ރަސްމާލެއިން އިމާރާތް މިލްކުކޮށްދީފައި ބިމަށް ބާރު ނުފޯރުވޭނެ ކަމަށް ބުނުމަކީ ރައްޔިތުން ގަމާރުންނަށް ހެދުން: މެންބަރު އައްބާސް
29 ސެޕްޓެމްބަރު 2026 | އަންގާރަ 08:07ރަސްމާލެއިން ބިން މިލްކުނުވާ ގޮތަށް އިމާރާތްތައް ވިއްކުމަކީ ރައްޔިތުންނަށް އޮޅުވާލުން ކަމަށް ވިދާޅުވެ، މަޖިލިސް މެންބަރު އައްބާސް ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައި. ބޭރުގެ ފަރާތްތަކަށް ރާއްޖޭގެ ބިންތައް ދިގު މުއްދަތަށް ދިނުމާ ދެކޮޅަށް ވަކާލާތު ކުރައްވަމުން، މިފަދަ މަޝްރޫއުތައް ވަގުތުން ހުއްޓާލުމަށް އޭނާ ވަނީ ގޮވާލައްވާފައި
ވެލިދޫ ދާއިރާގެ މެންބަރު މުހައްމަދު އައްބާސް | ރައްޔިތުންގެ މަޖިލިސް
ރަސްމާލެ މަޝްރޫއުގެ ދަށުން ބިން މިލްކުނުވާ ގޮތަށް އިމާރާތް މިލްކުކޮށް ދިނުމަށްފަހު، އެ ބިމަށް ބާރު ނުފޯރުވާނެ ކަމަށް ބުނުމަކީ ދިވެހި ރައްޔިތުންނަކީ ތަނެއްދޮރެއް ނުދަންނަ ގަމާރުން ކަމަށް ދެކިގެން ސަރުކާރުން ދައްކާ ވާހަކައެއް ކަމަށް ވިދާޅުވެ، ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވަރަށް ބޮޑަށް ފާޑުވިދާޅުވެއްޖެ އެވެ.
މެންބަރު އައްބާސް އެކްސް ގައި ހިއްސާކުރެއްވި މެސެޖެއްގައި ވިދާޅުވީ، ފާއިތުވި 3 އަހަރު ދުވަހުގެ ތެރޭގައި ރައްޔިތުން ބިކަކޮށް، ޤައުމުގެ ވިޔަފާރިތައް ފުނޑާލުމަށްފަހު ދައުލަތަށް ލިބުނުހާ ބޭރު ފައިސާއެއް ހަރަދުކޮށްގެން ރަސްމާލެ ހިއްކީ ރައްޔިތުންގެ ބޯހިޔާވަހި ކަމަށް ދާއިމީ ހައްލެއް ހޯދައިދިނުމުގެ ނަމުގައި ކަމަށެވެ. އަދި އެތަނުން އެންމެ ވެލިފުކެއްގެ މިންވަރު ވެސް ކުރު މުއްދަތަކަށް ވިޔަސް ނުވަތަ ދިގު މުއްދަތަކަށް ވިޔަސް އެއްވެސް ފަރާތަކަށް ކުއްޔަށް ނުދޭނެ ކަމަށް ސަރުކާރުން ވައުދުވެފައިވާ ކަމަށެވެ.
މީގެއިތުރުން، އައްބާސް ވިދާޅުވީ ދިވެހިރާއްޖެ ދެވަނަ ޑުބާއީއަށް ނުވަތަ ސިންގަޕޫރަށް ހަދަން ބޭނުންވަނީ ޔަހޫދީންގެ ވިސްނުމާއި ފިކުރު ޤަބޫލުކުރާ އަދި ޔަހޫދީންނަށް ފަންޑުކުރާ ފަރާތްތަކަށް މި ޤައުމުގެ ބިންތައް ދިގު މުއްދަތަކަށް ވިއްކައިގެން ނޫން ކަމަށެވެ. އަދި މި ޤައުމުގައި ޔަހޫދީންގެ އަވަށެއް ބިނާކުރަން ދިވެހި ރައްޔިތުން އެއްގޮތަކަށް ވެސް ބޭނުންނުވާ ކަމަށް އޭނާ ވިދާޅުވި އެވެ.
މިކަންކަމަށް އިޝާރާތް ކުރައްވައި މެންބަރު އައްބާސް ވަނީ މިހާރުން މިހާރަށް އެ މަސައްކަތްތައް ހުއްޓާލުމަށް ސަރުކާރަށް ގޮވާލައްވާފަ އެވެ.
ސޯޝަލް މީޑިއާގައި މީހަކު ކޮށްފައިވާ ޕޯސްޓަކަށް ރައްދު ދެއްވަމުން މިނިސްޓަރު މުއްތަލިބު ވިދާޅުވީ، ރަސްމާލެއިން ޕްރޮޕަޓީ ގަންނަ ފަރާތްތަކަށް މިލްކުވާނީ ހަމައެކަނި އެ ޕްރޮޕަޓީ ކަމަށާއި، އެ ޕްރޮޕަޓީ ބިނާކޮށްފައިވާ ބިމަކީ ދިވެހި ދައުލަތުގެ މިލްކިއްޔާތެއް ކަމަށެވެ. މުއްތަލިބުގެ މި ވާހަކަތަކާ ގުޅިގެން ވަރަށް ގިނަ ރައްޔިތުންގެ ފާޑުކިޔުންތައް އަމާޒުވެފައިވެ އެވެ.
