ރަސްމާލެ ވިއްކާލަން ނިންމީ އެތަން ތަރައްގީ ކުރަން މިސަރުކާރަށް ނޭނގިގެން: ނާޒިމް
6 އޮކްޓޯބަރު 2026 | އަންގާރަ 04:56ރަސްމާލެ މަޝްރޫއަކީ ގާނޫނާ ހިލާފު އެއްބަސްވުމެއް ކަމަށް ތުހުމަތުކުރައްވައި، ހުޅުމާލެއާ ހިލާފަށް ރަސްމާލެ ބޭރުގެ ބަޔަކަށް ވިއްކާލަން ނިންމީ މި ސަރުކާރަށް ތަރައްގީ ކުރަން ނޭނގުމުން ކަމަށް ކުރީގެ މެންބަރު ނާޒިމް ވިދާޅުވެއްޖެ. މީގެ އިތުރުން ކުރީ ސަރުކާރުން ފަށާފައިވާ ބޯހިޔާވެހިކަމުގެ މަޝްރޫއުތައް ދޫކޮށްލުމަށްފަހު، ރައީސް މުއިއްޒު އަމަލުކުރައްވަނީ ވައުދުތަކާ ހިލާފަށް ކަމަށް ވިދާޅުވެ އޭނާ ވަނީ ފާޑުވިދާޅުވެފައި
ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެންބަރު މުހައްމަދު ނާޒިމް | ރާއްޖެއެމްވީ
ރަސްމާލެ ވިއްކާލަން ނިންމީ އެތަން ތަރައްގީ ކުރަން މިސަރުކާރަށް ނޭނގިގެން ކަމަށް ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެންބަރު މުހައްމަދު ނާޒިމް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ނާޒިމް ވިދާޅުވީ، ހުޅުމާލެ ތަރައްގީކޮށްފައި އެއޮތީ ބަޔަކަށް ވިއްކާލައިގެން ނޫން ކަމަށާއި، ހުޅުމާލެ ތަރައްގީ ކުރީ ދިވެހި ދައުލަތުން ފައިސާ ހަރަދުކޮށްގެން ކަމަށެވެ. ނަމަވެސް މި ސަރުކާރުން ބުނަނީ ރަސްމާލެ ތަރައްގީ ކުރަން ޖެހޭނީ ވިއްކާލައިގެން ކަމުގައި ނާޒިމް ވިދާޅުވި އެވެ.
ރައީސް ޑރ. މުހައްމަދު މުއިއްޒު ރަސްމާލެ ހިއްކަން ފެއްޓެވީ ކާކު ދަންނަވައިގެންތޯ ސުވާލު އުފައްދަވާ ނާޒިމް ވަނީ ރައީސް އިބްރާހީމް މުހައްމަދު ސޯލިހުގެ ސަރުކާރުން ކަނެކްޓިވިޓީ ބްރިޖަކާއެކު ހިއްކަން ފަށާފައިވާ ގުޅީފަޅު އަދި ގިރާވަރުފަޅު ދޫކޮށް ރަސްމާލެ ހިއްކަން ފެށުމުން އެކަމާ ކަންބޮޑުވެ ވަޑައިގަންނަވާކަމަށް ވިދާޅުވެފަ އެވެ.
އަދި ދިވެހިރާއްޖެއިން ވެލިފުކެއްހާ މިންވަރު ވެސް ދޫކޮށްނުލައްވާނެ ކަމަށް ރައީސް މުއިއްޒު ވިދާޅުވެ ރަސްމާލެ ބޭރުގެ ބަޔަކަށް ވިއްކާލަން ނިންމެވުމުން ނާޒިމް ވަނީ ވަރަށް ބޮޑަށް ރައީސް މުއިއްޒަށް ފާޑުވިދާޅުވެފަ އެވެ.
އެންމެ އަޖައިބުވާކަމަކީ މުސްލިމް ގައުމެއްގެ ވަލީއުލް އަމްރަކަށް ހުންނަ ބޭފުޅަކު އެ ދައްކަވާ ވާހަކަތައް ﷲ އަށް ބިރުވެތިނުވެ، މުނާފިގެއްގެ ހުންނަ ސިފަތައް ވެސް އަމިއްލަފުޅަށް ވިދާޅުވަނީ، މުނާފިގެއް ވެއްޖިއްޔާ އެޔާ ދެކޮޅަށް ދެން އެއީ އާންމުކޮށް އެނގޭ އަސާސީ ވާހަކައެއް އެއީ. މިބޭފުޅާ ހަނދުމަފުޅުކޮށްދެނީ މުނާފިގާގެ އަލާމާތަކީ މިއޭ، ބަލަ އެ ދުލުންނޭ އޭގެ އަނެއް ދުވަހު ތިމަންނާއަކީ މުނާފިގެއްކަން އިއުތިރާފްވާވަރުގެ ކަމެއް މިކޮށްލަނީމުހައްމަދު ނާޒިމް
ނާޒިމް ވަނީ ރަސްމާލެ މަޝްރޫއުގެ އެއްބަސްވުމަކީ ގާނޫނާ ހިލާފު އެއްބަސްވުމެއް ކަމަށް ވެސް ތުހުމަތުކުރައްވާފަ އެވެ.
ދައުލަތުގެ ބަންޑާރާނައިބު އަނެއް ދުވަހު އަރާ ވިދާޅުވަނީ ތިމަންނާމެން މިހާރު މިއުޅެނީ ގާނޫނު އެޔަށް ފެތޭ ގޮތަށް ތައްޔާރު ކުރާށޭ، ފަރުމާ ކުރާށޭ މިއުޅެނީ، އެޔަށް ދިމާވާގޮތަށް ގާނޫނު ހަދާށޭ މިއުޅެނީ އެހެންވެ އެނގިޖެތާ ގާނޫނާ ހިލާފުކަން. އަދި އެ ވަރަކުން އެ ސައްހައެއް ނުވާނު. ގާނޫނު އަސާސީ ވެސް އިސްލާހު ކުރަން ޖެހޭނެ. ކޮށްފާނެ އެ ބޭފުޅުންމުހައްމަދު ނާޒިމް
އެކި ސަރުކާރުތަކުން ހުޅުމާލެ ތަރައްގީ ކޮށްފައިވީ ފަދައިން ރައީސް މުއިއްޒުއަށް ރަސްމާލެ ތަރައްގީ ކުރަން އެނގިވަޑައިނުގަންނަވާ ކަމަށް ނާޒިމް ވިދާޅުވި އެވެ. އަދި އެތަން ވިއްކާލަން ނިންމި ސަބަބަކީ ވެސް ތަރައްގީ ކުރަން ނޭނގުން ކަމަށް ނާޒިމް ވިދާޅުވި އެވެ.
