ރަސްމާލެ ވޯޓަރފްރަންޓް އެންޑް މެރީނާ މަޝްރޫއު ތަރައްގީކޮށް ނިމޭ 10 އަހަރުގެ ތެރޭގައި ދައުލަތަށް 11 ބިލިއަން ޑޮލަރު ލިބޭނެ: ފިނޭންސް މިނިސްޓަރު
30 ސެޕްޓެމްބަރު 2026 | ބުދަ 18:20ރަސްމާލެ ވޯޓަރފްރަންޓް މަޝްރޫއަކީ ދައުލަތުން އެއްވެސް ލޯނެއް ނުވަތަ ގެރެންޓީއެއް ދޫނުކޮށް، ޓެކްސްގެ އިތުރުން ޕްރޮޕަޓީ ވިއްކައިގެންނާއި ކުއްޔަށް ދީގެން ބޮޑު އާމްދަނީއެއް ލިބޭނެ ގޮތަށް ފަރުމާކޮށްފައިވާ އިންވެސްޓްމަންޓެއް ކަމަށާއި މި މަޝްރޫއުގެ ސަބަބުން ރާއްޖޭގެ މުޅި ފަތުރުވެރިކަމުގެ ސިނާއަތުން މިހާރު ލިބޭ އާމްދަނީއަށްވުރެ އިތުރު އަދަދެއް ދައުލަތަށް ލިބޭނެ ކަމަށް ފިނޭންސް މިނިސްޓަރު ވިދާޅުވި
ފިނޭންސް މިނިސްޓަރު ހަސަން ޒަރީރު | ރައީސް އޮފީސް
ރަސްމާލެ ވޯޓަރފްރަންޓް އެންޑް މެރީނާ މަޝްރޫއު ތަރައްގީކޮށް ނިމޭ 10 އަހަރުގެ ތެރޭގައި، ދައުލަތަށް އާމްދަނީގެ ގޮތުގައި 11 ބިލިއަން އެމެރިކާ ޑޮލަރު ލިބޭނެ ކަމަށް ލަފާކުރެވޭ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
ދިވެހި ތާރީޚުގައި މިހާތަނަށް ހުށަހެޅުނު އެންމެ ބޮޑު އެއް ބޭރުގެ އިންވެސްޓްމަންޓް ކަމަށްވާ 20 ބިލިއަން ޑޮލަރުގެ މި ބިޔަ މަޝްރޫއު ކުރިއަށް ގެންދިއުމަށްޓަކައި، އަބޫދާބީގެ މަޝްހޫރު އީގަލް ހިލްސް ކުންފުންޏާއެކު ދިވެހި ސަރުކާރުން އެއްބަސްވުމުގައި ސޮއިކޮށްފައިވަނީ މިއަހަރުގެ ސެޕްޓެމްބަރު މަހުގެ 21 ވަނަ ދުވަހު އެވެ.
މީސްމީޑިއާގައި ކުރެއްވި ޕޯސްޓްތަކެއްގައި މިނިސްޓަރު ޒަރީރު ވިދާޅުވީ، މި މަޝްރޫއުން އަހަރަކު އެވްރެޖްކޮށް 1.1 ބިލިއަން ޑޮލަރުގެ އާމްދަނީއެއް ދައުލަތަށް ލިބޭނެ ކަމަށް ބެލެވޭ ކަމަށެވެ. މިއީ ރާއްޖޭގައި މިހާރު ހިންގަމުންދާ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީ އުޅަނދުން ދައުލަތަށް ލިބޭ ޖުމްލަ އާމްދަނީއަށްވުރެ ވެސް އިތުރު އަދަދެއްކަން މިނިސްޓަރު ފާހަގަކުރެއްވި އެވެ. އަދި މިއީ ދައުލަތުގެ މާލީ ހާލަތު ވަރުގަދަކޮށް، ގައުމުގެ ދިގު މުއްދަތުގެ ތަރައްގީއަށް ބޮޑެތި މަގުތަކެއް ފަހިވެގެންދާނެ ކަމެއް ކަމަށް ވެސް އޭނާ ވިދާޅުވި އެވެ.
މި މަޝްރޫއުގެ ދަށުން ދައުލަތަށް އާމްދަނީ ލިބިގެންދާނެ ގޮތްތަކުގެ ތަފްސީލު ހާމަކުރައްވަމުން މިނިސްޓަރު ވިދާޅުވީ، ކަނޑައެޅިފައިވާ ރޭޓުތަކުން ޓީޖީއެސްޓީ ލިބުމުގެ އިތުރުން، އެ ތަންތަން ފުރަތަމަ ފަހަރަށް ވިއްކައިގެންނާއި ކުއްޔަށް ދީގެން ޑިވެލޮޕަރަށް ލިބޭ އާމްދަނީގެ 10 އިންސައްތަ ދައުލަތަށް ލިބިގެންދާނެ ކަމަށެވެ. މީގެއިތުރުން، ޕްރޮޕަޓީތައް ފުރަތަމަ ފަހަރަށް ގަންނައިރު އާއި އޭގެ ފަހުން ވެސް މިލްކުވެރިކަން ބަދަލުކުރާ ކޮންމެ ފަހަރަކު، އެ ތަނެއްގެ އަގުގެ 4 އިންސައްތަ ފީއެއްގެ ގޮތުގައި ދައުލަތަށް ލިބޭނެ ކަމަށް ވެސް ވިދާޅުވި އެވެ.
މި އެއްބަސްވުމުގެ ދަށުން އެއްވެސް ޓެކްސް އިނާޔަތެއް ނުވަތަ ޑިއުޓީ މާފުކޮށްދިނުމެއް ނޯންނާނެ ކަމަށާއި، އަދި ސަރުކާރުން އެއްވެސް ލޯނެއް ނުވަތަ ސޮވެރިން ގެރެންޓީއެއް ދޫނުކުރާނެ ކަމަށް މިނިސްޓަރު ވިދާޅުވި އެވެ. އެހެންކަމުން މިއީ ދައުލަތަށް އެއްވެސް މާލީ ބުރައެއް ނެތި ބޮޑު އާމްދަނީއެއް ކަށަވަރުވެގެންދާނެ މަޝްރޫއެއް ކަމަށާއި ހަމައެއާއެކު، ޕްރޮޕަޓީ ވިއްކައިގެން ލިބޭ ހުރިހާ ފައިސާއެއް ޖަމާކުރާނީ ރާއްޖޭގައި ހުޅުވާ އެސްކްރޯ އެކައުންޓަކަށް ކަމަށް ވެސް ވިދާޅުވި އެވެ. އަދި އެ ފައިސާ ބޭނުންކުރާނީ އެއްބަސްވުމާ އެއްގޮތަށް ރާއްޖޭގެ ބޭންކުތައް މެދުވެރިކޮށް ކަމަށް ވެސް ފިނޭންސް މިނިސްޓަރު ފާހަގަކުރެއްވި އެވެ.
ފިނޭންސް މިނިސްޓަރު ވިދާޅުވި ގޮތުގައި، 500 ހެކްޓަރުގެ މި ބޮޑު ބިން ތަރައްގީކުރުމަށް ހަމަޖެހިފައިވަނީ 10 އަހަރު ދުވަހަށް ބަހާލައިގެން އެކި ފިޔަވަހިތަކަކަށެވެ. މި މަޝްރޫއުގައި މީހުން ދިރިއުޅޭ ގެތަކާއި، ހޮޓާ، ރިސޯޓު، މެރީނާ، ފިހާރަތަކާއި އޮފީސްތަކުގެ އިތުރުން ފެންވަރު ރަނގަޅު ތައުލީމީ އަދި ސިއްހީ ޚިދުމަތްދޭ މަރުކަޒުތައް ހިމެނެ އެވެ. މި މަޝްރޫއު އެއްކޮށް ނިމުމުން އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކުރާނެ ކަމަށް ލަފާކުރެވޭއިރު، ފަތުރުވެރިކަމުގެ ދާއިރާއިން އެކަނިވެސް އަހަރަކު 2 ބިލިއަން ޑޮލަރުގެ އާމްދަނީއެއް އުފެއްދި، ރާއްޖޭގެ އިގުތިސާދަށް ބޮޑު ކުރިއެރުމެއް ލިބިގެންދާނެ ކަމަށް ވެސް ފިނޭންސް މިނިސްޓަރު ވިދާޅުވި އެވެ.
މި މަޝްރޫއު ކުރިއަށް ގެންދިއުމުގެ އެއްބަސްވުން ބާތިލުކުރުމަށް އެދި ސުޕްރީމް ކޯޓަށް މިހާރު ވަނީ ދުސްތޫރީ މައްސަލައެއް ހުށަހަޅާފަ އެވެ. އެ މައްސަލާގައި ބަޔާންކޮށްފައިވަނީ، ގާނޫނުއަސާސީގެ 250 ވަނަ މާއްދާގެ ދަށުން ދައުލަތުގެ މުދަލެއް ކުއްޔަށް ދިނުން ނުވަތަ ދޫކޮށްލުން ކުރިއަށް ގެންދަންވާނީ ގާނޫނީ އޮނިގަނޑެއްގެ ތެރެއިން ކަމަށާއި، ބޭރުގެ ފަރާތަކަށް 99 އަހަރަށް ދައުލަތުގެ ބިން ދޫކުރުމަށް ހުއްދަދޭ އެއްވެސް ގާނޫނެއް މިހާރު ރާއްޖޭގައި ނެތް ކަމަށެވެ.
