ރަސްމާލެ މަޝްރޫއު މަޑުޖައްސާލައި، މި މަޝްރޫއުއާ ގުޅޭ ހިސާބުތައް ދެއްކުމަށް މާލީ ދާއިރާގެ ތަޖުރިބާކާރެއް ކަމަށްވާ އިސްމާއިލް ޒަރިޔަންދު ގޮވާލައްވައިފި އެވެ.
ރަސްމާލެ މަޝްރޫއުއާ ގުޅޭ ގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޒަރިޔަންދު ވިދާޅުވީ މި މަޝްރޫއުއިން ފައިދާގެ ގޮތުގައި ލިބޭނެ ކަމަށް ސަރުކާރުން ބުނަމުންދާ އަދަދުތަކަކީ ރަނގަޅު އަދަދުތަކެއް ނޫން ކަމަށެވެ. މިހާރު ސަރުކާރުން އާންމުކޮށްފައިވާ މައުލޫމާތުތަކުގެ މައްޗަށް ބިނާކޮށް ހަދާފައިވާ ހިސާބުތަކުން ވަނީ ގެއްލުން ކަމަށް ޒަރިޔަންދު ވިދާޅުވި އެވެ.
އެގޮތުން، ރަސްމާލެ މަޝްރޫއުގެ ސަބަބުން 2037 ވަނަ އަހަރާއި ހަމައަށް ވާނީ ގެއްލުން ކަމަށް ޒަރިޔަންދު ވިދާޅުވި އެވެ.
މިގޮތުން އަޅުގަނޑު ދަންނަވަން ސަރުކާރުން ބުނެފައިވަނީ 12 ބިލިއަން ނުވަތަ 20 ބިލިއަންގެ އިންވެސްޓްމަންޓެއް ކަމަށް. އަޅުގަނޑަށް ގަބޫލުކުރެވެނީ 2037 ވަނަ އަހަރާއި ހަމައަށް ލޮލުން ނާރެއް ކެނޑިގެން ވެސް އިންވެސްޓް ކުރެވޭނީ އެންމެ ގިނަ ވެގެން ވެސް އެތަނުގައި 1.9 ބިލިއަން ކަމަށް އެންމެ ބޮޑު ވަރަކަށް ވެސް. ދެން ރަސްމާލޭގައި މިހާރު އިމާރަތްކުރެވޭނެ ފްލެޓްތަކުގެ އަދަދާއި އަދި އެކަން ދާނެ ގޮތާއި ދޭތެރޭގައި ވެސް އަޅުގަނޑަކަށް ގަބޫލެއް ނުކުރެވޭ މިހާރު މި ހަވާލު ވެގެން އުޅޭ ކުންފުނީގެ އެހެން ދިމަ ދިމާލުގައި އެހެން ގައުމުތަކުގައި އެ ކުންފިނުން ހިންގާފައިވާ ޕްރޮޖެކްޓްތަކުގެ ބިހޭވިއަރއަށް ބަލާއިރު އެކަން އެގޮތަށް ކުރެވިދާނެ ކަމަށްއިސްމާއިލް ޒަރިޔަންދު
ޒަރިޔަންދު ވިދާޅުވީ 2037 ވަނަ އަހަރާއި ހަމައަށް ސަރުކާރަށް 430 މިލިއަން ޑޮލަރާއި 285 މިލިއަން ޑޮލަރާއި ދެމެދުގެ އަދަދެއްގައި ގެއްލުން ވާނެ ކަމަށެވެ. އަދި ޒަރިޔަންދު ވަނީ ހިސާބުތައް އާންމުކުރައްވާ ޗެލެންޖް ކުރެއްވުމަށް ސަރުކާރަަށް ގޮވާލައްވާފައި އެވެ.
ސަރުކާރުން އަދި ހާއްސަކޮށް ދައުލަތަކުން ގައުމެއްގެ ރައްޔިތުންގެ މުހިއްމު އިސްތިރާޖީ ވަސީލަތަކާތް ބެހޭ ގޮތުން ހިސާބު ކުރެވޭ ކަމުގައި ވާނަމަ އެ ހިސާބުކުރުން ކުރަން ޖެހޭނީ އެކަމެއް ގަބޫލުކުރާ އެކަމެއްގެ ވިޔަފާރިއެއްގައި ބައިވެރިވާ ފަރާތެއްގެ އެހެން ބާވަތުގެ ޕްރޮޖެކްޓްތަކުގައި ހިންގާފައިވާ އަމަލުތަކަށް ބަލާފައިކަން ފާހަގަކުރައްވައި، ޒަރިޔަންދު ވަނީ އެހެން ގައުމުތަކުގައި އީގަލް ހިލްސް އިން ހިންގާފައިވާ މަޝްރޫއުތަކަށް ބަލާފައި ރަސްމާލެ މަޝްރޫއުއަކީ އެ ކުންފުންޏަށް ހިންގޭނެ މަޝްރޫއުއެއް ނޫން ކަން ގަބޫލުކުރެވޭ ކަމަށް ވިދާޅުވެފައި އެވެ.
އެހެންވީމަ އަޅުގަނޑު މިދެންނެވި ގެއްލުން ވާނެ ކަމަށް ގަބޫލު ކުރެވެނީ މިހާރު ބަލްގްރޭޓްގައި ހިންގާ ވޯޓަރ ފްރޮންޓް ޕްރޮޖެކްޓާއި އަދި އޭގެ އިތުރަށް އެހެނިހެން ގައުމުތަކުގައި އަލްބޭނިއާ ހަންގޭރީ ފަދަ ގައުމުތަކުގައި ހިންގާފައިވާ ޕްރޮޖެކްޓްތަކަށް ބަލާފައި އެ ޕްރޮޖެކްޓްތަކުގެ ހަމަތަކުގެ މަތިން މިކުންފުންޏަކީ ރަސްމާލޭގައި 500 ހެކްޓަރުގެ ޕްރޮޖެކްޓެއް ހިންގޭ ވަރުގެ ގާބިލް ކުންފުންޏެއް ކަމަށް ގަބޫލު ނުކުރެވެނީއިސްމާއިލް ޒަރިޔަންދު
އެހެންކަމުން ޒަރިޔަންދު ވަނީ ރަސްމާލެ މަޝްރޫއު ދެފުށް ފެންނަ ގޮތަކަށް ހިންގައި މި މަޝްރޫއުއާ ގުޅޭ ހިސާބުތަކާއި ހިސާބު ޖަހާފައި ހުރި ގޮތް ރައްޔިތުންނަށް ވެސް އެނގޭ ގޮތަށް އާންމު ކުރުމަށް ސަރުކާރަށް ގޮވާލާފައި އެވެ. އަދި މި މަޝްރޫއު މަޑު ޖައްސާލުމަށް ވެސް ޒަރިޔަންދު ގޮވާލެއްވި އެވެ.
