ކޮޅުފުށީ ކައުންސިލުން 12 ބިމެއް 50 އަހަރަށް ކުއްޔަށް ދޫކޮށްފައި ވަނީ ދައުލަތުގެ މާލިއްޔަތު ގަވާއިދާ އެއްގޮތަކަށް ނޫން: އޮޑިޓް ރިޕޯޓް
12 ސެޕްޓެމްބަރު 2026 | ހޮނިހިރު 12:23މ. ކޮޅުފުށިން ގެސްޓްހައުސް އެޅުމަށް 12 ބިމެއް ދޫކޮށްފައިވަނީ މާލީ ގާބިލުކަން ނެތް ފަރާތްތަކަކަށް ކަމަށާއި، މިއީ މާލިއްޔަތު ގަވާއިދާ ހިލާފު ކަމެއް ކަމަށް އޮޑިޓް ރިޕޯޓުގައި ފާހަގަކޮށްފި. އެއްބަސްވުމާ އެއްގޮތަށް މަސައްކަތް ކުރިއަށް ނުދާއިރު ކައުންސިލުން ފިޔަވަޅު އަޅާފައި ނުވާތީ، މުއްދަތަށް މަސައްކަތް ނުނިމި ގެއްލުންވުމުގެ ފުރުސަތު އޮތް ކަމަށްވެސް އޮޑިޓް އޮފީހުން ބުނޭ
ރައީސް ޑރ. މުހައްމަދު މުއިއްޒު، ކޮޅުފުށީ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީއާ ބައްދަލުކުރެއްވުން | ރައީސް އޮފީސް
މ. ކޮޅުފުށީ ކައުންސިލުން 12 ބިމެއް 50 އަހަރަށް ކުއްޔަށް ދޫކޮށްފައި ވަނީ ދައުލަތުގެ މާލިއްޔަތު ގަވާއިދާ އެއްގޮތަށް ނޫން ކަމަށް އޮޑިޓަރ ޖެނެރަލްގެ އޮފީހުން ބުނެފި އެވެ.
އެ އޮފީހުން އާންމުކޮށްފައިވާ ކޮޅުފުށީ ކައުންސިލްގެ އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ ދައުލަތުގެ މާލިއްޔަތުގެ ގަވާއިދުގައި ބީލަންތައް އިވެލުއޭޓް ކުރަންވާނީ ބީލަން ފޮތުގައި ނުވަތަ މައުލޫމާތު ދިން ކަރުދާހުގައި ނުވަތަ އިއުލާނުގައި އެ ބީލަމެއް އިވެލުއޭޓް ކުރުމަށް ބަޔާންކޮށްފައިވާ ކްރައިޓީރިޔާއާ އެއްގޮތަށް ކަމަށް ބަޔާން ކޮށްފައިވާ ކަމަށެވެ. ނަމަވެސް ކޮޅުފުށީ ކައުންސިލްގެ އިދާރާ އިން ފަތުރުވެރިކަމުގެ ބޭނުމަށް ގެސްޓްހައުސް ތަރައްގީ ކުރުމަށްޓަކައި 2024 ވަނަ އަހަރު 5،00 އަކަފޫޓުގެ 12 ބިމެއް 50 އަހަރުގެ މުއްދަތަށް ކުއްޔަށް ދޫކުރުމުގެ ބައެއް ކަންކަން ކުރިއަށް ގެންގޮސްފައި ވަނީ ދައުލަތުގެ މާލިއްޔަތުގެ ގަވާއިދާ އެއްގޮތަށް ނޫން ކަމަށް އެ ރިޕޯޓުގައި ބުނެފައިވެ އެވެ.
އެގޮތުން ކައުންސިލްގެ އިދާރާ އިން ގެސްޓްހައުސް އެޅުމަށް ބިން ކުއްޔަށް ދޫކުރުމަށް ކުރި އިއުލާނުގެ މައުލޫމާތު ކަރުދާހުގެ 5 ވަނަ މާއްދާގެ 1 (ޕްރީ ރިކުއިޒިޓްސް) ގައި ކޮންމެ ބިމަކަށް ކުރަންޖެހޭ އެންމެ ކުޑަ އިންވެސްޓްމަންޓްގެ އަދަދަކީ 12،500،000 (ބާރަ މިލިއަން ފަސް ލައްކަ) ރުފިޔާ ކަމާއި ބީލަން ހުށަހަޅާ ފަރާތުގެ މާލީ ގާބިލުކަން ސާބިތު ކޮށްދިނުމަށްޓަކައި ޖުމްލަ އިންވެސްޓްމަންޓްގެ މަދުވެގެން 20 އިންސައްތައާ އެއްވަރުގެ ރައުސްމާލު ހުރިކަމުގެ ލިޔެކިޔުން ހުށަހަޅަން ޖެހޭނެ ކަމަށް ބަޔާން ކޮށްފައިވާ ކަމަށް ރިޕޯޓުގައިވެ އެވެ.
އެ ރިޕޯޓުގައި ބުނީ އެހެން ކަމުން ބީލަން ހުށަހަޅާ ކޮންމެ ފަރާތަކުން ވެސް އެ ފަރާތަކުން އެދޭ ކޮންމެ ބިމަކަށް މަދުވެގެން 2،500،000 ( ދެ މިލިއަން ފަސް ލައްކަ) ރުފިޔާ ރައުސްމާލުގެ ގޮތުގައި ހުރިކަން ސާބިތުކޮށްދޭން ޖެހޭ ކަމަށެވެ. އަދި މި ބީލަމަށް ދެ ފަރާތަކުން ބީލަން ހުށަހަޅާފައިވާއިރު އެ ދެފަރާތަކީ ކައުންސިލްގެ އިދާރާ އިން ހުށަހަޅާފައިވާ މައުލޫމާތު ކަރުދާހުގައި ބަޔާން ކޮށްފައިވާ ޝަރުތުތައް ފުރިހަމަ ވާ ފަރާތްތަކެއް ނޫން ކަން ފާހަގަ ވެފައިވާ ކަމަށް ވެސް އެ އޮފީހުން ބުންޏެވެ.
އޮޑިޓް އޮފީހުން ބުނީ އެހެން ނަމަވެސް ކައުންސިލްގެ އިދާރާ އިން ވަނީ އެ ފަރާތްތަކަށް ބިން ކުއްޔަށް ދޫކޮށްފައި ކަމަށާ މިއީ ދައުލަތުގެ މާލިއްޔަތު ގަވާއިދުގައި ބަޔާން ކުރާ ހަމަހަމަކަމާއި ވާދަވެރިކަމުގެ އުސޫލުތަކާ ޚިލާފުކަމެއް ކަމަށެވެ.
އޭގެ އިތުރުން ކުއްޔަށް ދޫކޮށްފައިވާ ބިންތަކުގެ މަސައްކަތް ކުރިއަށް ގޮސްފައިވާ މިންވަރު އޮޑިޓްގެ ތެރޭގައި ބަލާފައިވާކަން ފާހަގަކޮށް އެ ރިޕޯޓުގައި ބުނީ ދެ ބިން ކުއްޔަށް ހިފާފައިވާ ފަރާތުން ގެސްޓްހައުސް އިމާރާތް ކުރުމުގެ މަސައްކަތް ފަށާފައިވާ ކަމަށެވެ. އަދި 10 ބިން ކުއްޔަށް ހިފާފައިވާ ފަރާތުން އެގްރީމަންޓްގެ ދަށުން ފުރިހަމަ ކުރަން ޖެހޭ ބިމުގެ ސަރވޭ އާއި ވެލީގެ ތަހުލީލާއި ފެނުގެ ފެންވަރާއި ޔުޓިލިޓީ އެސެސްމަންޓާއި ގެސްޓްހައުސްގެ ކުރެހުމާއި އައުޓްލެޓް އަދި ޕަބްލިކް އޭރިއާގެ ޑިޒައިންގެ އިތުރުން އެންވަޔަރަމަންޓް އިމްޕެކްޓް އެސެސްމަންޓް ފަދަ ކަންތައްތައް 12 ޖުލައި 2026 ގެ ނިޔަލަށް ފުރިހަމަ ކޮށްފައި ނުވާ ކަމަށް ކައުންސިލްގެ އިދާރާއިން މައުލޫމާތުދީފައިވާ ކަމަށް ވެސް އެ ރިޕޯޓުގައި ފާހަގަކޮށްފައިވެ އެވެ.
އޮޑިޓް ރިޕޯޓުގައި ބުނީ ދެ ފަރާތުން ވެފައިވާ އެއްބަސްވުމާ އެއްގޮތަށް ކުރަންޖެހޭ ކަންކަން ފުރިހަމަކޮށްފައި ނުވި ނަމަވެސް ކައުންސިލްގެ އިދާރާ އިން މިކަމަށް އެއްވެސް ފިޔަވަޅެއް އަޅާފައި ނުވާ ކަމަށެވެ. އަދި އެއްބަސްވުމާ އެއްގޮތަށް މަސައްކަތް ކުރިއަށް ނުދާ ހާލަތްތަކުގައި ގަވާއިދުން މަޝްވަރާކޮށް، ފިޔަވަޅު އަޅަމުން ނުދާނަމަ، މަސައްކަތް ނިންމުމަށް އެއްބަސްވެފައިވާ މުއްދަތަށް މަސައްކަތް ނުނިމި ގެއްލުން ވުމަކީ އެކަށީގެންވާ ކަމެއް ކަމަށެވެ.
