ޗައިނާއަށް އެމެރިކާގެ ހަތިޔާރު ވިއްކަން ހުށަހެޅުއްވި ކަމަށް ބުނާ ވާހަކަ ޓްރަމްޕް ދޮގުކުރައްވައިފި
29 ސެޕްޓެމްބަރު 2026 | އަންގާރަ 02:44ޗައިނާއަށް ހަތިޔާރު ވިއްކުމަށް ހުށަހެޅުއްވި ކަމަށް ދެކެވޭ ވާހަކަތައް ރައީސް ޓްރަމްޕް ދޮގުކުރެއްވި ނަމަވެސް، އެމެރިކާގެ އުފެއްދުންތަކުގެ ފެންވަރު ރަނގަޅުވުމުން އެ ތަކެތި ޗައިނާއިން ގަތުމަކީ އެކަށީގެންވާ ކަމެއް ކަމަށް އޭނާ ވިދާޅުވި. އެމެރިކާގެ ގާނޫނުތައް ބުނާގޮތުން ޗައިނާއަށް ހަތިޔާރު ވިއްކުމަކީ މަނާކަމެއް ކަމަށް ޚާރިޖީ ވުޒާރާއިން ބުނާއިރު، މީގެ ކުރިން 1980 ގެ އަހަރުތަކުގައި އެމެރިކާއިން ވަނީ ޗައިނާއަށް އަސްކަރީ ސާމާނު ފޯރުކޮށްދީފައި
އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ނޫސްވެރިންނާ ވާހަކަފުޅު ދައްކަވަނީ | ސީ-ސްޕޭން
ޗައިނާގެ ރައީސް ޝީ ޖިންޕިންގއާއެކު ބޭއްވެވި ސަމިޓުގައި، އެމެރިކާގެ އަސްކަރީ ސާމާނާއި ހަތިޔާރު ޗައިނާއަށް ވިއްކުމަށް ހުށަހެޅުއްވި ކަމަށް ދެކެވޭ ވާހަކަތައް އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ދޮގުކުރައްވައިފި އެވެ.
ޗައިނާއަށް އެމެރިކާއިން ކަނޑައަޅާފައި ހުންނަވާ ސަފީރު ޑޭވިޑް ޕާޑިއު އާދީއްތަ ދުވަހު ދައްކަވާފައިވާ މި ވާހަކަތަކަށް އިޝާރާތްކޮށް ނޫސްވެރިން ސުވާލު ދެންނެވުމުން، "އަޅުގަނޑު ދުވަހަކު ވެސް ތިޔަ ކަހަލަ ވާހަކައެއް ނާހަން،" ކަމަށް ޓްރަމްޕް ވިދާޅުވި އެވެ. "އަޅުގަނޑުމެން އެ ކަމަކާ މަޝްވަރާއެއް ނުކުރަން. އޭނާ އެ ވިދާޅުވީ ޓައިވާނުގެ ވާހަކަ ކަމަށް ވެދާނެ."
އެމެރިކާއިން އުފައްދަނީ މާ ފެންވަރު ރަނގަޅު ނިޒާމުތަކަކަށް ވާތީ އެ ގައުމުގެ ދިފާއީ ސާމާނު ހޯދަން ބެއިޖިންގއިން ބޭނުންވާނެ ކަމަށް ވިދާޅުވި ނަމަވެސް، އެ ފަދަ އެއްވެސް މައުލޫއަކަށް މަޝްވަރާ ކުރެވިފައި ނުވާ ކަމަށް ޓްރަމްޕް ތަކުރާރުކުރެއްވި އެވެ. އެމެރިކާއިން މާ ފެންވަރު ރަނގަޅު ސާމާނު އުފައްދާތީ ޗައިނާއިން އެ ތަކެތި "ގަންނަން ބޭނުންވުން އެކަށީގެންވާ" ކަމަށް ވިދާޅުވެ، ޓްރަމްޕް ވަނީ އެއީ "ރަނގަޅު ޚިޔާލެއް" ކަމަށް ސިފަކުރައްވާފަ އެވެ.
ވޮޝިންގޓަނުން ގިނަ ގައުމުތަކަކަށް ދިފާއީ ހަތިޔާރު ވިއްކާ ކަމަށް އެހެން ގައުމުތަކުގެ ވެރިންގެ އަރިހުގައި ޓްރަމްޕް ގިނައިން ވިދާޅުވާ ކަމަށް ޕާޑިއު ވިދާޅުވެފައި ވަނީ އެމެރިކާގެ ފޮކްސް ނޫހަށް ދެއްވި ބަސްދީގަތުމެއްގަ އެވެ. އަދި, އެމެރިކާގެ އަސްކަރީ ހަތިޔާރު ގަންނަން ބެއިޖިންގއިން ޝައުގުވެރިވޭތޯ ޗައިނާގެ ރައީސް ޝީ ޖިންޕިންގގެ އަރިހުން ޓްރަމްޕް "އެއް ފަހަރަކު" އެއްސެވި ކަމަށް ވެސް ޕާޑިއު ވަނީ ވިދާޅުވެފަ އެވެ.
ނަމަވެސް، މިއީ ކުރެވިދާނެ ކަމެއް ނޫން ކަމަށް އެމެރިކާގެ ޚާރިޖީ ވުޒާރާއިން ވަނީ ބުނެފައެވެ. އެ ވުޒާރާގެ އޮފިޝަލަކު ސައުތު ޗައިނާ މޯރނިންގ ޕޯސްޓަށް ދިން ބަސްދީގަތުމެއްގައި ވިދާޅުވީ، ޗައިނާއަށް ދިފާއީ ސާމާނު ވިއްކުމަކީ އެމެރިކާގެ ގާނޫނުތަކުގައި މަނާކޮށްފައި އޮތް ކަމެއް ކަމަށެވެ.
އެމެރިކާގެ ގާނޫނުތައް ބުނާ ގޮތުން، ޗައިނާއަށް ދިފާއީ ސާމާނު ވިއްކުމަކީ މަނާކަމެކެވެ. އަދި, ބެއިޖިންގއަށް ހަތިޔާރު ފޯރުކޮށްދިނުމުގެ އެއްވެސް ޕްލޭނެއް ނުވަތަ އެ ފަދަ ހުށަހެޅުމެއް ވޮޝިންގޓަނުން ނުގެންގުޅޭ ކަމަށް ވެސް އެ އޮފިޝަލް ކަށަވަރުކޮށްދެއްވި އެވެ.
ތާރީޚަށް ބަލާއިރު، މީގެ ކުރިން އެމެރިކާއިން ޗައިނާއަށް ހަތިޔާރު ފޯރުކޮށްދީފައިވެ އެވެ. މި ގޮތުން، ކުރީގެ ރޫސީ ވިލާތާ ދެކޮޅަށް 1980 ގެ އަހަރުތަކުގައި އެމެރިކާއާއި ޗައިނާ ގުޅިގެން މަސައްކަތްކޮށްފައިވެ އެވެ. އަދި، ދެ ގައުމުގެ ދެމެދުގައި އިސްތިރާޖީ ގުޅުންތައް ވަރުގަދަވެގެންދިޔަ އެ ދުވަސްވަރު، ވޮޝިންގޓަނުން ވަނީ ބެއިޖިންގއަށް އަސްކަރީ ސާމާނު ފޯރުކޮށްދީފަ އެވެ. އޭގެ ތެރޭގައި، އޭއެން/ޓީޕީކިއު-37 ކައުންޓާ-އާޓިލަރީ ރާޑަރުތަކާއި މާކް-46 ޓޯޕިޑޯ ފަދަ ބާރުގަދަ ހަތިޔާރު ވެސް ހިމެނެ އެވެ.
މަސްދަރު: އަނަދޮލު އޭޖެންސީ
