މިހާރު ފެނިގެން ދަނީ ގާނޫނު އަސާސީގައި ހުރި ލޫޕް ހޯލްތައް ބޭނުންކޮށްގެން ރާއްޖޭގެ ބިންތައް ބޭރުގެ ފަރާތްތަކަށް ވިއްކާލުމަށް މަސައްކަތް ކުރާ މަންޒަރު: މާޒް ސަލީމް
29 ސެޕްޓެމްބަރު 2026 | އަންގާރަ 13:02ރަސްމާލެ މަޝްރޫއުގެ ނިވާފަތްގަނޑުގައި އިސްރާއީލުގެ މުއްސަނދިންނަށް ރާއްޖޭގެ ބިންތައް ވިއްކުމުގެ ނުރައްކާތެރި ރޭވުމެއް އޮތް ކަމަށް އޭނާ ތުހުމަތު ކުރައްވާ
ރަސްމާލޭގެ ބޮޑު ބައެއް އަބޫދާބީގެ އީގަލް ހިލްސް ކުންފުންޏަށް 99 އަހަރަށް، އެއްވެސް އަގަކާ ނުލާ ހިލޭ ދިން މައްސަލައިގައި ބޮޑެތި ޚިޔާނާތާއި ކޮރަޕްޝަން އެކުލެވޭ ކަމަށް ތުހުމަތުކޮށް މާޒް އަހުމަދު ސަލީމް އޭސީސީ އަށް މައްސަލައެއް ހުށަހަޅުއްވާ ދެއްވި އިންޓަވިއުގެ ތެރެއިން | ރާއްޖެ އެމްވީ
މިހާރު ފެނިގެން ދަނީ ދިވެހިރާއްޖޭގެ ގާނޫނު އަސާސީގައި ހުރި ލޫޕް ހޯލްތައް ބޭނުންކޮށްގެން ރާއްޖޭގެ ބިންތައް ބޭރުގެ ފަރާތްތަކަށް ވިއްކާލުމަށް މަސައްކަތް ކުރާ މަންޒަރު ކަމަށް އެމްޑީޕީގެ ގައުމީ މަޖިލީހުގެ މެންބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
ރާއްޖެޓީވީއަށް ދެއްވި އިންޓަވިއުއެއްގައި މާޒް ސަލީމް ވިދާޅުވީ، ދިވެހިރާއްޖޭގެ ވެރިކަން ހިންގަން ޖެހޭނީ ގާނޫނު އަސާސީއާ އެއްގޮތްވާ ގޮތުގެ މަތިން ނަމަވެސް، ކަން ހިނގަނީ އެހެން ނޫން ކަމަށެވެ. އަދި 5 އަހަރުގެ ދައުރަކަށް އިންތިހާބު ވެގެން އަންނަ ވެރިއަކަށް ދިވެހިރާއްޖޭގެ ބިން ތާއަބަދަށް ވިއްކާލެވިގެން ނުވާނެ ކަމަށް މާޒް ސަލީމް ވިދާޅުވި އެެވެ.
އެގޮތުން ރަސްމާލެ މަޝްރޫއުގެ ފަހަތުގައި ވަރަށް ބޮޑު އެޖެންޑާއެއް އެބައޮތް ކަމަށާއި، އަދި އެ އެޖެންޑާއަކީ އިސްރާއީލުގެ މުއްސަނދިންނަށް ދިވެހިރާއްޖެއިން ބިން ވިއްކުން ކަމަށް އޭނާ ތުހުމަތު ކުރެއްވި އެވެ.
ވިއްކާ މިތާ ވަޒަންވެރި ކުރުވުން، އަޅުގަނޑުމެންނަށް އެނގޭ ފަލަސްތީނުގެ ބިމުގައި އިސްރާއީލުން ވަޒަންވެރިވި ގޮތް ވެސް، ވަރަށް ސާފުކޮށް އެބަ އެނގޭ ދާދި އުމުރަށް ފަލަސްތީން ރައްޔިތުން ތަހައްމަލު ކުރަމުން އެދަނީ އިސްރާއީލުގެ ރައްޔިތުންގެ އަނިޔާ. އެހެންވީމަ އަޅުގަނޑުމެން ބޭނުމެއް ނުވޭ މިތަނަށް އަޅުގަނޑުމެންގެ މި ފުރަމާލެއާ ޖެހިގެން އޮތް ބިމަކަށް އިސްރާއީލުގެ މީހުން މިތަނަށް ގެނެސް، އިސްރާއީލުގެ އިމާރަތްތައް މިތާ ހަދާ، އިސްރާއީލު މިތަނަށް ވެރިވެގެން އިސްރާއީލު ތަނެއް ގޮތުގައި މިތަން ބާއްވާކަށްމާޒް އަހުމަދު ސަލީމް
ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް، އެއްވެސް އަގަކާ ނުލާ ހިލޭ ދިން މައްސަލައިގައި ބޮޑެތި ޚިޔާނާތާއި ކޮރަޕްޝަން އެކުލެވޭ ކަމަށް ތުހުމަތުކޮށް މާޒް ސަލީމް ވަނީ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ވެސް ހުށަހަޅުއްވާފަ އެވެ.
އޭނާ ހުށަހެޅުއްވި މި މައްސަލައިގައި ބުނެފައިވަނީ، ރައްޔިތުންގެ ޓެކްސް ފައިސާއިން ބޮޑު ހޭދައެއް ކޮށްގެން ހިއްކާ ބިމުން ބޮޑު ބައެއް ބޭރުގެ ކުންފުންޏަކަށް ދިނުމަކީ ރާއްޖޭގެ މިނިވަންކަމާއި އިސްތިޤުލާލަށް އޮތް ނުރައްކަލެއް ކަމަށެވެ. އަދި މިއީ އަމަލީ ގޮތުން ބަލާއިރު ބިމުގެ މިލްކުވެރިކަން ދާއިމީކޮށް ބޭރުގެ ފަރާތްތަކަށް ލިބިގެންދާނެ ކަމެއް ކަމަށާއި، މިއީ ޤާނޫނުއަސާސީގެ 250 އަދި 251 ވަނަ މާއްދާއާ ޚިލާފު ކަމެއް ކަމަށެވެ.
މީގެއިތުރުން ރަސްމާލޭގެ މި މަޝްރޫއުގައި ހިމެނޭ ޔޮޓުމެރީނާ އަކީ ވެސް މިރައްޖޭގެ ބޯޑަރަށް އޮތް ބޮޑު ނުރައްކަލެއްކަމަށާއި އެގޮތުން ރަސްމާލޭގެ ނަމުގައި ރާއްޖެ އެތެރެވާ އަދި ބޭރުވާ ކަނޑުގެ އުޅަނދުފަހަރުގެ ކޮންޓްރޯލް ދައުލަތުގެ ސަލާމަތީ ބާރުތަކުގެ ދަށުން ގެއްލިގެންދާނެ ކަމަށް ވަނީ ބުނެފަ އެވެ. އަދި ވެރިރަށް މާލެއާ ޖެހިގެން އޮތް މުހިންމު ސަރަހައްދެއްގައި ބޭރުގެ ބަޔެއްގެ ދާއިމީ ކޮންޓްރޯލް އޮތް މެރީނާއެއް އޮތުމަކީ، ރާއްޖޭގެ ސަލާމަތީ ބާރުތަކުގެ ހުއްދައާ ނުލާ ޖާސޫސް ކުރުމަށް ބޭނުންވާނެ ޓެކްނޮލޮޖީއާއި އަދި އެނޫން ވެސް ގައުމީ ސަލާމަތައް ނުރައްކާ ވެދާނެ ތަކެތި އެ ސަރަހައްދަށް ޖަމާކުރުމުގެ ފުރުސަތު ހުޅުވިގެންދާނެ ކަމެއްކަމާއި މެދު އެއްވެސް ޝައްކެތް ނެތްކަމަށް ވެސް ވަނީ ބުނެފަ އެވެ.
މި މަޝްރޫއާއި ގުޅިގެން ދިވެހި ރައްޔިތުން ކަންބޮޑުވުންތައް ފާޅުކުރަމުންދާއިރު މި އެއްބަސްވުން އޮތީވެސް ދިވެހި ރައްޔިތުންނަށް ސިއްރުކޮށްފައިކަމަށް ވެސް މާޒް ސަލީމް އޭސީސީއަށް ހުށަހެޅުއްވި މައްސަލައިގައި ބަޔާންކޮށްފައިވެ އެވެ.
