ރަސްމާލެ މަޝްރޫއާއެކު ކާބަފައިން ދިފާއުކުރި މިނިވަންކަން އަޅުގަނޑުމެން ދޫކޮށްލަނީތޯއެވެ؟

ބައެއް ފަހަރު ރާއްޖޭން ބޭރަށް ކުރެވޭ ދަތުރުތަކުން، އަޅުގަނޑުމެންގެ މި ކުޑަކުޑަ ގައުމަކީ ކިހާ ހާއްސަ ތަނެއްކަން އިހުސާސްކޮށްދެ އެވެ.

ދާދި ފަހުން އިންޑިއާގެ ކެރެލާއަށް ކުރި ދަތުރެއްގައި، ރާއްޖޭގެ ތާރީޚާއި ޖިއޮގްރަފީއާ މެދު ވިސްނާލުމަށް ފުރުސަތު ލިބުނެވެ. އަދި ދިވެހިންނަށް މި ލިބިފައިވާ ނިއުމަތްތަކުގެ އަގު ވަޒަންކުރެވެނީ ކިހާ މިންވަރަކަށްތޯ ސުވާލު އުފެދުނެވެ.

އަޅުގަނޑުމެން މި ދިރިއުޅެނީ މުޅި ދުނިޔެ އެ ތަނަކަށް އައުމަށް ހުވަފެން ދެކޭ ފަދަ ރީތި ގައުމެއްގަ އެވެ.

ދުނިޔޭގެ އެކި ކޮޅުކޮޅުން މީހުން ގަދަ ފިންޏާއި، ބޯ ވިލާތަކުގެ އަނދިރިކަމުގައި މަސްތަކެއް ހޭދަކުރުމަށްފަހު، އެތައް ހާސް ކިލޯމީޓަރެއް ކަޑައްތުކޮށް ރާއްޖެ އަންނަނީ އެމީހުންގެ އުމުރު ދުވަހުގެ ސޭވިންގްސް ހުސްކޮށްލައިގެންނެވެ. އެއީ ހަމައެކަނި ހޫނު މޫސުމާއި، ނޫކުލައިގެ ސާފު މޫދާއި، ހިތްގައިމު ގޮނޑުދޮށްތަކެއްގައި މަދު ދުވަސްކޮޅެއް ހޭދަކޮށްލުމުގެ ބޭނުމުގަ އެވެ.

ނަމަވެސް އަޅުގަނޑުމެން ކޮންމެ ދުވަހަކު ހޭލަނީ މި ހިތްގައިމު މާހައުލަށެވެ.

ރާއްޖޭގެ މޫސުމާއި، ކަނޑުފަޅުތަކާއި، މި ރަށްތަކަކީ މާތްﷲ މި ގައުމަށް ދެއްވާފައިވާ އެންމެ ބޮޑު އެއް ނިއުމަތެވެ.

އެހެންކަމުން، އަޅުގަނޑުމެންގެ މި މިލްކިއްޔާތުން ބައެއް ދޫކޮށްލާއިރު، އެ ދޫކޮށްލެވެނީ ކޮން އެއްޗެއްކަމާއި، އަދި ކިހާ ދިގު މުއްދަތަކަށްކަމާއި ދެން ފަހުން ކަން ވެގެންދާނެގޮތާ މެދު ނުހަނު ބޮޑަށް ސަމާލުވާން ޖެހެ އެވެ.

ތާރީޚުން އިބުރަތް ހާސިލުކުރަންޖެހޭ

ވޭތުވެދިޔަ ގަރުނުތަކުގައި ރާއްޖެއަކީ ބޭރުގެ ފަރާތްތަކުގެ ޝައުގުވެރިކަން އަބަދުވެސް ހުއްޓިފައިވާ ގައުމެކެވެ.

އެގޮތުން 1752 ވަނަ އަހަރު، މަލާބާރު އައްސޭރީގެ ކަންނަންނޫރުގެ އަލީ ރާޖާގެ ލަޝްކަރުން މާލެ ހިފި އެވެ. އެ ފަހަރު ދިވެހި ރަދުން އަސީރުކޮށްގެން ގެންގޮސް، މާލޭގައި އެމީހުންގެ ވެރިކަމެއް ގާއިމުކުރި އެވެ.

އެމީހުން ރާއްޖެ ދޫކޮށް ދިޔައީ އަމިއްލައަކަށް ނޫނެވެ.

ދިވެހިން އެމީހުންނާ ދެކޮޅަށް ހަނގުރާމަކުރި އެވެ.

މުލީގޭ ދޮން ހަސަން މަނިކު (ފަހުން ދޮން ބަންޑާރައިން) އިސްވެ ހުންނަވައި، ބޭރުގެ އިސްތިއުމާރީ ބާރުތައް ބަލިކޮށް، ގައުމުގެ މިނިވަންކަން އިއާދަކުރެއްވީ ގާތްގަނޑަކަށް ހަތަރު މަސް ދުވަހުގެ ހިފެހެއްޓުމަކަށް ފަހުގަ އެވެ. މިއީ ތާރީޚީ ގޮތުން ކަށަވަރުކުރެވިފައިވާ ހަގީގަތެކެވެ.

އަށާރަވަނަ ގަރުނުގެ ކަންނަންނޫރުގެ އަލީ ރާޖާއާއި މިއަދުގެ އިންޑިއާގެ ޖުމްހޫރިއްޔާއާ ސީދާ ގުޅުވުމަކީ ރަނގަޅު ގޮތެއް ނޫނެވެ. އަދި 1975 ވަނަ އަހަރު ސިކިމް އިންޑިއާގެ ބައެއްގެ ގޮތުގައި ހަމަޖެއްސި ފަދައިން، މިއަދުގެ އިންޑިއާއިން ރާއްޖެ ހިފަން އުޅުނުކަމަށް ދެކެވޭ ވާހަކަތަކަށް ބާރުދޭ އެއްވެސް ހެއްކެއް އަޅުގަނޑަށް ފެންނާކަށް ނެތެވެ.

ނަމަވެސް، ތާރީޚުން ލިބޭ ބޮޑު ފިލާވަޅަކީ މިއަދަށް ވެސް މުހިންމު ފިލާވަޅެކެވެ.

ރާއްޖޭގެ ރަށްތަކުގެ ޖިއޮޕޮލިޓިކަލް އަގަކީ އޭގެ ސައިޒަށް ވުރެ މާ ބޮޑު އެއްޗެކެވެ.

އަދި އެކާވީސްވަނަ ގަރުނުގައި، ގައުމެއްގެ މައްޗަށް ބާރާއި ނުފޫޒު ފޯރުވަނީ ހަމައެކަނި ހަނގުރާމަކޮށްގެންނެއް ނޫނެވެ.

އެ ނުފޫޒު އަތުވެދާނެ ގޮތްތަކުގެ ތެރޭގައި އިންވެސްޓްމަންޓްތައް ހިމެނެ އެވެ.

އަސާސީ އުމްރާނީ ވަސީލަތްތަކުގެ ތެރެއިންނެވެ. ބަނދަރުތަކާއި އެއާޕޯޓްތަކުގެ ޒަރީއާއިންނެވެ. ދަރަނީގެ މަޅީގެ ތެރެއިންނެވެ. ރިއަލް އެސްޓޭޓް ވިޔަފާރީގެ ތެރެއިންނެވެ. އަދި ޖީލުތަކަކަށް ދެމިގެންދާ އެއްބަސްވުންތަކުގެ ތެރެއިންނެވެ.

ރަސްމާލެއާ ގުޅޭ ކަންބޮޑުވުންތައް

ދިވެހި ސަރުކާރާއި ޔޫއޭއީގެ އީގަލް ހިލްސް ކުންފުންޏާ ދެމެދު ދާދި ފަހުން ވެވުނު އެއްބަސްވުމަކީ، ކޮންމެ ދިވެއްސަކު ވެސް ސުވާލު އުފައްދަން ޖެހޭ ފަދަ ކަންބޮޑުވުންތަކެއް ހުރި ކަމެކެވެ.

މިއީ ބޭރުގެ އިންވެސްޓްމަންޓްތަކަކީ ގޯސް އެއްޗަކަށް ވާތީއެއް ނޫނެވެ.

ރާއްޖެއަށް އިންވެސްޓްމަންޓް ބޭނުންވެ އެވެ. ވަޒީފާގެ ފުރުސަތުތަކާއި، ބޯހިޔާވަހިކަމާއި، އުމްރާނީ ތަރައްގީއާއި އިގްތިސާދު ސިންދަފާތުކުރުން ބޭނުންވެ އެވެ.

ނަމަވެސް، މިފަދަ މަޝްރޫއުތަކުގެ ބޮޑުމިނާއި އެއްބަސްވުމުގެ މުއްދަތަކީ ނުހަނު މުހިންމު ކަންކަމެވެ.

ސަރުކާރުން ބުނާ ގޮތުގައި ރަސްމާލެއިން ގާތްގަނޑަކަށް 500 ހެކްޓަރުގެ ބިން "މޯލްޑިވްސް ވޯޓާފްރަންޓް އެންޑް މެރީނާ" ތަރައްގީކުރުމަށް ބޭނުންކުރާނެ އެވެ.

މި މަޝްރޫއުގެ ދަށުން ހޮޓާތަކާއި، ރިސޯޓްތަކާއި، ލަގްޒަރީ ބޯހިޔާވަހިކަމާއި، މެރީނާއަކާއި، ފިހާރަތަކާއި، ރެސްޓޯރަންޓްތަކުގެ އިތުރުން ސިއްހީ އަދި ތައުލީމީ ހިދުމަތްދޭ ތަންތަން ގާއިމުކުރާނެ އެވެ. އަދި މި ތަންތަން 99 އަހަރާ ހަމައަށް ދެމިގެންދާ ލީސްހޯލްޑް އުސޫލުން ދޫކުރުމަށް ވަނީ ހަމަޖެހިފަ އެވެ.

99 އަހަރާ މެދު ވިސްނާލައްވާށެވެ.

މިއަދު އުފަންވާ ދިވެހި ކުއްޖެއްގެ މުޅި އުމުރު ހުސްވެގެންދާއިރު ވެސް، އެ ބިމުގެ ކޮންޓްރެކްޓް މުއްދަތު ހަމައެއް ނުވާނެ އެވެ.

މިއީ ފަސް އަހަރެއް ނޫނެވެ.

ފަންސަވީސް އަހަރެއް ވެސް ނޫނެވެ.

މި ދައްކަނީ ގަރުނެއްގެ ވާހަކަ އެވެ.

އަދި 500 ހެކްޓަރަކީ ކުޑަކުޑަ ރިސޯޓް ރަށެއްވެސް ނޫނެވެ.

ސަރުކާރުން ބުނާ ގޮތުގައި މުޅި ރަސްމާލެއަކީ 1،100 ހެކްޓަރުގެ ބިމެކެވެ. އެހެންކަމުން މި މަޝްރޫއަށް މި ދޫކުރަނީ އަލަށް ހިއްކާ ބޮޑު ސަރަހައްދުގެ ގާތްގަނޑަކަށް ދެބައިކުޅަ އެއްބައެވެ.

މިއީ ހަމައެކަނި ނޫސްބަޔާނަކުން ނިންމާލެވޭ ވަރަށް ވުރެ މާ ބޮޑު ކަމެކެވެ.

އިތުރު ކަންބޮޑުވުމެއް

އީގަލް ހިލްސްއިން އެންމެ ފުރަތަމަ މި އެއްބަސްވުން އިއުލާނުކުރިއިރު ބުނެފައިވަނީ، އެތަނުގެ މިލްކިއްޔާތެއް ވިއްކާލާއިރު ނުވަތަ ވާރުތަވާއިރު، އަލުން 99 އަހަރުގެ އާ މުއްދަތެއް ގުނަން ފަށާނެ ކަމަށެވެ.

މިއާއެކު ވަރަށް ބޮޑު ސުވާލެއް އުފެދުނެވެ:

ކޮންމެ ފަހަރަކު މިލްކިއްޔާތު ބަދަލުވާއިރު އަލުން 99 އަހަރު ފެށޭނަމަ، އެ ބިން އަނބުރާ ދައުލަތަށް ލިބޭނީ ކޮން އިރަކުތޯ އެވެ؟

އާންމުންގެ ފާޑުކިޔުންތަކާ ގުޅިގެން، އީގަލް ހިލްސްއިން ވަނީ އެ ބަޔާން އިސްލާހުކޮށް، އެ ލިޔުންކޮޅު އުނިކޮށްފަ އެވެ.

މި ބަދަލުން އެކަނި ވެސް އެނގެނީ، އާންމުން މިފަދަ ކަންކަމަށް ފާރަވެރިވުމުގެ މުހިންމުކަމެވެ.

ސަރުކާރުން ބުނަމުންދަނީ ބިމުގެ މިލްކުވެރިކަން އޮންނާނީ ދިވެހި ދައުލަތަށް ކަމަށާއި، ބޭރުގެ ފަރާތްތަކަށް ބިން މިލްކު ނުކުރެވޭނެ ކަމަށެވެ. އަދި މިލްކިއްޔާތު ބަދަލުކުރެވޭނީ ސަރުކާރުގެ ހުއްދައާއެކު ބަލަންޖެހޭ ކަންކަން ބެލުމަށްފަހު ކަމަށް ވެސް ބުނެ އެވެ. އެހެން ނަމަވެސް މިއީ މިކަމާ ރައްޔިތުން ކަންބޮޑުވުން ފާޅުކުރަން ފެށުމުން ބުނި ވާހަކަތަކެކެވެ. އެއްބަސްވުން ސިއްރު ކޮށްފައި އޮތުމުން އެކަން ޔަގީން ކުރެވޭނެ ގޮތެއްވެސް ނެތެވެ.

އެހެންކަމުން، ގާނޫނީ އެއްބަސްވުން ފެންނަން ނެތް ނަމަ، ހަމައެކަނި ދޭ ޔަގީންކަމަކުން ފުދޭކަށް ނެތެވެ.

ހާއްސަކޮށް، އެތައް ސަތޭކަ ހެކްޓަރެއްގެ ބިމާއި، ގަރުނަކާ ގާތްކުރާ މުއްދަތެއްގެ ވައުދުތަކެއް ހިމެނޭއިރު އެވެ.

އިގްސާދީ ބޮޑެތި ފައިދާތަކެއް ހުރެދާނެ

ސަރުކާރުގެ ހުއްޖަތްތަކަށް ވެސް އިންސާފުވެރިކަމާއެކު އަޑުއަހަން ޖެހެ އެވެ.

ސަރުކާރުން ބުނާ ގޮތުގައި މި މަޝްރޫއުގެ ސަބަބުން އެތައް ހާސް ވަޒީފާއެއް އުފެދި، ބިލިއަނުން ޑޮލަރު ރާއްޖެއަށް ވަދެ، ދައުލަތަށް ބޮޑު އާމްދަނީއެއް ލިބޭނެ އެވެ.

މި މަޝްރޫއު ހިންގާ މައި ކުންފުނީގެ އާމްދަނީގެ 10 އިންސައްތަ އަދި މުއާމަލާތްތަކުގެ 4 އިންސައްތަ ރާއްޖެއަށް ލިބޭނެ ކަމަށް ސަރުކާރުން ބުނެ އެވެ. މީގެ އިތުރުން ޓެކްސްތައް ވެސް ލިބޭނެ އެވެ. އަދި މިއީ ދައުލަތުން ގެރެންޓީ ދީގެން ނުވަތަ ދަރަނި ނަގައިގެން ހިންގާ މަޝްރޫއެއް ނޫން ކަމަށާއި، ޓެކްސްގެ ހާއްސަ ލުއިތަކެއް ވެސް ނުދޭނެ ކަމަށް ސަރުކާރުން ބުނެ އެވެ.

މިއީ ފަހަރުގައި ބޮޑެތި ފައިދާތަކަކަށް ވެދާނެ އެވެ.

ނަމަވެސް، މިފަދަ ބޮޑެތި ފައިދާތަކެއް ހުރި ނަމަ، ދެފުށް ފެންނަ ގޮތަށް ކަންކަން ކުރުން މާ މުހިންމެވެ.

މި އެއްބަސްވުމަކީ ހަގީގަތުގައި ވެސް ރާއްޖެއަށް މިހާ ބޮޑު ފުރުސަތެއް ނަމަ، އެއްބަސްވުމުގެ މުހިންމު މާއްދާތައް ހާމަކުރުމަކީ އާންމުންގެ އިތުބާރު ބޮޑުވާނެ ކަމެކެވެ.

އެގޮތުން ދިވެހިންނަށް އަންނަނިވި ކަންކަން ސާފުވާން ޖެހެއެވެ:

މި ތަންތަނުގެ ފަހު ބަސް ބުނަނީ ކޮން ބައެއްތޯ އެވެ؟

ލީސްހޯލްޑް އުސޫލުން މި ތަންތަން ގަނެވެނީ ކޮން ބަޔަކަށްތޯ އެވެ؟

ވިއްކާލާއިރު ކަން ހިނގާނީ ކިހިނެއްތޯ އެވެ؟

ވާރުތަވާއިރު ކަންތައްވާނީ ކިހިނެއްތޯ އެވެ؟

ކުންފުނިތަކަށް ގިނަ އަދަދެއްގެ މިލްކިއްޔާތު ގަނެވިދާނެތޯ އެވެ؟

އެ ކުންފުނިތައް ފަހުން ބޭރުގެ އެހެން ބަޔަކަށް ވިއްކާލެވިދާނެތޯ އެވެ؟

މަޝްރޫއު ހިންގާ މައި ކުންފުނީގެ މިލްކުވެރިކަން ބަދަލުވެއްޖެނަމަ ވާނީ ކިހިނެއްތޯ އެވެ؟

އެތަނުގައި ވަޒަންވެެރިވާ އެހެން ދީންތަކުގެ މީހުންގެ ހައްގުތައް ހިމާޔަތްކުރަން ނުޖެހޭނެތޯ އެވެ؟

މައި އެއްބަސްވުމުގެ 99 އަހަރު ހަމަވުމުން ވާނީ ކިހިނެއްތޯ އެވެ؟

އަދި ހަގީގަތުގައި ވެސް ރާއްޖޭގެ އިގްސާދަށް މިހާ ބޮޑު ސަރަހައްދެއް ދީގެން ލިބޭނީ ކިހާ މިންވަރެއްތޯ އެވެ؟

މިއީ ޔޫއޭއީއާ ދެކޮޅަށް ކުރާ ސުވާލުތަކެއް ނޫނެވެ.

މިއީ ތަރައްގީއާ ދެކޮޅަށް ކުރާ ސުވާލުތަކެއް ވެސް ނޫނެވެ.

މިއީ ގައުމުގެ މުހިންމު ބިންތައް ޖީލުތަކަކަށް ދޫކޮށްލާއިރު، ކޮންމެ މިނިވަން ގައުމަކުން ވެސް ކުރަންޖެހޭނެ ސުވާލުތަކެވެ.

ވިޔަފާރިކުރަނީ ކޮން ބަޔަކާކަން ދެނެގަންނަންޖެހޭ

މިއަދުގެ ޔޫއޭއީއަކީ ހަމައެކަނި ބޭރު ގައުމުތަކުގައި އިންވެސްޓްކުރާ މުއްސަނދި ގައުމެއް ނޫނެވެ.

އެއީ މެދުއިރުމައްޗާއި، އެފްރިކާއާއި، ރަތްކަނޑާއި، އަދި އިންޑިއާ ކަނޑުގެ ސަރަހައްދުގައި ވެސް އިގްސާދީ އަދި އިސްތިރާޖީ މަސްލަހަތުތަކެއް އޮތް، ނުފޫޒުގަދަ ގައުމެކެވެ.

މީގެ މާނައަކީ ޔޫއޭއީގެ އިންވެސްޓްމަންޓަކީ ބިރުވެރި އެއްޗެކޭ ނޫނެވެ.

ނަމަވެސް، ބޮޑެތި ގައުމުތަކުން އެމީހުންގެ މުހިންމު ބިންތަކާއި ވަސީލަތްތައް ބޭރުގެ ބާރުތަކަށް ދޫކުރާއިރު ގެންގުޅޭ ފަދަ ހަރުދަނާ ސިޔާސަތުތަކެއް ރާއްޖެއިން ވެސް ގެންގުޅެން ޖެހެ އެވެ.

މި އުސޫލަކީ ޔޫއޭއީ، އިންޑިއާ، ޗައިނާ، ވިލާތް ނުވަތަ އެމެރިކާގެ އިންވެސްޓަރަކަށް ވިޔަސް ހަމަހަމަކޮށް ހިނގަންޖެހޭނެ އުސޫލެކެވެ.

މިއީ ވަކި ގައުމަކަށް އަމާޒުކޮށްގެން ދައްކާ ވާހަކައަކަށް ވެގެން ނުވާނެ އެވެ.

މިއީ ގައުމުގެ ސިޔާދަތާއި، ދެފުށް ފެންނަ އުސޫލުތަކާއި، ގައުމީ މަސްލަހަތާ ގުޅޭ ކަމެކެވެ.

ދުނިޔެމަތީގެ މި ސުވަރުގޭގެ އަގު ފައިސާއަކުން ނުކުރެވޭނެ

އަޅުގަނޑު އެންމެ ބޮޑަށް ކަންބޮޑުވަނީ ހަމައެކަނި ހިސާބު އަކުރަކުން ބަޔާން ނުކުރެވޭނެ ކަމަކާ މެދުގަ އެވެ.

ރާއްޖޭގެ ބިމަކީ ހައްދެއްނެތް މިންވަރަށް ލިބިފައިވާ އެއްޗެއް ނޫނެވެ.

އަޅުގަނޑުމެންގެ ފަރުތަކަކީ ވެސް ހުސްނުވާނެ އެއްޗެއް ނޫނެވެ.

އަޅުގަނޑުމެންގެ ފަޅުތަކަކީ ވެސް ހުސްނުވާނެ އެއްޗެއް ނޫނެވެ.

އަޅުގަނޑުމެންގެ ގޮނޑުދޮށްތަކަކީ ވެސް ހުސްނުވާނެ އެއްޗެއް ނޫނެވެ.

އަޅުގަނޑުމެންނަށް ބިން ހިއްކިދާނެއެވެ. ނަމަވެސް ބިން ހިއްކުމަކީ އެތައް ހާސް އަހަރަކުން އުފެދިފައިވާ ފަޅުތަކާއި ކަނޑުގެ ދިރުންތަކަށް ބޮޑެތި ބަދަލުތަކެއް އަންނަ ކަމެކެވެ.

އަދި އިސްތިރާޖީ ގޮތުން މުހިންމު ބިންތަކެއްގެ ބާރު ޖީލުތަކަކަށް ދޫކޮށްލުމުން، މުސްތަގުބަލުގެ ސަރުކާރުތަކާއި ދިވެހި ދަރިންނަށް ވާރުތަވާނީ އެމީހުން ނިންމި ނިންމުންތަކެއް ނޫނެވެ.

މުޅި ދުނިޔޭގައި ވެސް އޮތީ އެންމެ ދިވެހިރާއްޖެއެކެވެ.

އީގަލް ހިލްސްގެ ޗެއާމަން މުހައްމަދު އަލައްބާރަށް ވެސް ރާއްޖޭގެ އަގު އެނގިވަޑައިގަނެ އެވެ. މި މަޝްރޫއު އިއުލާނުކުރައްވަމުން އޭނާ ވިދާޅުވީ ރާއްޖެއަކީ ދުނިޔޭގެ އެހެން އެއްވެސް ތަނަކާ ނުބައްދަލު ރީތިކަމެއް ލިބިފައިވާ، މުޅި ދުނިޔެ ޝައުގުވެރިވާ ތަނެއް ކަމަށެވެ. ބައިނަލްއަގުވާމީ މީޑިއާތަކުގައި އޭނާ ވިދާޅުވެފައިވަނީ، ރާއްޖެއަށް ލިބިފައިވާ ގުދުރަތީ ރީތިކަން ތަޖުރިބާކޮށްލުމަށްޓަކައި ދުނިޔޭގެ މީހުން ކޮންމެ ފަދަ އަގެއް ވެސް ދޭން ތައްޔާރަށް ތިބި ކަމަށެވެ.

ފަހަރުގައި ދިވެހިން ވެސް މި އަގު މިއަށް ވުރެ ބޮޑަށް ވަޒަންކުރަން ޖެހެ އެވެ.

އަޅުގަނޑުމެންގެ ކާބަފައިންނަށް މި ރަށްތައް ވާރުތަވީއިރު، އުސް އިމާރާތްތަކެއް ނުވަތަ ބިލިއަން ޑޮލަރުގެ އަގުތަކެއް ނެތެވެ.

އެހެންނަމަވެސް، އެފަރާތްތަކަށް ވެސް ވަރަށް އަސާސީ ހަގީގަތެއް އެނގިފައިވެ އެވެ.

މިއީ އެމީހުންގެ ގައުމުކަމެވެ.

މިއަދު ސިޔާދަތު ދިފާއުކުރުން ތަފާތު

1753 ވަނަ އަހަރު ރާއްޖެ ދިފާއުކުރުމަކީ މާލެއިން ބޭރުގެ ލަޝްކަރު ހަނގުރާމަކޮށް ބޭރުކުރުމެވެ.

ނަމަވެސް 2026 ވަނަ އަހަރު، ގައުމުގެ މިނިވަންކަން ދިފާއުކުރަނީ ހަތިޔާރަކުން ނޫނެވެ.

އެކަން ކުރަނީ މުއައްސަސާތަކުގެ ޒަރީއާއިންނެވެ.

ރައްޔިތުންގެ މަޖިލީހުގެ ތެރެއިންނެވެ.

ހަރުދަނާ ގާނޫނުތަކުގެ އެހީގަ އެވެ.

ތިމާވެށީގެ ރައްކާތެރިކަމުގެ އުސޫލުތަކުންނެވެ.

ދެފުށް ފެންނަ ނިޒާމުތަކުގެ ތެރެއިންނެވެ.

މިނިވަން މުއައްސަސާތަކުގެ ފާރަވެރިކަމުންނެވެ.

ނޫސްވެރިން ކުރާ އުނދަގޫ ސުވާލުތަކުންނެވެ.

އަދި ރައްޔިތުންގެ ނަމުގައި ސޮއިކުރެވެނީ ކޮން އެއްޗެއްގައިތޯ ބަލަން ބޭނުންވާ އާންމު ރައްޔިތުންގެ ސަބަބުންނެވެ.

އަޅުގަނޑު މި ދަންނަވަނީ އީގަލް ހިލްސްއިން ރާއްޖޭގައި އިންވެސްޓްކޮށްގެން ނުވާނެއެކޭ ނޫނެވެ.

އަޅުގަނޑު މި ދަންނަވަނީ މިއަށް ވުރެ މާ ސާދާ ވާހަކައެކެވެ.

ގައުމުގެ މުހިންމު އެތައް ސަތޭކަ ހެކްޓަރެއްގެ ބިން 99 އަހަރަށް ދޫކޮށްލާއިރު، އެ އެއްބަސްވަނީ ކޮން ކަމަކަށްކަން ސާފުކޮށް އެނގުމަކީ ދިވެހި ރައްޔިތުންނަށް ލިބިގެންވާ ހައްގެކެވެ.

އެއްބަސްވުމުގެ މުހިންމު މާއްދާތައް ހާމަކުރައްވާށެވެ.

ރައްކާތެރިކަމުގެ ފިޔަވަޅުތައް ކިޔައިދެއްވާށެވެ.

99 އަހަރު ފަހުން ވާނެ ގޮތް ބަޔާންކޮށްދެއްވާށެވެ.

މިލްކިއްޔާތު ބަދަލުކުރެވޭނެ ގޮތްތައް ސާފުކޮށްދެއްވާށެވެ.

އަދި މީގެ ބަދަލުގައި ރާއްޖެއަށް ލިބޭނީ ކޮން އެއްޗެއްކަން ބުނެދެއްވާށެވެ.

މި ނިންމުމުގެ ސަބަބުން އަޅުގަނޑުމެންގެ ދަރިންނާއި މުސްތަގުބަލުގެ ޖީލުތަކަށް އޮތް ފުރުސަތުތައް ހަނިވުމުގެ ބަދަލުގައި، އެކަމުން ލިބޭނެ ފައިދާ ބޮޑުކަން ސާބިތުކޮށްދެއްވާށެވެ.

އިގްސާދީ ތަރައްގީއަކީ އަންނަން އޮތް ޖީލުތަކަށް އަޅުގަނޑުމެން ދޫކުރާ ތަރިކަ މުއްސަނދިކޮށްދޭ އެއްޗަކަށް ވާންޖެހޭނެ އެވެ. އެއީ އެ ތަރިކަ މަޑުމަޑުން ހުސްކޮށްލާ އެއްޗަކަށް ވެގެން ނުވާނެ އެވެ.

މި ރަށްތަކުގެ އަގު ބިލިއަން ޑޮލަރަށް އެރުމުގެ މާ ކުރިން ވެސް، އަޅުގަނޑުމެންގެ ކާބަފައިންނަށް މި ރަށްތަކުގެ އަގު ވަޒަންކުރިއެވެ. އޭގެ އެންމެ ބޮޑު ހެއްކަކީ، މި ލޮބުވެތި ގައުމު ބޭރު ބައެއްގެ އަތްމައްޗަށް ދިޔަނުދީ ދިފާއުކުރުމުގައި ޖާނާއި ފުރާނައިންވީ ގުރުބާނީ އެވެ.

އަޅުގަނޑުމެން ވެސް އެކަން ދަންނަން ޖެހެ އެވެ.

ރާއްޖެއަކީ ހަމައެކަނި އެންމެ ބޮޑު އަގުދޭ އިންވެސްޓަރަކަށް ވިއްކާލަން އޮތް މުދަލެއް ފަދަ އެއްޗެއް ނޫނެވެ. އެންމެ އަވަސް އިމާރާތްތައް އަޅާ ބަޔަކު ހޯދުމަށްފަހު ތަރައްގީގެ ނަމުގައި ދެވެން އޮތް ތަނެއް ނޫނެވެ.

މިއީ އަޅުގަނޑުމެންގެ ވަޒަނެވެ.

އަދި ތިމާގެ އަމިއްލަ ވަޒަނުގެ މުސްތަގުބަލާ މެދު ނިންމާ ބޮޑެތި ނިންމުންތަކަކީ، އެ ގެ ވާރުތަވާން ތިބި މީހުންނަށް ނޭނގި ނިންމައިގެންވާނެ ނިންމުންތަކެއްވެސް ނޫނެވެ.