ރަސްމާލެ މަޝްރޫއާ ގުޅޭ އެއްވެސް ކަމެއް އެނގެން ނެތް، ހަމައެކަނި އެނގެނީ "ޝެއިހު" އަކަށް 400 މިލިއަން ޑޮލަރު ދިންކަން: މެންބަރު ޝަމްހީދު
10 އޮކްޓޯބަރު 2026 | ހޮނިހިރު 07:43ރަސްމާލެ މަޝްރޫއުގެ ތަފްސީލުތައް ހާމަނުކުރާތީއާއި، އެ މަޝްރޫއުން ދިވެހި ސަރުކާރަށް ލިބޭ އިންސައްތަ ކުޑަވުމުން މެންބަރު ޑރ. ޝަމްހީދު ކަންބޮޑުވުން ފާޅުކުރައްވައިފި. ރާއްޖޭގެ އިގުތިސާދީ ހާލަތު ހުރި ގޮތުން ބޭރުގެ ފަރާތްތަކަށް ބޮޑެތި އަދަދުތަކުން ފައިސާ ދިނުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވި. މީގެ އިތުރުން، މި މަޝްރޫއުގެ ސަބަބުން ދައުލަތަށް ލިބޭ އާމްދަނީއާ މެދު ވެސް އޭނާ ސުވާލު އުފެއްދެވި
ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ރާއްޖެޓީވީގެ "ޓީވީ ޓޯކް" ޕްރޮގްރާމްގައި ވާހަކަދައްކަވަނީ | ރާއްޖެއެމްވީ
ރަސްމާލެ މަޝްރޫއާ ގުޅޭ އެއްވެސް ކަމެއް އެނގެން ނެތް ކަމަށާއި، ހަމައެކަނި އެނގެނީ "ޝެއިހު" އަކަށް 400 މިލިއަން ޑޮލަރު ދިންކަން ކަމުގައި ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެ އެވެ.
ރާއްޖެޓީވީގެ "ޓީވީ ޓޯކް" ޕްރޮގްރާމްގައި ވާހަކަ ދައްކަވަމުން މެންބަރު ޝަމްހީދު ވިދާޅުވީ، ދިވެހިރާއްޖެ މިހާރު މިއޮތް ހާލަތުގައި ރާއްޖެއަށް ހެޔޮއެދޭ ބަޔަކު 400 މިލިއަން ޑޮލަރު ނަގާފައި ބޭރުގެ ބަޔަކަށް ނުދޭނެ ކަމަށެވެ. އަދި މެންބަރު ޝަމްހީދު ވަނީ ރަސްމާލެ މަޝްރޫއިން ލިބޭ ފައިދާއިން 10 އިންސައްތަ ދިވެހި ސަރުކާރަށް ލިބޭ ގޮތަށް އޮތުމުން ކަންބޮޑުވުން ފާޅުކުރައްވާފަ އެވެ.
އެގޮތުން، މެންބަރު ޝަމްހީދު ވިދާޅުވީ، 10 އިންސައްތައަކީ މާކުޑަ އަދަދެއް ކަމަށާއި 10 އިންސައްތައަކީ ދިވެހިރާއްޖެއަށް ހައްގު މިންވަރު ނޫން ކަމަށެވެ. ހަމައެއާއެކު ބައިނަލްއަގުވާމީ ގޮތުން ދިވެހި ރާއްޖެއިން ދައްކަން ޖެހޭ 15 އިންސައްތަ އޮންނަކަން މެންބަރު ޝަމްހީދު ފާހަގަކުރެއްވި އެވެ.
ރަސްމާލެ މަޝްރޫއާ ގުޅިގެން ހަދަން ނިންމާފައިވާ ގާނޫނުތަކާއި އެ މަޝްރޫއާ ގުޅޭ އެއްވެސް ތަފްސީލެއް ހާމަކޮށްފައިނުވާތީ މެންބަރު ޝަމްހީދު ވަނީ ކަންބޮޑުވުން ފާޅުކުރައްވާފަ އެވެ. އެގޮތުން ދިވެހިރާއްޖެއަށް އެންމެ ގިނައިން ޔަގީން ކަމާއެކު ފައިސާ ލިބޭ ތަނަކަށް އޮންނަނީ އެއަރޕޯޓުގެ ޑިޕާޗަރ ޗާޖްއިންކަން ފާހަގަކުރައްވާ މެންބަރު ޝަމްހީދު ވިދާޅުވީ ރަސްމާލެގައި ދިރިއުޅެން އަންނަ ބޭރުގެ ފަރާތްތަކަކީ ވިސާ ހޯލްޑަރުން ކަމުގައި ވާނަމަ ގާނޫނު ހަދާއިރު އެވެސް ފްރީ ވެދާނެ ކަމަށާއި، އެރައިވަލް ޗާޖަސް ވެސް ފްރީ ވެދާނެ ކަމަށެވެ.
އަޅުގަނޑުމެންނަކަށް ނޭނގޭ މިހާރު އެ ކުރަން އުޅޭ ގޮތެއް ވެސް. އެނގޭ ހަމަ އެކަނި އެންމެ ކަމެއް އޮތީ ދިވެހި ރައްޔިތުންގެ 300 400 މިލިއަން ޑޮލަރު މި ޝެއިހަށް ދީފިކަން. ދޭން އުޅޭކަން. އަޅުގަނޑު މި ކިޔަނީ ދިވެހި ރައްޔިތުން މިހާލުގައި ތިއްބައި ރައްޔިތުންގެ 400 މިލިއަން ޑޮލަރު ޝެއިހަށް އަޅުގަނޑުމެން މިދެނީ އެއީ އަޅުގަނޑަށް ވިސްނޭ އެއްޗަކީ. އެހެންވީމަ ޝެއިހަށް 400 މިލިއަން ޑޮލަރު ދީފައި އަޅުގަނޑު މިބުނަނީ ޝެއިހު އޭ ޝެއިހު އައިސްފައި މިތާ އިންވެސްޓް ކޮށްދޭށޭ ދެން އަޅުގަނޑުމެން ނިކަމެތި ބައެއްގެ އަތުން 400 މިލިއަން ޑޮލަރު ނަގާއިރުގައި މިރާއްޖެ މިއޮތް ހާލަތުގައި މިރާއްޖެއަށް ހެޔޮ އެދޭ ބަޔަކު އަޅުގަނޑަކަށް ހިޔެއް ނުވޭ ރިކުއެސްޓް ކުރާނެ ހެންޑރ. އަހުމަދު ޝަމްހީދު
މީގެ އިތުރުން، މެންބަރު ޝަމްހީދު ވިދާޅުވީ 1 މިލިއަން ޓޫރިސްޓުން މި މަޝްރޫއުގެ ސަބަބުން އަންނަ ކަމަށް ބުނާއިރު 1 މިލިއަން ފަތުރެވިންގެ އަތުން މިހާރު ދިވެހިރާއްޖޭގައި އޮތް ފަތުރުވެރިކަމުގެ ގާނޫނުގެ ތެރެއިން ލިބޭ އާމްދަނީއެއް ލިބޭނެ ކަމެއް ޔަގީން ކަމާއެކު ނުބުނާ ކަމަށެވެ.
ދިވެހި ރައްޔިތުންގެ ފައިސާ ބޭރުގެ ޝެއިހަކަށް ދީގެން ނުވާނެ ކަމަށާއި ރަސްމާލެ މަޝްރޫއުގެ ދަށުން ދެނީ ހަމައެކަނި ބިމެއް ނޫން ކަމަށް މެންބަރު ޝަމްހީދު ވިދާޅުވި އެވެ. އަދި މިއީ ބަލައިގަނެވޭނެ ކަމެއް ނޫން ކަމަށް ވެސް ވިދާޅުވި އެވެ.
