ރާއްޖެ ސައްތައިންސައްތަ މުސްލިމް ގައުމެއްގެ ގޮތުގައި އޮތީ ބޭރު މީހުންނަށް ދާއިމީކޮށް ވަޒަންވެރިވުމުގެ ފުރުސަތު ނުދިނުމުން: މެންބަރު ނާޒިލް
5 އޮކްޓޯބަރު 2026 | ހޯމަ 12:40ރަސްމާލެ މަޝްރޫއުގެ ދަށުން ބޭރުގެ ކުންފުންޏަކަށް ދިގު މުއްދަތަށް ބިން ދޫކުރުމަކީ ރާއްޖޭގެ މިނިވަންކަމާއި އިސްލާމީ ވަހުދަތަށް ނުރައްކާވެދާނެ ކަމެއް ކަމަށް ހިތަދޫ ދެކުނު ދާއިރާގެ މެންބަރު ނާޒިލް ވިދާޅުވި. ބޭރު މީހުންނަށް ރާއްޖޭގައި ވަޒަންވެރިވުމުގެ ފުރުސަތު ދިނުމުން ދީނީ މިނިވަންކަމަށް މަގުފަހިވެދާނެ ކަމުގެ ބިރު އޮތްކަން ފާހަގަކުރައްވައި، އަންނަން އޮތް ޖީލުތަކަށް މި ގައުމު ސައްތައިންސައްތަ މުސްލިމް ގައުމެއްގެ ގޮތުގައި ފޯރުކޮށްދިނުމަށް މެންބަރު ގޮވާލެއްވި
ހޯމަ ދުވަހު ބޭއްވި ރައްޔިތުން މަޖިލިސް ޖަލްސާގައި ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހީމް ނާޒިލް ވާހަކަ ދައްކަވަނީ | ރާއްޖެއެމްވީ
ދިވެހިރާއްޖެ ސައްތައިންސައްތަ މުސްލިމް ގައުމެއްގެ ގޮތުގައި ދެމިއޮތީ މީގެ ކުރިން ވެސް ރާއްޖޭގައި ބޭރު މީހުންނަށް ދާއިމީ ގޮތެއްގައި ވަޒަންވެރިވެވޭނެ ފަދަ ފުރުސަތުތައް ލިބި، އެކަމަށް ފުރުސަތު ނުދިނުމުން ކަމަށާއި، މިހާރު ވެސް އެގޮތަށް އަމަލުކުރަންޖެހޭ ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހީމް ނާޒިލް ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު ނާޒިލް ވިދާޅުވީ، ރާއްޖޭގެ ބިމުގައި ބޭރު މީހުންނަށް ވަޒަންވެރިވުމުގެ ފުރުސަތު ދިނުމުގެ ނަތީޖާ މުސްތަގުބަލުގައި ވަރަށް ހިތިވާނެ ކަމަށެވެ. އަދި ގާނޫނުއަސާސީގެ 251 ވަނަ މާއްދާގެ (ހ) ގައި ރާއްޖޭގެ ސަރަހައްދުން އެއްވެސް ބައެއް ބޭރުގެ އެއްވެސް ފަރާތަކަށް މިލްކުކޮށް ނުދެވޭނެ ކަމަށް ބަޔާންކޮށްފައިވާކަން މެންބަރު ނާޒިލް ފާހަގަކުރެއްވި އެވެ.
ރަސްމާލޭގެ ބޮޑު ބައެއް 99 އަހަރަށް އީގަލް ހިލްސްއަށް ދިނުމާ ގުޅޭގޮތުން މެންބަރު ނާޒިލް ވިދާޅުވީ، ރިސޯޓުތަކާއި ރަސްމާލެ މަޝްރޫއުގެ ދަށުން ބިން ދޫކުރުން ވަރަށް ތަފާތު ކަމަށާއި، އެކަން ރައްޔިތުންނަށް އޮޅުވާނުލެވޭނެ ކަމަށެވެ. ރިސޯޓުތަކަކީ މުޅިން ތަފާތު ކޮންސެޕްޓެއް ކަމަށާއި، ނަމަވެސް މިހާރު ވިއްކަން އުޅެނީ އެތައް ޒަމާނެއް ވަންދެން ދިރިއުޅެން ކަމަށް މެންބަރު ނާޒިލް ވިދާޅުވި އެވެ. އަދި 99 އަހަރަށް ބިން ކުއްޔަށް ދިނުމަށްފަހު، އަނެއްކާވެސް 98 ވަނަ އަހަރު އިތުރު 99 އަހަރު އިތުރުކުރެވޭ ގޮތަށް އޮތުމަކީ މިއީ ކިހާ ހިސާބަކަށް ދެމިގެންދާނެ ކަމެއްކަން އެނގެން ނެތް ހާލަތެއް ކަމަށް މެންބަރު ނާޒިލް ވިދާޅުވި އެވެ.
މި ކަހަލަ ފުރުސަތެއް ބޭރު ބަޔަކަށް މިއަދު ދީފިއްޔާމު ޖެހިގެން އަންނަ ދުވަހު އަޅުގަނޑު މި ބުނާހެން ދީނީ މިނިވަންކަމުގެ ނަމުގައި އަނެއްކާ ފައިސާ ދީގެން އެ ފައިސާ ތިބި ބަޔަކު ދީގެން އެ ވިއްކާލާނީއިބްރާހީމް ނާޒިލް
މީގެ އިތުރުން މެންބަރު ނާޒިލް ވިދާޅުވީ، އަންނަން އޮތް ޖީލުތަކާއި ދަރިފަސްކޮޅުތަކަށް ވެސް ރާއްޖެ ސައްތައިންސައްތަ މުސްލިމް ގައުމެއްގެ ގޮތުގައި ފޯރުކޮށްދޭން ޖެހޭ ކަމަށެވެ. އަދި މިގައުމު މިގޮތުގައި ދެމިއޮންނާނެ ގޮތަށް ކަންކަން ކުރުމަށް ރައްޔިތުންގެ މަންދޫބުންގެ ކިބައިން ރައްޔިތުން އެދެންޖެހޭ ކަމަށާއި، މި ވާހަކަތައް ދައްކަން ޖެހޭ ކަމަށް މެންބަރު ނާޒިލް ވިދާޅުވި އެވެ.
