އެއް އަހަރުން ނިންމާނެ ކަމަށް ބުނެ 278 މިލިއަން ރުފިޔާއަށް ހަވާލުކުރި ހިޔާ ޓަވަރުގައި ލިފްޓް ހަރުކޮށް ނިންމުން ފާހަގަކުރުމަށް ބޮޑު ރަސްމިއްޔާތެއް ބާއްވަނީ!
ހިޔާ ފްލެޓްތަކުގައި އަލަށް ހަރުކުރި 32 ލިފްޓުގެ މަސައްކަތް ނިންމައި، އެކަން ފާހަގަކުރުމަށް ބާއްވާ ރަސްމިއްޔާތު ޖުލައި 2 ވަނަ ދުވަހުގެ ރޭ ބޭއްވުމަށް ވަނީ ނިންމާފައި. ޗައިނާގެ ކުންފުންޏަކާ ހަވާލުކޮށްގެން 278 މިލިއަން ރުފިޔާ ހޭދަކޮށްގެން ކުރިއަށްގެންދިޔަ މި މަޝްރޫއުގެ އަގު ބޮޑުވުމުން ކޮރަޕްޝަނުގެ ތުހުމަތުތަކެއް އަމާޒުވެފައިވީ ނަމަވެސް، ސަރުކާރުން އެކަމަށް ރަސްމީ ޖަވާބެއް ދީފައެއް ނުވޭ. މި މަޝްރޫއުގެ އަމަލީ މަސައްކަތް އެއް އަހަރު ދުވަހުގެ ތެރޭގައި ނިންމުމަށް ހަވާލުކުރި ނަމަވެސް، ހުރިހާ ޓަވަރެއްގެ ލިފްޓުތައް ބޭނުންކުރަން ފެށިފައިވަނީ މި ޖޫން މަހުގެ ތެރޭގައި.
ހިޔާ ފްލެޓު ޓަވަރު 2ގެ ލިފްޓުތައް. ލިފްޓްތަކަށް މިހާރު ވެސް މައްސަލަތައް ދިމާވާ ކަމަށް ބުނެ ގިނަ ބަޔަކު ޝަކުވާ ކުރޭ. | ރާއްޖެ އެމްވީ
ހިޔާ ޓަވަރުތަކުގައި ލިފްޓު ހަރުކުރުމުގެ މަޝްރޫއު ކުލަ ގަދަކޮށް ފާހަގަކުރުމަށް ރަސްމިއްޔާތެއް ބާއްވަން ނިންމައިފި އެވެ.
މައުލޫމާތު ލިބިފައިވާ ގޮތުގައި މި ރަސްމިއްޔާތު ބާއްވަން ނިންމާފައިވަނީ 02 ޖުލައި 2026 ވާ ބުރާސްފަތި ދުވަހުގެ ރޭ 8:15 ގައި ހުޅުމާލެ ރުއްގަނޑުގަ އެވެ. އަދި ބައެއް މީޑީއާތަކުގައި ރިޕޯޓު ކޮށްފައިވާ ގޮތުގައި މިރަސްމިއްޔާތުގައި ރައީސް ޑރ.މުހައްމަދު މުއިއްޒުގެ އިތުރުން ސަރުކާރުގެ އިސް ބޭފުޅުން ބައިވެރިވެ ވަޑައިގަންނަވަ އެވެ.
މި މަޝްރޫއަކީ ވަރަށް ބޮޑު ކާމިޔާބީއެއް ކަމަށް ސަރުކާރުން ބުނާއިރު، ހިޔާ ފްލެޓް ތަކުގައި ލިފްޓް ހަރުކުރުމުގެ މަސައްކަތް ހަވާލު ކޮށްފައިވަނީ އިންތިހާ އަށް ބޮޑު އަގުގައި އޭގައި ކަރަޕްޝަން އެކުލެވޭ ގޮތަށް ކަމަށް ގިނަ ބަޔަކު ތުހުމަތު ކުރެ އެވެ. ނަމަވެސް މިހާތަނަށް ސަރުކާރުން މި މައްސަލައާ ގުޅޭގޮތުން ޖަވާބެއް ދީފައިނުވެ އެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީއަށް މީގެ ކުރިން އެޗްޑީސީން މައުލޫމާތު ދީފައިވާ ގޮތުގައި އަލަށް ހަރުކުރި 32 ލިފްޓަށް 18 މިލިއަން ޑޮލަރު (278 މިލިއަން ރުފިޔާ) ޚަރަދު ކޮށްފައިވެ އެވެ.
ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޮމްޕެނީ ލިމިޓެޑާ މިމަޝްރޫއު ހަވާލުކުރީ 12 ފެބްރުއަރީ 2024 ގަ އެވެ. 18 އޭޕްރީލް 2024 ގައި އަމަލީ މަސައްކަތް ފަށާފައިވާއިރު، މިމަސައްކަތް އެ ކުންފުންޏާ ހަވާލުކުރީ 1 އަހަރު ދުވަހުގެ ތެރޭގައި ނިންމާ ގޮތަށެވެ.
ނަމަވެސް ހުރިހާ ޓަވަރެއްގައި ލިފްޓް ހަރުކޮށް ނިންމާ ބޭނުން ކުރަން ފެށުނީ މިއަހރު ޖޫން މަހުގެ ތެރޭގަ އެވެ.
