އެޗްޑީސީގެ މުވައްޒަފުންނަށް 2025 ވަނަ އަހަރުގެ ބޯނަސް ދިނުމަށްފަހު އެއްބައި ދިނުމަށް އަންގައިފި
އެޗްޑީސީގެ މުވައްޒަފުންގެ ތެރެއިން ވަޒީފާގައި އެއް އަހަރު ނުވާ މުވައްޒަފުންނަށް އޮޅުމަކުން ބޯނަސްގެ ފުލް ޕޭމަންޓް ދެވުމާ ގުޅިގެން، އޭގެ ތެރެއިން ބައެއް އަނބުރާ ދެއްކުމަށް އެ ކުންފުނިން ވަނީ އަންގާފައި. މިކަމުގެ ސަބަބުން މުވައްޒަފުންނަށް މާލީ ބޮޑެތި ތަކުލީފުތަކެއް ކުރިމަތިވަމުންދާއިރު، އެ ފައިސާ މުސާރައިން ކަނޑާ ގޮތަށް ހަމަޖެއްސުމަށް ނިންމާފައިވާ ކަމަށް މައުލޫމާތު ލިބޭ.
އެޗްޑީސީ އޮފީސް އިމާރާތް. އެ ކުންފުނީގެ އަހަރީ ބޯނަސް ދިން ގޮތާއި މެދު މުވައްޒަފުން ދަނީ ކަންބޮޑުވުންފާޅު ކުރަމުން. | މިހާރު
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުންނަށް 2025 ވަނަ އަހަރުގެ ބޯނަސް ދިނުމަށްފަހު އެއްބައި ދިނުމަށް އަންގައިފި އެވެ.
ރާއްޖެއެމްވީއަށް މައުލޫމާތު ދިން އެޗްޑީސީގެ މުވައްޒަފަކު ބުނީ، 2025 ވަނަ އަހަރުގެ އަހަރީ ބޯނަސް ދީފައިވާ ކަމަށާއި، އެއް އަހަރު ނުވާ މުވައްޒަފުންނަށް ވެސް އެއްކޮށް ބޯނަސްދޭތީ އެ ސުވާލު އުފެއްދި ކަމަށެވެ. ނަމަވެސް ފުލްކޮށް ބޯނަސް ލިބޭ ކަމަށް ބުނެ، އެއް އަހަރު ނުވާ މުވައްޒަފުންނަށް ވެސް ބޯނަސްގެ ގޮތުގައި 18،600 ރުފިޔާ ޖަމާކޮށްފައިވާ ކަމަށް އެ މުވައްޒަފުން ބުންޏެވެ.
ނަމަވެސް އޭގެފަހުން އެއް އަހަރު ނުވާ މުވައްޒަފުންނަށް އެއްކޮށް ބޯނަސް ނުލިބޭ ކަމަށް ބުނެ އީމެއިލް އިން އަންގަމުންދާ ކަމަށާއި، ބޯނަސްގެ އެއްބައި އަނބުރާ ދެއްކުމަށް އަންގާފައިވާ ކަަމަށެވެ. އަދި ބައެއް މުވައްޒަފުންނަށް އެއްފަހަރާ ބޮޑު އަދަދެއް ނުދެއްކޭނެ ކަމަށް ބުނުމުން ކޮންމެ މަހަކު ވެސް މުސާރައިން 2000 ރުފިޔާ ނުވަތަ އެމުވައްޒަފަކަށް ދަތިނުވާނެ ގޮތަކަށް ވަކި އަދަދެއް ކަނޑާ ގޮތަށް އެއްބަސްވުމަށް އަންގާފައިވާ ކަމަށް މުވައްޒަފުން ބުންޏެވެ.
މީގެ އިތުރުން އޭނާ ބުނީ، މިފަދަ މައްސަލަތައް ކުރިމަތިވެގެން ނުވާނެ ކަަމަށާއި، މިކަމުގެ ނޭދެވޭ އަސަރު މަސައްކަތަށް ކުރާ ކަމަށެވެ. އަދި މިއީ މުވައްޒަފުންނަށް ލިބޭ ދެރައެއް ކަމަށް އޭނާ ބުންޏެވެ.
މިހާރު އެއްފަހަރާ ކިހިނެއް 6000 ރުފިޔާ ނޫނީ 9000 ރުފިޔާ ދައްކާނީ. ވަރަށް ދަތިވާނެ. މިކަހަލަ ކަންތައް ކުރާތީ އަސްލު ވަރަށް އުދަނގޫވޭ ދެން. ވަރަށް ބޮޑު ޕްރެޝަރއަކަށް މި ދަނީ މިގޮތަށް މަސައްކަތް ކުރާތަނުން އަމަލު ކުރާތީ.އެޗްޑީސީގެ މުވައްޒަފެއް
އެޗްޑީސީގެ މުވައްޒަފުންގެ 2025 ވަނަ އަހަރުގެ ބޯނަސް ދިނުމަށްފަހު އެއްބައި ދިނުމަށް އަންގާފައިވާއިރު، ބޯނަސް ދިނުން ވެސް ލަސްވެ، އެކަމުގެ ކަންބޮޑުވުން މުވައްޒަފުން ފާޅުކުރި އެވެ.
އާންމުކޮށް އެޗްޑީސީގެ މުވައްޒަފުންނަށް ކޮންމެ އަހަރެއްގެ ވެސް އޯގަސްޓު ހިސާބުގައި އަހަރީ ބޯނަސް ދިން ނަމަވެސް 2025 ވަނަ އަހަރު އަހަނީ ބޯނަސް ދީފައިނުވެ އެވެ.
އެޗްޑީސީގެ މުވައްޒަފުންނަށް 2023 ވަނަ އަހަރާ ހަމައަށް ވެސް އަހަރީ ބޯނަހުގެ ގޮތުގައި ކޮންމެ އަހަރަކު އެއްފަހަރު ޑަބަލް މުސާރަ ލިބެ އެވެ.
އެޗްޑީސީއަކީ ސަރުކާރު ހިއްސާވާ ކުންފުނިތަކުގެ ތެރެއިން އެންމެ ބޮޑު ފައިދާއެއް ވާ އެއް ކުންފުނި ނަމަވެސް 2024 ވަނަ އަހަރުން ފެށިގެން އެ ކުންފުންޏަށް ވަނީ ވަރަށް ބޮޑަށް ގެއްލުމާ ކުރިމަތިލާން ޖެހިފަ އެވެ.
ޕްރައިވެޓަައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) އިން އާންމުކޮށްފައިވާ ސަރުކާރު ކުންފުނިތަކުގެ އަހަރީ ރިޕޯޓުން އެނގޭ ގޮތުގައި އެޗްޑީސީއަށް 2024 ވަނަ އަހަރު ޖުމުލަ އާމްދަނީގެ ގޮތުގައި ލިބުނީ 3.5 ބިލިއަން ރުފިޔާ އެވެ. އެއީ އޭގެ ކުރީ އަހަރު ލިބުނު އާމްދަނީއާ އަޅައިބަލާއިރު 50 އިންސައްތަ ދަށް އަދަދެކެވެ. 2024 ވަނަ އަހަރު އެޗްޑީސީއަށް ސާފު ފައިދާގެ ގޮތުގައި އެއްވެސް މިންވަރެއް ނުލިބޭއިރު، އެ ކުންފުންޏަށް ކުރިމަތިލާން ޖެހިފައި ވަނީ 109 މިލިއަން ރުފިޔާގެ ގެއްލުމަކާ އެވެ. އަދި އެ އަހަރު އަހަރީ ބޯނަސްގެ ގޮތުގައި މުވައްޒަފުންނަށް ދީފައިވަނީ 10،000 ރުފިޔާ އެވެ. އެއީ އެޗްޑީސީގެ ތާރީހުގައި ވެސް މުވައްޒަފުންނަށް ދިން އެންމެ ކުޑަ ބޯނަސް ކަމަށް މުވައްޒަފުން ބުނެ އެވެ.
