މަހިބަދޫ ކައުންސިލުން ކުއްޔަށް ދޫކުރާ ތަންތަނުގެ ރަޖިސްޓްރީ ގަވާއިދާއި އެއްގޮތަށް ބަލަހައްޓާފައެއް ނުވޭ: އޮޑިޓް އޮފީސް
12 ޖުލައި 2026 | އާދީއްތަ 12:07އދ. މަހިބަދޫ ކައުންސިލުން ކުއްޔަށް ދޫކުރާ ތަންތަނުގެ ރަޖިސްޓްރީ މާލިއްޔަތު ގަވާއިދާ އެއްގޮތަށް ބަލަހައްޓާފައި ނުވާތީ، ލިބެންޖެހޭ ފައިސާގެ ހިސާބުތައް ކަށަވަރުނުވާކަން އޮޑިޓް ރިޕޯޓުން ވަނީ ހާމަވެފަ. އެހެންކަމުން ކުލީގެ މައުލޫމާތު ފުރިހަމަކޮށް، ގަވާއިދުން ފައިސާ ނުދައްކާ ފަރާތްތަކާ މެދު ފިޔަވަޅު އެޅުމަށް އޮޑިޓް އޮފީހުން ވަނީ އެ ކައުންސިލަށް އަންގާފަ.
އދ. މަހިބަދޫ: ކުލީގެ ގޮތުގައި ލިބެންޖެހޭ ހުރިހާ ފައިސާއެއް ގަވާއިދުން ލިބޭތޯ ބެލުމާއި، ފައިސާ ނުދައްކާ ފަރާތްތަކާ މެދު މާލިއްޔަތުގެ ގަވާއިދުގެ 5.16 ވަނަ މާއްދާގައި ބަޔާން ކޮށްފައިވާ ފިޔަވަޅުތައް އެޅުމަށް އޮޑިޓް އޮފީހުން ވަނީ އަންގާފަ | ސޯޝަލް މީޑިއާ
އދ. މަހިބަދޫ ކައުންސިލުން ކުއްޔަށް ދޫކުރާ ތަންތަނުގެ ރަޖިސްޓްރީ މާލިއްޔަތުގެ ގަވާއިދާއި އެއްގޮތަށް ބަލަހައްޓާފައެއް ނުވާ ކަމަށް އޮޑިޓް އޮފީހުން ބުނެފި އެވެ.
އެ އޮފީހުން އާންމުކޮށްފައިވާ އަރިއަތޮޅު ދެކުނުބުރީ މަހިބަދޫ ކައުންސިލްގެ އިދާރާގެ 2022 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނީ ދައުލަތުގެ މާލިއްޔަތުގެ ގަވާއިދުގެ 11.31 ވަނަ މާއްދާގެ (ށ) ގައި ބަޔާންކޮށްފައިވަނީ ކުއްޔަށް ދޫކުރާ ތަންތަނާއި ކުއްޔަށް ހިފާ ތަންތަނުގެ މައުލޫމާތު މައުލޫމާތުގެ ނަމޫނާއާ އެއްގޮތްވާ ގޮތުގެ މަތިން ވަކި ދެ ރަޖިސްޓްރީއެއް ބަލަހައްޓަންވާނެ ކަމަށް ބަޔާންކޮށްފައިވާ ކަމަށެވެ.
އެގޮތުން އެ ރަޖިސްޓްރީގައި ތަނުގެ ނަމާއި، އެޑްރެސް ކުއްޔަށް ދޫކުރި ނުވަތަ ހިފި ފަރާތް، ކުލި (މަހަކަށް)، ކުއްޔަށް ދޫކުރި ނުވަތަ ހިފި ތާރީޚު ކުލި ލިބުނު ތާރީޚާއި، ފައިސާ ބަލައިގަތް ރަސީދު ނުވަތަ ބިލު ނަންބަރާ ލިބުނު ފައިސާގެ އަދަދާއި، ކުލި ދެއްކި ތާރީޚާއި، ވައުޗަރ ނަންބަރު، ކުލީގެ ފައިސާ ޖަމާކުރެވޭ އެކައުންޓް ނަންބަރު، ކުއްޔަށް ދިން ނުވަތަ ހިފި ތަން ދޫކޮށްލި ތާރީޚު، އިތުރު ބަޔާން (ކުރެވޭ އެގްރީމަންޓާ ގުޅިގެން އެގްރީމެންޓުގެ މުއްދަތާއި މާއްދާތަކަށް ގެނެވޭ ބަދަލު) އަދި ކުއްޔަށް ދޫކުރި ނުވަތަ ހިފި ތަނުގެ އިންވެންޓްރީ ހިމަނަންވާނެ ކަމަށް މި މާއްދާގައި ބަޔާންކޮށްފައިވާ ކަމަށެވެ.
ނަމަވެސް އަރިއަތޮޅު ދެކުނުބުރީ މަހިބަދޫ ކައުންސިލްގެ އިދާރާ އިން ކުއްޔަށް ދޫކުރާ ތަންތަނުގެ ރަޖިސްޓްރީ ބަލަހައްޓާފައިވީ ނަމަވެސް އެ މާއްދާގައި ބަޔާންކޮށްފައިވާ ގޮތަށް ކުއްޔަށް ދޫކުރާ ތަންތަނުގެ މައުލޫމާތު ފުރިހަމަ ކޮށް، ކުލިދައްކާ ޝެޑިއުލް އަދާހަމަ ކޮށްފައި ނުވާކަން އެ ރިޕޯޓުގައި ފާހަގަކޮށްފައިވެ އެވެ.
އެހެންކަމުން ކުލީގެ ގޮތުގައި 2022 ވަނަ އަހަރުގެ ނިޔަލަށް ލިބެންޖެހޭ ހުރިހާ ފައިސާ އެއް ލިބިފައިވާ ކަމެއް އަދި ލިބެންޖެހޭ ފައިސާގެ ތެރެއިން ނުލިބި ހުރި އަދަދު ކަށަވަރު ކުރެވިފައި ނުވާ ކަމަށާ ގަވާއިދުން ކުލި ނުދައްކާ ފަރާތްތަކަކަށް އެއްބަސްވުމާ އެއްގޮތަށް ފިޔަވަޅު އަޅާފައިވާކަން އެނގެން ނެތް ކަމަށް ވެސް އޮޑިޓް އޮފީހުން ވަނީ ބުނެފަ އެވެ.
އެ އޮފީހުން ބުނީ އެހެންކަމުން ދައުލަތުގެ މާލިއްޔަތު ގަވާއިދުގެ 12.13 ވަނަ މާއްދާގެ (ށ) ގައި ބަޔާން ކޮށްފައިވާ ގޮތަށް ކުއްޔަށް ދޫކުރާ ތަންތަނުގެ މައުލޫމާތު ކަމާގުޅޭ ނަމޫނާއާ އެއްގޮތަށް ބެލެހެއްޓުމަށް ކައުންސިލަށް އަންގާ ކަމަށެވެ. އަދި ކުލީގެ ގޮތުގައި ލިބެންޖެހޭ ހުރިހާ ފައިސާއެއް ގަވާއިދުން ލިބޭތޯ ބެލުމާއި، ފައިސާ ނުދައްކާ ފަރާތްތަކާ މެދު މާލިއްޔަތުގެ ގަވާއިދުގެ 5.16 ވަނަ މާއްދާގައި ބަޔާން ކޮށްފައިވާ ފިޔަވަޅުތައް އެޅުމަށް އަންގާ ކަމަށް ވެސް އޮޑިޓް އޮފީހުން ވަނީ ބުނެފަ އެވެ.
