ފަލާހުގެ މާލީ ބަޔާން: ޑޮލަރު ކުންފުންޏަކާއި މިލިއަނުން އާމްދަނީ، އަދި ހުޅުމާލެ އިން 21 މިލިއަން ރުފިޔާގެ ބިމެއް!
29 ސެޕްޓެމްބަރު 2026 | އަންގާރަ 14:39މަޖިލީހުގެ މެޖޯރިޓީ ލީޑަރު އިބްރާހީމް ފަލާހު މިދިޔަ އަހަރު ޑޮލަރު ގަނެވިއްކާ ކުންފުންޏަކާއި ކޮންސްޓްރަކްޝަން ކުންފުންޏެއް އުފައްދަވާފައިވާކަން އޭނާގެ މާލީ ބަޔާނުން ހާމަވެއްޖެ. މީގެ އިތުރުން ހުޅުމާލެއިން 21 މިލިއަން ރުފިޔާގެ ބިމެއް ބައްލަވައިގަތުމާއި، ބޭންކުން 15 މިލިއަން ރުފިޔާގެ ލޯނެއް ނަންގަވާފައިވާކަން ވެސް މި ބަޔާނުން އެނގޭ. އޭނާއަށް މިދިޔަ އަހަރު ވިޔަފާރި އާއި ކުލީގެ ގޮތުގައި 4.6 މިލިއަނަށްވުރެ ގިނަ ރުފިޔާގެ އާމްދަނީއެއް ލިބިވަޑައިގެންފައިވޭ
ޕީއެންސީގެ ޕީޖީ ލީޑަރު އިބްރާހީމް ފަލާހު | ޕީއެންސީ
ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ވެރިކަން ކުރާ ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދަވާފައިވާކަން އޭނާގެ މާލީ ބަޔާނުން ހާމަވެއްޖެ އެވެ.
މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާންތައް މަޖިލީހުގެ ވެބްސައިޓުގައި ޝާއިއުކޮށްފައިވާއިރު، ފަލާހުގެ މާލީ ބަޔާނުން އޭނާގެ ވިޔަފާރިތަކާއި މާލީ ހާލަތުގެ މުހިންމު ތަފްސީލުތަކެއް ވަނީ ހާމަވެފަ އެވެ.
މާލީ ބަޔާނުގައިވާ ގޮތުން، މިދިޔަ އަހަރުގެ ތެރޭގައި ފަލާހު ވަނީ އައު ދެ ކުންފުންޏެއް ރަޖިސްޓްރީކޮށް އުފައްދަވާފަ އެވެ. އެއީ ޑޮލަރު ގަނެވިއްކުމުގެ ވިޔަފާރި ކުރުމަށް "ސަން ކަރަންސީ އެކްސްޗޭންޖު" ގެ ނަމުގައި އުފެއްދެވި ކުންފުންޏަކާއި، ކޮންސްޓްރަކްޝަން މަސައްކަތްތަކަށް ހާއްސަކޮށްގެން އުފެއްދެވި "ސަން ކްރާފްޓް ކޮންސްޓްރަކްޝަން" އެވެ. މި ދެ ކުންފުނީގެ ވެސް 90 އިންސައްތަ ހިއްސާ އޮންނަނީ ފަލާހުގެ ނަމުގަ އެވެ. މީގެ އިތުރުން، މި ދެ ކުންފުނީގެ ބޭރުން ވެސް އިތުރު ތިން ކުންފުންޏެއްގެ ހިއްސާދާރެއްގެ ގޮތުގައި އޭނާ ހިމެނިވަޑައިގަންނަވާކަން މާލީ ބަޔާނުން އެނގެ އެވެ.
އާމްދަނީ އަށް ބަލާއިރު، މަޖިލީހުގެ މެންބަރެއްގެ ހައިސިއްޔަތުން މުސާރައިގެ ގޮތުގައި މިދިޔަ އަހަރު ފަލާހުއަށް 990،000 ރުފިޔާ ލިބިވަޑައިގެންފައިވެ އެވެ. އަދި ވިޔަފާރީގެ ނަފާގެ ގޮތުގައި މިދިޔަ އަހަރު 1.8 މިލިއަން ރުފިޔާ ލިބިވަޑައިގެންފައިވާއިރު، ތަންތަން ކުއްޔަށް ދީގެން ކުލީގެ ގޮތުގައި 2.8 މިލިއަން ރުފިޔާގެ އާމްދަނީއެއް އޭނާއަށް ލިބިވަޑައިގެންފައިވެ އެވެ. މާލީ ކަންކަން ހިންގެވުމުގެ ތެރެއިން، މިދިޔަ އަހަރުގެ ތެރޭގައި ބޭންކް އޮފް މޯލްޑިވްސް އިން 15 މިލިއަން ރުފިޔާގެ ބޮޑު ލޯނެއް ވެސް އޭނާ ނަންގަވާފައިވާކަން ބަޔާނުގައި ފާހަގަކޮށްފައިވެ އެވެ.
މީގެ އިތުރުން، ފަލާހުގެ ނަމުގައި ޖުމްލަ ފަސް ބިމެއް މިލްކުވެފައިވާކަން މާލީ ބަޔާނުން ދައްކަ އެވެ. އޭގެ ތެރޭގައި އެންމެ ފާހަގަކޮށްލެވެނީ މިދިޔަ އަހަރު 21 މިލިއަން ރުފިޔާ ހަރަދުކޮށްގެން ހުޅުމާލެ އިން ބައްލަވައިގަނެފައިވާ ބިމެކެވެ. މިއާ އެކު، މާލެއިން ހަތަރު މިލިއަން ރުފިޔާއަށް ބައްލަވައިގަނެފައިވާ "މ. އަސުރުކުރި" ގޭގެ އިތުރުން، ރަށު ފެންވަރުގައި މިލްކުވެފައިވާ އިންނަމާދޫ ފަލަކް، ފަތް، އަދި އަސުރުހިޔާ ގެ އެވެ.
