އިންނަމާދޫގެ ކުނިކޮށީގެ ވަށާފާރުގެ މަސައްކަތަށް ކައުންސިލުން އެޑްވާންސަށް 1 ލައްކަ އަށް ވުރެ ގިނަ ރުފިޔާ ކޮންޓްރެކްޓަރަށް ދިނީ ގަވާއިދާ ޚިލާފަށް: އޮޑިޓް
ރ. އިންނަމާދޫ ކުނިކޮށީގެ ވަށާފާރު ރޭނުމުގެ މަސައްކަތް އަލް އަމީން އިންވެސްޓްމަންޓާ ހަވާލުކުރުމުގައި މާލިއްޔަތު ގަވާއިދާ ހިލާފަށް 15 އިންސައްތައަށް ވުރެ ގިނައިން އެޑްވާންސް ފައިސާ ދޫކޮށްފައިވާކަން އޮޑިޓް ރިޕޯޓުން ވަނީ ހާމަވެފަ. މަސައްކަތުގެ ފެންވަރު ދަށްވުމާއި މުއްދަތަށް ނުނިމުމުގެ ސަބަބުން އެއްބަސްވުން ބާތިލުކުރިއިރު، ޕާފޯމަންސް ގެރެންޓީ އާއި ރިޓެންޝަން ފައިސާ ނަގާފައި ނުވާތީ ދައުލަތަށް 1.8 ލައްކައަށް ވުރެ ގިނަ ރުފިޔާގެ ގެއްލުން ވެފައިވާކަން އޮޑިޓް އޮފީހުން ފާހަގަކުރޭ. އެހެންކަމުން މި މަސައްކަތް މިހާރު ވަނީ އިތުރު ހަރަދަކާއެކު އެހެން ކުންފުންޏަކާ ހަވާލުކޮށްފަ.
ރ. އިންނަމާދޫ ކައުންސިލާ އެކު ރައީސް ޑރ. މުހައްމަދު މުއިއްޒު | ރައީސް އޮފީސް
ރ. އިންނަމާދޫ ކުނިކޮށީ ވަށާފާރު ރޭނުމުގެ މަސައްކަތް ހަވާލުކުރުމުގައި އާއި އެ މަސައްކަތް ކުރިއަށް ގެންދިއުމުގައި ގިނަ މައްސަލަތަކެއް ފާހަގަކުރެވިފައިވާ ކަމަށް އޮޑިޓް އޮފީހުން ބުނެފި އެވެ.
އެ އޮފީހުން އާންމު ކޮށްފައިވާ މާޅޮސްމަޑުލު އުތުރުބުރީ އިންނަމާދޫ ކައުންސިލް އިދާރާގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ ކައުންސިލްގެ އިދާރާ އިން ރ. އިންނަމާދޫ ކުނިކޮށީގެ ވަށާފާރު ރޭނުމުގެ މަސައްކަތް 90 ދުވަހުގެ ތެރޭގައި ނިންމާ ގޮތަށް 720،684 ރުފިޔާ އަށް އަލް އަމީން އިންވެސްޓްމަންޓާ 6 އޭޕްރީލް 2023 ގައި ހަވާލު ކޮށްފައިވާ ކަމަށެވެ. ނަމަވެސް އެއްބަސްވުމުގެ މުއްދަތު ހަމަވިއިރު ވެސް މަސައްކަތް ނިންމާފައިނުވުމާ، ކޮށްފައިވާ މަސައްކަތުގެ ފެންވަރު ދަށްވުމުގެ ސަބަބުން 22 އޮކްޓޫބަރު 2023 ވަނަ ދުވަހު އެ އެއްބަސްވުން ބާތިލުކޮށް، މި މަސައްކަތް 695،000 ރުފިޔާ އަށް އެހެން ކުންފުންޏަކާ ހަވާލު ކޮށްފައިވާ ކަމަށެވެ.
މީގެ އިތުރުން އަލް އަމީން އިންވެސްޓްމަންޓާ ހަވާލު ކޮށްގެން މި މަސައްކަތް ކުރިއަށް ގެންދިޔުމުގައި ދައުލަތުގެ މާލިއްޔަތުގެ ގަވާއިދާ އެއްގޮތަށް ކައުންސިލްގެ އިދާރާ އިން ބައެއް ކަންކަން ފުރިހަމަ ކޮށްފައި ނުވާ ކަން އެ ރިޕޯޓުގައި ވަނީ ފާހަގަ ކޮށްފަ އެވެ. އެގޮތުން ދައުލަތުގެ މާލިއްޔަތުގެ ގަވާއިދާ ޚިލާފަށް އެޑްވާން ފައިސާ ދީފައިވާ ކަމަށް ރިޕޯޓުގައި ވެ އެވެ.
އޮޑިޓް އޮފީހުން ބުނީ ދައުލަތުގެ މާލިއްޔަތުގެ ގަވާއިދުގެ 10.61 ވަނަ މާއްދާގެ (ށ) ގައި ބަޔާންކޮށްފައިވާ ގޮތުން ކޮންޓްރެކްޓަރ 15 އިންސައްތަ އަށް ވުރެ އިތުރަށް އެޑްވާންސް ފައިސާ ހޯދުމަށް އެދިފައިވާ ނަމަ އެޑްވާންސް ފައިސާ ދޫކުރެވޭނީ މިނިސްޓަރަށް ލިޔުމުން ހުށަހަޅައި، މިނިސްޓަރު ލިޔުމުން ދޫކުރާ ހުއްދަޔާ އެކުގައި ކަމަށެވެ. މީގެ އިތުރުން މި މާއްދާގެ (ރ) ގައި ބަޔާންކޮށްފައިވާ ގޮތުން މަސައްކަތް ކޮށްދޭ ނުވަތަ ޚިދުމަތް، (ކޮންސަލްޓެންސީ ފިޔަވައި) ނުވަތަ ތަކެތި ފޯރުކޮށްދޭ ފަރާތަށް އެޑްވާންސް ފައިސާ ދޭނީ އެޑްވާންސް ޕޭމަންޓާ އެއްވަރުގެ ޕޭމަންޓް ގެރެންޓީ އެއް އެ ފަރާތުން ހުށަހެޅުމުން ކަމަށެވެ.
ނަމަވެސް ކައުންސިލްގެ އިދާރާ އިން އަލް އަމީން އިންވެސްޓްމަންޓަށް މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާގެ ހުއްދަ ނެތި 15 އިންސައްތަ އަށް ވުރެ އިތުރަށް އެޑްވާންސަށް ފައިސާ ދޫކޮށްފައިވާ ކަން އެ އޮފީހުން ވަނީ ފާހަގަ ކޮށްފަ އެވެ. އަދި މި ފައިސާ ދޫކޮށްފައި ވަނީ އެޑްވާންސް ޕޭމަންޓް ގެރެންޓީއެއް ނުހޯދާކަމަށް ވެސް ވަނީ ބުނެފަ އެވެ.
މިގޮތުން މުޅި ކޮންޓްރެކްޓުގެ އަގު ކަމަށްވާ 720،684 ރުފިޔާގެ 20.81 އިންސައްތަ އަށްވާ 150،000 ރުފިޔާ އެޑްވާންސްގެ ގޮތުގައި އެ ފަރާތަށް ދީފައިވާ ކަމަށް ރިޕޯޓުގައި ވެ އެވެ. އެހެންކަމުން ދައުލަތުގެ މާލިއްޔަތުގެ ގަވާއިދުގެ ދަށުން މިނިސްޓަރު ގެ ހުއްދައެއް ނުހޯދާ އެޑްވާންސްގެ ގޮތުގައި މި މަސައްކަތަށް ދެއްކޭނެ އެންމެ މަތީ އަދަދަކީ 108،103 ރުފިޔާ ކަމަށްވާއިރު މާލިއްޔަތުގެ ގަވާއިދުގައި ބަޔާންކޮށްފައިވާ މިންވަރަށްވުރެ އިތުރަށް 41،897 ރުފިޔާ އެޑްވާންސްގެ ގޮތުގައި ދައްކާފައިވާ ކަން ވަނީ ފާހަގަ ކޮށްފަ އެވެ.
ކައުންސިލުން ފޯރުކޮށްދީފައިވާ މައުލޫމާތަށް ބަލާއިރު މި ފައިސާ ދޫކޮށްފައިވަނީ އެއްބަސްވުމުގައިވާ ގޮތުގެ މަތިން މަސައްކަތަށް ބޭނުންވާ ތަކެތީގެ 50 އިންސައްތަ ސައިޓަށް ގެންގޮސް، ކަރަންޓުގެ ޚިދުމަތް ފޯރުކޮށްދީ، ސަރަހައްދު ސާފު ކުރުމުގެ މަސައްކަތް ފެށުމުން ކަމަށް އޮޑިޓް އޮފީހުން ވަނީ ބުނެފަ އެވެ. ނަމަވެސް މި ފައިސާ ދޫކުރިއިރު ކުނިކޮށީގެ ވަށާފާރު ރޭނުމުގެ އަމަލީ އެއްވެސް މަސައްކަތެއް ނިމިފައިނުވާތީ މިއީ މަސައްކަތުގެ ކުރިއެރުމަށް ބަލައި ދޫކުރި ޕްރޮގްރެސް ޕޭމަންޓް އަކަށް ވުރެ އެޑްވާންސް ޕޭމަންޓް އެއްގެ ގޮތުގައި ދޫކޮށްފައިވާ ފައިސާއެއް ކަން އެ އޮފީހުން ފާހަގަ ކުރެ އެވެ.
އޭގެ އިތުރުންވެސް އެ މަސައްކަތް ކުރިއަށް ގެންދިޔުމުގައި ޕަރފޯމަންސް ގެރެންޓީ ނަގާފައިނުވުމުން މަސައްކަތް ނުނިންމާ ދޫކޮށްލުމުން ލިބޭ ގެއްލުން ކުޑަކުރެވޭނެ ގޮތެއް ނެތް ކަމަށާ ބިލްތަކަށް ފައިސާ ދައްކާފައި ވަނީ އެއްބަސްވުމާ އެއްގޮތަށް މަސައްކަތް ނިންމުމުން ކަން ކަށަވަރު ކުރެވިފައި ނުވާ ކަމަށް ވެސް އެ އޮފީހުން ބުނެ އެވެ. އަދި މަސައްކަތުގެ ބޮޑު ބައެއް ނުނިންމާ ކޮންޓްރެކްޓަރު މަސައްކަތް ދޫ ކޮށްލާފައިވާ ކަން ވެސް ރިޕޯޓުގައި ވަނީ ފާހަގަ ކޮށްފަ އެވެ.
އޮޑިޓް ރިޕޯޓުގައި ބުނީ އެ މަސައްކަތް ކުރިއަށް ގެންގޮސްފައި ވަނީ ރިޓެންޝަން ފައިސާ ވެސް ކެނޑުމެއް ނެތި ކަމަށާއި އެއްބަސްވުމާ އެއްގޮތަށް މަސައްކަތް ނުނިންމާ ދޫކޮށްލުމުން ދައުލަތަށް އިތުރަށް 184،316 ރުފިޔާ ޚަރަދު ކުރަން ޖެހުނު ކަމަށެވެ.
