އެމެރިކާގެ ހަތިޔާރު ގަންނަން ޝައުގުވެރިކަން ހުރިތޯ ޓްރަމްޕް ޝީގެ އަރިހުން އައްސަވައިފި
28 ސެޕްޓެމްބަރު 2026 | ހޯމަ 10:01އެމެރިކާގެ ހަތިޔާރު ބައްލަވައިގަތުމަށް ޝައުގުވެރިވޭތޯ ރައީސް ޓްރަމްޕް، ޗައިނާގެ ރައީސް ޝީ ޖިންޕިންގްގެ އަރިހުން އެއްސެވި ނަމަވެސް، އެ ގައުމަށް ހަތިޔާރު ވިއްކުމުގެ އެއްވެސް ޕްލޭނެއް ނެތް ކަމަށް އެމެރިކާގެ ޚާރިޖީ ވުޒާރާއިން ވަނީ ބުނެފައި. މީގެ އިތުރުން، ޓައިވާނަށް ހަތިޔާރު ވިއްކުމުގެ ސިޔާސަތަށް ބަދަލެއް ނާންނަ ކަމަށާއި، ޗައިނާއަށް ހަތިޔާރު ވިއްކުން އެމެރިކާގެ ގާނޫނުތަކުން މަނާކުރާ ކަމަށް ވެސް އެ އިދާރާއިން ހާމަކުރޭ
ޗައިނާގެ ރައީސް ޝީ ޖިންޕިންގ އެމެރިކާއަށް ކުރެއްވި ދަތުރުފުޅުގެ ތެރެއިން އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރައްވަނީ | އަނަދޮލު އޭޖެންސީ
އެމެރިކާގެ ހަތިޔާރު ގަތުމަށް ބެއިޖިންގއިން ޝައުގުވެރިވޭތޯ އެމެރިކާގެ ރައީސް ޑޮނަލްޑް ޓްރަމްޕް ޗައިނާގެ ރައީސް ޝީ ޖިންޕިންގގެ އަރިހުން އެއްސެވި ކަމަށް، ޗައިނާއަށް އެމެރިކާއިން ކަނޑައަޅާފައި ހުންނަވާ ސަފީރު ޑޭވިޑް ޕާޑިއު ހާމަކުރައްވައިފި އެވެ. އޭނާ މި މޭރުމުން ވިދާޅުވެފައި މި ވަނީ، ޝީ އެމެރިކާއަށް ކުރެއްވި ދުތުރުފުޅުގެ ތެރެއިން ޓްރަމްޕާއެކު ބޭއްވެވި ބައްދަލުވުންތަކުގައި ދެކެވުނު ވާހަކަތަކަށް އިޝާރާތްކުރައްވަ އެވެ.
"ޓްރަމްޕް އަބަދުވެސް ވިދާޅުވަމުން ގެންދަވަނީ، އަޅުގަނޑުމެން ދުނިޔޭގެ އެހެން ގައުމުތަކަށް ވެސް ހަތިޔާރު ވިއްކަމުންނޭ މި ދަނީ. އެމަނިކުފާނު ވަނީ އެއް ފަހަރަކު ހަތިޔާރު ބައްލަވައިގަންނަން ބޭނުންފުޅުތޯ ވެސް ރައީސް ޝީގެ އަރިހުން އައްސަވާފައި،" އާދީއްތަ ދުވަހު ފޮކްސް ނޫހަށް ދެއްވި ބަސްދީގަތުމެއްގައި ޕާޑިއު ވިދާޅުވި އެވެ.
ބުރާސްފަތި ދުވަހު ވައިޓް ހައުސްގައި ބޭއްވުނު މުހިންމު ސަމިޓެއްގައި ޓްރަމްޕް ވަނީ ޝީއަށް މެހެމާންދާރީ އަދާކުރައްވާފަ އެވެ. އަދި، ހުކުރު ދުވަހު މި ދެ ލީޑަރުން ވަކިން ސައިފޮދެއްގައި ބައްދަލުކުރައްވައި، ވޮޝިންގޓަންގައި ހުރި ފޮޓޯ އަދި ލިޔެކިޔުންތަކުގެ އަރުޝީފުތައް ބައްލަވާލެއްވި އެވެ. އެއަށްފަހު، ޝީ ވަނީ އެމެރިކާއަށް ކުރެއްވި ތިން ދުވަހުގެ ފުރަމާނަ ދަތުރުފުޅު ނިންމަވާލެއްވުމަށްފަހު ފުރާވަޑައިގަންނަވާފަ އެވެ. ހަތިޔާރު ގަތުމާ ގުޅޭ ގޮތުން ޓްރަމްޕް ކުރެއްވި ސުވާލަށް ޝީ ދެއްވި ޖަވާބެއް ޕާޑިއު ވިދާޅެއް ނުވެ އެވެ.
ޝީ އެމެރިކާއަށް ކުރެއްވި ފުރަމާނަ ދަތުރުފުޅަކީ "ކާމިޔާބު" ދަތުރުފުޅެއް ކަމަށް ސިފަކުރަމުން، އެ ގައުމަކީ "ދުނިޔޭގެ ސުލްހައަށް އިސްކަންދޭ" ގައުމެއް ކަމަށް ބެއިޖިންގއިން ހޯމަ ދުވަހު ވަނީ ބުނެފަ އެވެ. "ޗައިނާއިން އަސްކަރިއްޔާ ބިނާކޮށްފައި ވަނީ އަމިއްލަ ބޭނުންތަކަށް ބަލައިގެން. އަދި، ދުނިޔޭގެ ސުލްހައާއި ހަމަޖެހުން ހިމާޔަތްކުރުމަށް ޗައިނާއިން އިސްކަންދޭ،" ބެއިޖިންގގައި ނޫސްވެރިންނާ ވާހަކަފުޅު ދައްކަވަމުން އެ ގައުމުގެ ޚާރިޖީ ވުޒާރާގެ ތަރުޖަމާނު ގުއޯ ޖިއާކުން ވިދާޅުވި އެވެ.
"ރައީސް ޓްރަމްޕް އަބަދުވެސް ވިދާޅުވަމުން ގެންދަވަނީ، 'އަޅުގަނޑުމެން ދުނިޔޭގެ އެހެން ގައުމުތަކަށް ވެސް ހަތިޔާރު ވިއްކަމުންދާ' ކަމަށެވެ،" ޓައިވާނަށް ވޮޝިންގޓަނުން ހަތިޔާރު ވިއްކުން ދިފާއުކުރައްވަމުން ޕާޑިއު ވިދާޅުވި އެވެ.
މިއާ ވިދިގެން، އެމެރިކާގެ ގާނޫނުތަކުގެ ދަށުން ޗައިނާއަށް ހަތިޔާރު ވިއްކުން މަނާކުރާ ކަމަށާއި، ބެއިޖިންގއަށް ހަތިޔާރު ވިއްކުމުގެ އެއްވެސް "ހުށަހެޅުމެއް ނުވަތަ ޕްލޭނެއް" ވޮޝިންގޓަންގެ ނެތް ކަމަށް އެމެރިކާގެ ޚާރިޖީ ވުޒާރާގެ އޮފިޝަލަކު ފަހުން ވަނީ ސައުތު ޗައިނާ މޯނިންގ ޕޯސްޓަށް ދެއްވި ބަސްދީގަތުމެއްގައި ވިދާޅުވެފަ އެވެ.
'ވަން-ޗައިނާ ޕޮލިސީ' އާއި ޓައިވާން ރިލޭޝަންސް ގާނޫނު އަދި އެމެރިކާ-ޗައިނާގެ ތިން ކޮމިއުނިކޭއަކާ ހަވާލާދެއްވަމުން، ޓައިވާނާ މެދު ވޮޝިންގޓަނުން ގެންގުޅޭ ސިޔާސަތަށް އެއްވެސް ބަދަލެއް ނާންނަ ކަމަށް ޕާޑިއު ވިދާޅުވި އެވެ. "އަޅުގަނޑުމެން [ޓައިވާނުގެ] މިނިވަންކަމަކަށް ތާއީދެއް ނުކުރަން. އަދި، ބާރުގެ ބޭނުންކޮށްގެން މަޖުބޫރުކުރުވުމަކަށް ވެސް ތާއީދެއް ނުކުރަން،" އޭނާ ވިދާޅުވި އެވެ.
މީގެ އިތުރުން، ޓައިވާނަށް 11 ބިލިއަން ޑޮލަރުގެ ހަތިޔާރު ޕެކޭޖެއް ވިއްކުމަށް ޓްރަމްޕް ފާސްކޮށްދެއްވާފައިވާ ކަމަށާއި، 1979 ވަނަ އަހަރުގެ ފަހުން އެމެރިކާގެ އެއްވެސް ރައީސަކު ފޯރުކޮށްދެއްވާފައިވާ މިންވަރަށްވުރެ %50 އިތުރަށް ހަތިޔާރު ބަދަލުކުރުމުގެ ހުއްދަ ދެއްވާފައި ކަން ވެސް އޭނާ ވިދާޅުވި އެވެ.
މީގެ ކުރިން ވެސް އެމެރިކާއިން ޗައިނާއަށް ހަތިޔާރު ވިއްކާފައިވެ އެވެ. މި ގޮތުން، 1980 ގެ އަހަރުތަކުގައި ކުރީގެ ރޫސީ ވިލާތާ ދެކޮޅަށް އެމެރިކާއާއި ޗައިނާއާ ދެމެދު އޮތް އިސްތިރާޖީ ގުޅުން ބަދަހިވި ދުވަސްވަރު، އޭއެން/ޓީޕީކިއު-37 ކައުންޓަރ-އާޓިލަރީ ރާޑަރުތަކާއި މާކް-46 ޓޯޕިޑޯ ހިމެނޭހެން އަސްކަރީ ސާމާނު ވޮޝިންގޓަނުން ވަނީ ބެއިޖިންގއަށް ފޯރުކޮށްދީފަ އެވެ.
ނަމަވެސް، އެމެރިކާގެ ގަވަރންމަންޓް އެކައުންޓަބިލިޓީ އޮފީހުން ބުނާ ގޮތުގައި، އެމެރިކާ ސަރުކާރުން އެހެން ގައުމުތަކުގެ ސަރުކާރުތަކަށް ހަތިޔާރު ވިއްކުން ފަހުން ވަނީ ހުއްޓާލާފަ އެވެ. އަދި، 1990 ގެ ފަހުން ފޮރިން މިލިޓަރީ ސޭލްސްގެ އެއްވެސް އާ އެއްބަސްވުމެއް އެކުލަވާލާފައެއް ނުވެ އެވެ. ޓައިވާނަކީ ޗައިނާގެ ބައެއް ކަމަށް ބެއިޖިންގއިން ދެކޭއިރު، އެ ރަށަށް އެމެރިކާއިން ހަތިޔާރު ވިއްކުމާ ދެކޮޅަށް ޗައިނާއިން ވަނީ ތަކުރާރުކޮށް ދެކޮޅުހަދާފަ އެވެ.
މަސްދަރު: އަނަދޮލު އޭޖެންސީ
