ރަސްމާލެ ޕްރޮޖެކްޓްގެ މައްޗަށް ހިނގާނެ ޤާނޫނު އަދި ވުޖޫދުގައި ނެތް: އޭޖީ

ސަރުކާރުން ކުރިއަށްގެންދާ ރަސްމާލެ ޕްރޮޖެކްޓްގެ މައްޗަށް ހިނގާނެ ޤާނޫނު އަދި ވުޖޫދުގައި ނެތް ކަމަށާއި، އެ މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުންކަން ހާމަވެއްޖެ އެވެ.

ބަންޑާރަ ނައިބު އަހްމަދު އުޝާމް އެކްސްގައި ކުރެއްވި ޕޯސްޓެއްގައި ވިދާޅުވީ، ރަސްމާލެ މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި ކަމަށެވެ. އަދި އަމަލީ ގޮތުން މަޝްރޫއު ފެށުމުގެ ކުރިން، އެ އެއްބަސްވުމުގައިވާ ކަންކަމުގެ މައްޗަށް ބިނާކޮށް އިތުރަށް މަޝްވަރާކޮށްގެން ޑެފިނިޓިވް އެގްރީމެންޓްތަކެއްގައި ސޮއިކުރަންޖެހޭނެ ކަމަށް އޭނާ ވިދާޅުވި އެވެ. މީގެ އިތުރުން މިކަމާ ގުޅުންހުރި ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށްވެސް އޭޖީ ފާހަގަކުރެއްވި އެވެ.

Advertisement

އުޝާމް ވިދާޅުވި ގޮތުގައި، ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓުގެ އަގުން ބާކީވާ އަގު އިންވެސްޓްކުރި ފަރާތަށް ސަރުކާރުން ދައްކަންޖެހެ އެވެ. ނަމަވެސް، ރަސްމާލޭގައި ހިންގާ މަޝްރޫއު އެއާ ޚިލާފަށް ހިންގާނީ އަލަށް ހަދާ ރިއަލް އެސްޓޭޓް ޤާނޫނުގެ ދަށުން ކަމަށް އޭނާ ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ސަރުކާރުން މި މަޝްރޫއު ކުރިއަށް ގެންދިއުމުގައި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ނުކުރާނެ ކަމަށް ބަންޑާރަ ނައިބު އަހްމަދު އުޝާމް ވަނީ ވިދާޅުވެފަ އެވެ.

އުޝާމް ހާމަ ކުރެއްވި މައުލޫމާތުގައި ވިދާޅުވެފައިވާ "ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން" ކަމަށް ބުނާ ވާހަކަ އަށް ބައެއް ގާނޫނީ ވަކީލުން ވެސް ވާނީ ކޮމެންޓް ކުރައްވާފަ އެވެ. އެގޮތުން އެމްޑީޕީގެ ލީގަލް ޑައިރެކްޓަރ އަހުމަދު މައުރޫފް އެއަށް ރައްދު ދެއްވާ ވިދާޅުވީ، ފަތުރުވެރިކަމާބެހޭ ޤާނޫނުގެ ދަށުން ނުވަތަ މިހާރު އަމަލުކުރަމުންދާ އެއްވެސް ޤާނޫނެއްގެ ދަށުން ވެސް، އެ ފަޅުގެ ސަރަހައްދު ބޭރުގެ އިންވެސްޓަރަކަށް ދިނުމަށް ކަނޑައަޅާފައި ނުވާކަން މިވަނީ ސާފުވެފައި ކަމަށާއި، އަދި މި މަޝްރޫއު ހިންގައި ބަލަހައްޓާނެ ޚާއްސަ ޤާނޫނު އަދިވެސް އޮތީ އެކުލަވާލުމުގެ މަރުހަލާގައި ކަމަށެވެ. ފުރަތަމަ އެއްބަސްވުމުގައި ސޮއިކުރުމަށްފަހު، އެ އެއްބަސްވުމަށް މަގުފަހިވާނޭހެން ޤާނޫނުތައް ފަހުން ބައްޓަންކުރަނީ ކަމަށެވެ.

އުޝާމް މި ގޮތަށް ވިދާޅުވެފައި މިވަނީ ރަސްމާލެ މަޝްރޫއުގެ ދަށުން ބިންތައް 99 އަހަރަށް ކުއްޔަށް ދިނުމަކީ ހަގީގަތުގައި އެ ބިންތައް ދާއިމީކޮށް ވިއްކާލުން ކަމަށާއި، މި ނިންމުމުގައި ބައިވެރިވި ފަރާތްތަކާ މި ވެރިކަން ނިމުމުން ގާނޫނު އަރާ ހަމަކުރާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެ ރައްދު ދެއްވުމުންނެވެ.

ޕީއެންއެފްގެ ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، 99 އަހަރުގެ މުއްދަތަކީ ރާއްޖޭގެ އެތައް ޖީލެއް ވޭތުވެގެންދާނެ މުއްދަތެއް ކަމަށެވެ. އެގޮތުން، ދަރިންގެ ދަރިންގެ ކާފަ ދަރިންގެ މުސްތަގުބަލާ ހަމައަށް ދާއިރު ވެސް 99 އަހަރު ހަމަވާން ކައިރިވެސް ނުވާނެ ކަމަށާއި، މިއީ އެއްވަނަ ދުނިޔޭގެ ގައުމުތަކުގައި ވެސް ބަލާ "ފްރީހޯލްޑް" އުސޫލުން ހަމަ ދާއިމީކޮށް ބިން ވިއްކާލުން ފަދަ ކަމެއް ކަމަށެވެ. އަދި 99 އަހަރު ފަހުން ގަބުރު ކޮނެގެން މިތަނުގެ ކަންތައްތައް ބަލަން އުޅޭނެ ބަޔަކު ނުތިބޭނެ ކަމަށް ވެސް ޔާމީން ވިދާޅުވި އެވެ.

ރައީސް ޔާމީން ވަނީ މި މައްސަލައިގައި ރައީސް ޑރ. މުހައްމަދު މުއިއްޒުގެ ސަރުކާރުގެ އިސް ދެ ވަޒީރަކަށް ވަރަށް ބޮޑަށް ފާޑުވިދާޅުވެފަ އެވެ. އޭގެ ތެރޭގައި އުޝާމް ވެސް ހިމެނިވަޑައިގަންނަވަ އެވެ. އެގޮތުން ރައީސް މުއިއްޒު ވިދާޅުވި ގޮތަކަށް ކަންކަން ކޮށްދެއްވަން ތިއްބެވި އެންމެ އަރިސް ދެ ބޭފުޅުންނަކީ ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބާއި ބަންޑާރަ ނައިބު އަހުމަދު އުޝާމް ކަމަށެވެ.

އެއީ ގާނޫނުއަސާސީގައި ބުނަނީ މިވަރުގެ ބޮޑެތި ކަންތައްތައް ނިންމާއިރުގައި ކެބިނެޓަށް ގެންދިއުމުގެ އިތުރަށް ހާއްސަކޮށް ބަންޑާރަ ނައިބުގެ ލަފާ ހޯދަން ވާނޭ. ތި ބަންޑާރަ ނައިބަކީ އުޝާމް

ރައީސް ޔާމީން

އެވާހަކަތަކަށް ރައްދު ދެއްވާ އުޝާމް ވިދާޅުވީ، ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކުރީ 2015 ގައި ރައީސް ޔާމީންގެ ވެރިކަމުގައި ކަމަށެވެ.