ސިއްރު އެއްބަސްވުމަކުން ހިނގާ އެއްވެސް ކަމަކަށް އަޅުގަނޑުމެން އާއެކޭ ބުނެގެން ނުވާނެ، އެފަދަ މަސައްކަތެއް އެމްޑީޕީ ސަރުކާރެއްގައި ކުރިއަށް ދިއުމަށް ޖާގަ ވެސް ދީގެން ނުވާނެ: ރައީސް ސޯލިހް
2 އޮކްޓޯބަރު 2026 | ހުކުރު 01:09އެމްޑީޕީގެ ކޮންގްރެސްގައި ވާހަކަފުޅު ދައްކަވަމުން ކުރީގެ ރައީސް އިބްރާހިމް މުޙައްމަދު ސޯލިހް ވަނީ މިހާރުގެ ސަރުކާރުން އިގްތިސާދީ އަދި އިޖުތިމާއީ ދާއިރާތަކުން ގެންގުޅޭ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައި. އެމަނިކުފާނު ވިދާޅުވީ ނިމިދިޔަ ސަރުކާރުން ރަށްރަށުގައި ގާއިމުކުރި އަސާސީ ހިދުމަތްތަކަކީ އިންވެސްޓްމަންޓްތައް ގެނައުމުގެ އަސްލު ބިންގާ ކަމަށް. އަދި މިނިވަން މުއައްސަސާތަކުގެ ބާރު ކަނޑުވާލައި، މުޅި ފަތުރުވެރިކަމުގެ ދާއިރާ ފުނޑާލަމުން ދާކަމަށް ވިދާޅުވި.
އެމްޑީޕީ ކޮންގްރެސް 2026 ގައި ކުރީގެ ރައީސް އިބްރާހިމް މުޙައްމަދު ސޯލިހު އަދި ކުރީގެ ރައީސް މުޙައްމަދު ނަޝީދު | އެމްޑީޕީ ސެކްރިޓޭރިއެޓް
މިހާރު އެންމެ ބޮޑަށް ދެކެވެމުންދާ އެއްވާހަކަ އަކީ ރަސްމާލެ ޕްރޮޖެކްޓްގެ ވާހަކަ ކަމަށާއި، ސިއްރު އެއްބަސްވުމެއްގެ ދަށުން ހިނގާ އެއްވެސް ކަމަކަށް އާއެކޭ ބުނެގެން ނުވާނެ ކަމަށް ވިދާޅުވެ، އެފަދަ ކަންކަމަށް އެމްޑީޕީގެ ސަރުކާރެއްގައި އެއްވެސް ޖާގައެއް ނުދެއްވާނެ ކަމަށް ކުރީގެ ރައީސް އިބްރާހިމް މުޙައްމަދު ސޯލިހް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެމްޑީޕީ ކޮންގްރެސް 2026 ގައި ބުރާސްފަތި ދުވަހުގެ ރޭ ވާހަކަފުޅު ދައްކަވަމުންނެވެ.
ކޮންގްރެސްގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ، މިހާރުގެ ސަރުކާރުން ކުރަމުންދާ ނޭދެވޭ ކަންކަމަކީ ރަނގަޅު ކަންތައްތަކެއްގެ ގޮތުގައި ދެއްކުމަށްޓަކައި ނިމިދިޔަ އެމްޑީޕީ ސަރުކާރުގެ ބައެއް ކަންކަމުގެ ވާހަކަ ދައްކަމުންދާ ކަމަށެވެ. އެގޮތުން ވ. ފޮއްތެޔޮ ފަޅު ހިލޭ ދީފައިވާ ކަމަށް ބުނެ ސަރުކާރުން ދައްކަމުންދާ ވާހަކަތައް ދޮގުކުރައްވައި، އެއީ އެއްވެސް ހަގީގަތެއް ނެތް ވާހަކައެއް ކަމަށް ވިދާޅުވެ ސަރުކާރަށް ސާފު ރައްދެއް ދެއްވި އެވެ.
މީގެއިތުރުން، ކުދި ރަށްރަށުގައި އަސާސީ ހިދުމަތްތައް ގާއިމުކުރުމަކީ ބޭކާރު ހަރަދެއް ކަމަށް ބުނެ އޭރުގެ އިދިކޮޅު ފަރާތްތަކުން ފާޑުކީ ނަމަވެސް، މިއަދު އެ ރަށްރަށަށް އިންވެސްޓްމަންޓްތައް ގެނައުމުގެ އަސްލު ބިންގަލަކަށް ވާނީ އެ ރަށްރަށުގައި ގާއިމުކުރެވުނު ފެނާއި، ނަރުދަމާއާއި، ބަނދަރާއި ކަރަންޓުގެ ހިދުމަތްތައް ކަމުގައި ފާހަގަކުރެއްވި އެވެ.
ރަށްތަކުގައި އަސާސީ ޚިދުމަތްތައް ފޯރުކޮށްދޭން ފެށުމުން އެއީ ބޭކާރު ޚަރަދެއްގެ ގޮތުގައި ދެކި ފާޑު ކިޔަމުން ދިއަ. އެހެން ނަމަވެސް މި ކޮންގްރެސްގައި އެންމެ ހާއްސަ ކަމެއް ދީގެން މި ބާއްވާ އިންވެސްޓްމަންޓް ފޯރަމް، ރަށްފުށުގެ ތަރައްގީގެ ބިންގަލަކީ އެއީ. ރަށްރަށުގައި ފެނާ ނަރުދަމާ އާއި ބަނދަރާ ކަރަންޓާ ލިބެން ހުރީމަ ރަށްރަށުގައި މީހުން އިންވެސްޓް ކުރާނީރައީސް އިބްރާހިމް މުޙައްމަދު ސޯލިހް
އެމްޑީޕީއަށް ވެރިކަން ލިބުނު ކޮންމެ ފަހަރަކު މުޅި ރާއްޖެ ތަރައްގީ ކުރުމަށް ގިނަގުނަ މަސައްކަތްތަކެއް ކުރެވުނުކަން ފާހަގަކުރައްވަމުން އެމަނިކުފާނު ވިދާޅުވީ، ސިއްހަތާއި، ތައުލީމާއި، މީހުން ބިނާކުރުމާއި، ބޯހިޔާވަހިކަމާއި އަދި ދަތުރުފަތުރުގެ ނިޒާމު ކުރިއެރުވުމަށް ބޮޑެތި މަސައްކަތްތަކެއް ކުރެވުނު ކަމަށެވެ. ހާއްސަކޮށް ލާމަރުކަޒީ ނިޒާމު ވަރުގަދަކޮށް، ކޮވިޑް-19 ފަދަ މުޅި ދުނިޔެއަށް ދިމާވި ދަތި އުނދަގޫ ހާލަތުގައިވެސް ގައުމު ހިންގުމުގެ ޒިންމާ ފުރިހަމައަށް އުފުލި ކަމަށް ވިދާޅުވި އެވެ.
"ދިރުވަން ގައުމިއްޔަތެއް ގައުމެއްގައި އޮންނާނީ ވެސް، އަދި ގައުމެއް ދެމިއޮންނާނީ ވެސް އެތަނުގައި ހަމަޖެހިގެން ދިރިއުޅޭ ރައްޔިތެއް ތިބެގެން،" ރައީސް ސޯލިހް ވިދާޅުވި އެވެ.
މިހާރުގެ ސަރުކާރުގެ ސިޔާސަތުތަކަށް ފާޑުވިދާޅުވަމުން އެމަނިކުފާނު ވިދާޅުވީ، މިނިވަން މުއައްސަސާތަކުގެ ބާރު ކަނޑުވާލައި، ތަކެތީގެ އަގު އިންތިހާއަށް އުފުލި، ގެދޮރުވެރިކަމާއި ވަޒީފާގެ ފުރުސަތުތައް ޒުވާނުންނަށް ގެއްލިފައިވާ ކަމަށެވެ. އަދި ވިޔަފާރިވެރިންނާއި، މަސްވެރިންނާއި، ދަނޑުވެރިން އަދި ކޮންސްޓްރަކްޝަން ދާއިރާ މިއަދު އޮތީ ގޮތްހުސްވެފައި ކަމަށާއި، އާމްދަނީ އިތުރުކުރުމުގެ ނަމުގައި މުޅި ޓޫރިޒަމް އިންޑަސްޓްރީ ފުނޑުފުނޑު ކުރަމުންދާ ކަމަށް ވިދާޅުވި އެވެ.
ރައީސް ސޯލިހްގެ ވާހަކަފުޅުގައި އެމްޑީޕީގެ މެންބަރުންނަކީ ހަމައެކަނި ސިޔާސީ ބައެއް ނޫން ކަމަށާއި، މިއީ އެކުގައި ދިގު ދަތުރެއް ކުރި އެއް އާއިލާއެއް ކަމަށް ސިފަކުރެއްވި އެވެ.
މިރޭ އަޅުގަނޑުމެން އެއްވެ މިތިބީ ހަމަ އެކަނި ސިޔާސީ މެންބަރުންގެ ގޮތުގައެއް ނޫން. އަޅުގަނޑުމެން މިތަނަށް އެއްވެ މިތިބީ އެކުގައި ދިގު ދަތުރެއް ކުރި އެއްބައެއްގެ ގޮތުގައި. އެ ދަތުރުގައި އުފާވެރި އެތައް ކާމިޔާބީތަކެއް އަޅުގަނޑުމެންނަށް ލިބުނު. އަދި ދަތި އުނދަގޫ ދުވަސްތަކަކާ ނާކާމިޔާބުތަކެއް ވެސް ލިބުނު. އެ ލިބުނު ކާމިޔާބީތައް އަޅުގަނޑުމެން އެންމެން އެކުގައި ފާހަގަ ކުރިން. އެ ލިބުނު ނާކާމިޔާބީތައް އެކުގަ ތަހައްމަލު ކުރިން. އެހެން ނަމަވެސް މި ދަތުރުގައި އެއް ކަމެއް އަޅުގަނޑުމެން ދޫނުކޮށް ހިފެހެއްޓިން. އެއީ ދިވެހި ރައްޔިތުން ޑިމޮކްރަސީއާ އިންސާފާ އިއްޒަތާ އަމިއްލަ މުސްތަގުބަލް ކަނޑައެޅުމުގެ މިނިވަންކަން ހަމަ ކޮންމެ މީހަކަށް ވެސް ލިބިގެންވާނެ ކަން ގަބޫލު ކުރި ކުރުންރައީސް އިބްރާހިމް މުޙައްމަދު ސޯލިހް
އެ ދަތުރުގައި އުފާވެރި ކާމިޔާބީތަކާއި ދަތި އުނދަގޫ ނާކާމިޔާބީތައް ވެސް ތަހައްމަލު ކުރަން ޖެހުނު ކަމަށާއި، ނަމަވެސް ދިވެހި ރައްޔިތުންގެ ޑިމޮކްރަސީއާއި، އިންސާފާއި، އަދި އަމިއްލަ މުސްތަގުބަލު ކަނޑައެޅުމުގެ މިނިވަންކަން ހޯދައިދިނުމުގެ އަޒުމް ދުވަހަކުވެސް ދޫކޮށްނުލާ ކަމަށް ވިދާޅުވި އެވެ.
