މަގޫދޫ އެއަރޕޯޓް: 12 މަސްދުވަހުގެ ތެރޭގައި ނިންމަވާނެ ކަމަށް 2025 ވަނަ އަހަރު ސެޕްޓެމްބަރު މަހު ރައީސް ވިދާޅުވި ނަމަވެސް އަދިވެސް ނުނިމޭ!
9 އޮކްޓޯބަރު 2026 | ހުކުރު 11:04ފ. މަގޫދޫ އެއަރޕޯޓުގެ 70 އިންސައްތަ މަސައްކަތް ނިމިފައިވަނިކޮށް މި ސަރުކާރުން އެ މަޝްރޫއު ހުއްޓާލާފައިވާތީ، ބިލެތްދޫ ދާއިރާގެ ކުރީގެ މެންބަރު އަހުމަދު ހަލީމް ކަންބޮޑުވުން ފާޅުކުރައްވައިފި. ބޭރުގެ އެހީގައި ފެށި މި މަޝްރޫއު ނިންމުމަށް ރައީސް ޑރ. މުއިއްޒު ވެވަޑައިގެންނެވި ވައުދާ އެއްގޮތަށް މަސައްކަތް ކުރިއަށް ނުދާތީ، ދައުލަތުގެ ބޮޑު ހަރަދެއް އިސްރާފުވަމުންދާކަން އޭނާ ފާހަގަކުރެއްވި
ފ. މަގޫދޫ އެއަރޕޯޓް | އެމްޓީސީސީ
ފ. މަގޫދޫ އެއަރޕޯޓުގެ މަސައްކަތް ރައީސް ޑރ. މުހައްމަދު މުއިއްޒު ނިންމަވާނެ ކަމަށް ވިދާޅުވި ތާރީހަށް ނުނިންމުމުން ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެންބަރު އަހުމަދު ހަލީމް (ދޮންބިލެތް) ކަންބޮޑުވުން ފާޅުކުރައްވައިފި އެވެ.
ރާއްޖެޓީވީގެ "ވައުދުނާމާ" ޕްރޮގްރާމްގައި ވާހަކަދައްކަވަމުން އަހުމަދު ވިދާޅުވީ، ނިމިދިޔަ އެމްޑީޕީ ސަރުކާރުގައި މަގޫދޫ އެއަރޕޯޓުގެ މަސައްކަތް ފެށީ އޭގެ ފައިދާ ސަރުކާރަށް ވާނެ ގޮތަކަށް ކަމަށާއި، އެ އެއަރޕޯޓް ވެގެން ދާނީ އާންމުކޮށް ރާއްޖެގައި އަޅާ ވަރަށް ވުރެ ރަނގަޅު ފެންވަރުގެ އެއަރޕޯޓަކަށް ކަމަށެވެ.
އެގޮތުން، މި މަޝްރޫއު ފެށީ 1800 މީޓަރުގެ ރަންވޭއަކާއި އެކީގައި ނިންމަން ކަމަށް އަހުމަދު ވިދާޅުވި އެވެ. އަދި މި އެއަރޕޯޓަކީ ބޭރުގެ ފަރާތްތަކުން އެހީ ހޯދައިގެން ކުރިއަށްގެންދާ މަޝްރޫއެއް ކަމަށް ވެސް އަހުމަދު ވިދާޅުވި އެވެ.
އަޅުގަނޑުމެން އެކިއެކި އިންވެސްޓަރުން ހޯދައިގެން، އެޔަށް ގާތްގަނޑަކަށް އަޅުގަނޑަށް ގަބޫލު ކުރެވޭ ގޮތުގައި އަޅުގަނޑަށް ކުށެއް ނޫނީއާ ވިއްސަކަށް މިލިއަން ޑޮލަރު އަޅުގަނޑުމެންނަށް ވަނީ މަގޫދޫ އެއަރޕޯޓަށް އެޅިފައި، އެއީ ބޭރުން ހަމަ އަޅުގަނޑު މަސައްކަތް ކޮށްގެން ހޯދި ފަންޑުން އެ ގެނެސް ލައިގެން އަޅުގަނޑުމެން މަސައްކަތް ފެށީ، އެއީ ސަރުކާރުން ހުޅުވާލީ ފަންޑަށްއަހުމަދު ހަލީމް
ރައީސް އިބްރާހީމް މުހައްމަދު ސޯލިހުގެ ސަރުކާރު ނިމުނުއިރުގައި މަގޫދޫ އެއަރޕޯޓުގެ ގާތްގަނޑަކަށް 70 އިންސައްތަ މަސައްކަތް ނިމިފައިވާނެ ކަމަށް އަހުމަދު ވިދާޅުވި އެވެ. އެގޮތުން އެއަރޕޯޓް ޓާމިނަލްގެ 60 އިންސައްތަ ނިމިފައިވާ ކަމަށާއި، ރަންވޭގައި ވެސް ތާރު އެޅޭ ވަރަށް އޭބީސީ އަޅާ ނިންމާފައި ވާނެ ކަމަށް އަހުމަދު ވިދާޅުވި އެވެ. އަދި ޓަވަރުގެ މަސައްކަތް ވެސް ނިމިފައިވާކަން އަހުމަދު ފާހަގަކުރެއްވި އެވެ.
ރަންވޭގެ ހިލަޖެހުމުގައި ވެސް ގާތްގަނޑަކަށް ތިން ބައި ކުޅަ ދެބައިގައި ހިލަ ޖެހިފައި. އަޅުގަނޑު ދެކޭ ގޮތުގައި 25އަކަށް ޕަސަންޓް މި އިނީ މުޅިން ކޮމްޕްލީޓް ކުރަން. އެހާ ހިސާބަށް އެއަރޕޯޓުގެ މަސައްކަތް ނިމިފައި މިހުރީ. އަނެއްހެން ބުނަންޏާ ހަ މަސް ދުވަހުގެ މަސައްކަތެއްކޮށްފި ނަމަ ރީޗަށް ބޯޓު ޖެއްސޭ ވަރަށް މަސައްކަތް ނިމޭނެއަހުމަދު ހަލީމް
ނަމަވެސް މިސަރުކާރު އައުމަށްފަހު މަގޫދޫ އެއަރޕޯޓުގެ މަސައްކަތް ހުއްޓާލާފައިވާކަން ފާހަގަކުރައްވާ އަހުމަދު ވިދާޅުވީ، 21 ސެޕްޓެމްބަރު 2025 ގައި ރައީސް މުއިއްޒު މަގޫދޫއަށް ވަޑައިގެން 12 މަސް ދުވަހުގެ ތެރޭގައި މަަސައްކަތް ނިންމަވާނެ ކަމަށް ވައުދުވެވަޑައިގެން ކަމަށެވެ. އަދި މިއަދާއި ހަމައަށް އައިއިރު އެއަރޕޯޓުގެ މަސައްކަތް ހިނގާފައި ވަނީ ފިނިހަކަ ދުވަލޭގައި ކަމަށް އަހުމަދު ވިދާޅުވި އެވެ.
މިހާރު މަގޫދޫ އެއަރޕޯޓުގެ ސަރަހައްދާއި ރަންވޭ ވަށައިގެން އޮތީ ގަސް ފަޅާފައި ކަމަށާއި، އެމްޓީސީސީ އިން ކުރާ މަސައްކަތަކީ އެތަނުގައި ހުރި ގަސްތައް ނޮޅުމުގެ މަސައްކަތް ކަމަށް އަހުމަދު ވިދާޅުވި އެވެ.
މީގެ އިތުރުން، އަހުމަދު ވަނީ މިހާތަނަށް 200 އެއްހާ މިލިއަން ރުފިޔާ މަގޫދޫ އެއަރޕޯޓަށް ހަރަދުކޮށްފައިވާއިރު، މިހާރު އެ ދަނީ ދައުލަތުގެ ވަރަށް ގިނަ ފައިސާ އިސްރާފުވަމުން ކަމަށް ވިދާޅުވެފަ އެވެ.
