ޕާކިސްތާނުގައި މަދަރުސާއެއްގެ ފުރާޅު ވެއްޓި 27 ދަރިވަރުންނާއި މުދައްރިސަކު މަރުވެއްޖެ
15 އޮކްޓޯބަރު 2026 | ބުރާސްފަތި 07:39ޕާކިސްތާނުގެ ޕެޝާވަރުގައި ހުންނަ އަމިއްލަ ފަރާތަކުން ހިންގާ މަދަރުސާއެއްގެ ފުރާޅު ވެއްޓި ހިނގި ހާދިސާގައި ގިނަ އަދަދެއްގެ ކުދިން މަރުވެ، އިތުރު ބަޔަކު ވަނީ ޒަޚަމުވެފައި. އިމާރާތުގެ ބައިތަކުގެ ދަށުގައި ތާށިވި ކުދިން ސަލާމަތްކުރުމުގެ މަސައްކަތް ކަމާބެހޭ ފަރާތްތަކުން ކުރަމުންދާއިރު، މި ހާދިސާގައި މަރުވި މީހުންގެ އަދަދު އިތުރުވުން އެކަށީގެންވާ ކަމަށް އިދާރާތަކުން ބުނޭ
ޕާކިސްތާނުގެ ޕެޝާވަރުގައި ހުންނަ އަމިއްލަ ފަރާތަުން ހިންގާ މަދަރުސާއެއްގެ ފުރާޅު ވެއްޓުނު ހާދިސާގައި ޒަޚަމުވި ދަރިވަރުން ހަސްފަތާލަށް ގެންދަން މަސައްކަތް ކުރަނީ | ރޮއިޓަރސް
ޕާކިސްތާނުގެ ޕެޝާވަރު ސިޓީގައި މަދަރުސާއެއްގެ ކިލާހެއްގައި ކިޔަވައިދެމުން ދަނިކޮށް އެ މަދަރުސާގެ ފުރާޅު ވެއްޓުމުގެ ސަބަބުން، އުމުރުން 13 އަހަރުން ދަށުގެ 27 ދަރިވަރުންނާއި މުދައްރިސަކު ބުރާސްފަތި ދުވަހު މަރުވެއްޖެ އެވެ. ޕެޝާވަރުގެ އިދާރާތަކުން ބުނީ، މިހާދިސާގައި މަރުވި މީހުންގެ އަދަދު އިތުރުވާނެ ކަމަށް ބެލެވޭ ކަމަށެވެ.
މި ހާދިސާގައި ވެއްޓުނު ފުރާޅުގެ ބައިތަކުގެ ދަށުވި ކުދިންގެ ތެރެއިން ގިނަ ކުދިން ލޭޑީ ރެޑިންގ ހަސްފަތާލަށް ގެންދިޔަ އިރުވެސް މަރުވެފައިވާ ކަމަށާއި، މި ހާދިސާގައި ޒަޚަމުވި އިތުރު 20 މީހަކަށް ފަރުވާދެމުންދާ ކަމަށް އެ ހަސްފަތާލުގެ ތަރުޖަމާނު މުޙައްމަދު އާސިމް ވިދާޅުވި އެވެ.
އަމިއްލަ ފަރާތަކުން ހިންގާ އަލް-ޚައިރު އެޑިޔުކޭޝަން ސެންޓަރުގެ ނަން ކިޔާ މި މަދަރުސާ ހުންނަނީ ޕެޝާވަރު ސިޓީގެ އުތުރުގައި އޮންނަ ދީރު ސަރަހައްދުގަ އެވެ. އަދި, މަރުވެފައިވާ މީހުންގެ ހަށިތަކާއި ޒަޚަމުވެފައިވާ މީހުން ހަސްފަތާލުތަކަށް ގެންދިއުމުގެ މަސައްކަތް މީހުން ސަލާމަތްކުރާ ޓީމުތަކުން ކުރަމުންދާ ކަމަށް ސަރުކާރުގެ އޮފިޝަލް ބިލާލް ފާއިޒީ ވިދާޅުވި އެވެ.
މި އިމާރާތުގެ މަތީ ފަންގިފިލާއެއްގެ ފުރާޅު ފުރަތަމަ ފަންގިފިލާގެ ފުރާޅުގެ މައްޗަށް ވެއްޓި، އޭގެ ސަބަބުން ކިލާސްތަކުގައި ތިބި ދަރިވަރުންގެ ބޯ މައްޗަށް އެ ފުރާޅު ވެއްޓުނީ ކަމަށް މީހުން ސަލާމަތްކުރާ ޓީމުގެ އޮފިޝަލަކު ވިދާޅުވި އެވެ. އެމްބިއުލާންސްތައް އެ ސަރަހައްދަށް ދާ މަންޒަރާއި، ވެއްޓިފައިވާ އިމާރާތުގެ ބައިތަކުގެ ދަށުން ލެއިން ތަތްތެޅިފައިވާ ދަރިވަރުން ނެރޭ މަންޒަރު ޓީވީތަކުން ވަނީ ދައްކާފަ އެވެ.
"މިހާތަނަށް ގާތްގަނޑަކަށް 45 ކުދިން ވެއްޓިފައިވާ އިމާރާތުގެ ބައިތަކުގެ ދަށުން އަޅުގަނޑުމެން ނެރެފިން،" ޑިސްޓްރިކްޓް އިމަޖެންސީ އޮފިސަރު އިފްތިޚާރު ޚާން ވިދާޅުވި އެވެ. އަދި, އިމާރާތުގެ ބައިތަކުގެ ދަށުގައި އިތުރު ކުދިން ތާށިވެފައިވާ ކަމުގެ ރިޕޯޓުތައް ލިބެމުންދާ ކަމަށް އޭނާ ވިދާޅުވި އެވެ.
މަސްދަރު: ރޮއިޓަރސް
