ތަރައްގީގެ ނަމުގައި ވިޔަސް ޞިހްޔޫނީންގެ އަތްމައްޗަށް ރާއްޖޭގެ ބާރު ދޫކޮށެއް ނުލެވޭނެ: ޝެއިޚް އިމްރާން
30 ސެޕްޓެމްބަރު 2026 | ބުދަ 16:52ރަސްމާލެ ތަރައްގީކުރުމަށް ޔޫއޭއީގެ ކުންފުންޏަކާ ހަވާލުކުރި މުއާމަލާތުގެ ފުރިހަމަ މައުލޫމާތު ހާމަކުރުމަށް ގޮވާލައްވައި، ރާއްޖޭގެ ބާރުތައް ޞިހްޔޫނީންގެ އަތްމައްޗަށް ދޫކޮށްނުލެވޭނެ ކަމަށް ޝެއިޚް އިމްރާން ވިދާޅުވި. މި މަޝްރޫއުގެ މައުލޫމާތުތައް ބަދަލުވަމުންދާތީ އެކަމުގައި ނުރައްކާތެރި ކަންތައްތަކެއް ފޮރުވިފައި ހުރިކަމުގެ ކަންބޮޑުވުން ފާޅުކުރައްވައި، މިއީ އަންނަން އޮތް ޖީލުތަކުގެ ހައްގުތަކާ ގުޅިފައިވާ ކަމެއްކަން އޭނާ ފާހަގަކުރެއްވި. އެހެންކަމުން ހުރިހާ ތަފްސީލެއް ހާމަކުރުމުގެ ކުރިން މި މުއާމަލާތް ކުރިއަށްގެންގޮސްގެން ނުވާނެ ކަމަށް އިމްރާން ވިދާޅުވި
ފުލުހުންގެ ޚާއްސަ ރަސްމިއްޔާތެއްގައި އަދާލަތު ޕާޓީގެ ކުރީގެ ރައީސް އަދި ކުރީގެ ހޯމް މިނިސްޓަރު ޝެއިޚް އިމްރާން އަބްދުﷲ ވާހަކަ ދައްކަވަނީ - ފައިލް ފޮޓޯ | ރައީސް އޮފީސް
ތަރައްގީގެ ނަމުގައި ވިޔަސް އަދި ވިޔަފާރީގެ ނަމުގައި ވިޔަސް ޞިހްޔޫނީންގެ އަތްމައްޗަށް ދިވެހިރާއްޖޭގެ ބާރުތައް ދޫކޮށްނުލެވޭނެ ކަމަށް އަދާލަތު ޕާޓީގެ ކުރީގެ ރައީސް އަދި ކުރީގެ ހޯމް މިނިސްޓަރު ޝެއިޚް އިމްރާން އަބްދުﷲ ވިދާޅުވެއްޖެ އެވެ.
ޝެއިޚް އިމްރާން މިހެން ވިދާޅުވީ އެކްސްގައި ބުދަ ދުވަހު ކުރެއްވި ޕޯސްޓެއްގަ އެވެ.
ޝެއިޚް އިމްރާން ވިދާޅުވީ ރާއްޖެ ތަރައްގީގެ މަގުގައި ކުރިއަށް ދާނީ މާތްވެގެންވާ އިސްލާމްދީނުގެ މަތީގައި، ދިވެހިންގެ ގޮތުގައި ތިބެގެން ކަމަށެވެ. އަދި ވިދާޅުވީ، ޞިހްޔޫނީންގެ އަތްމައްޗަށް ރާއްޖޭގެ ބާރު ދޫކޮށްލުމަކީ ދިވެހިންގެ ނަމުގައި އެއްވެސް ސަރުކާރަކަށް ކުރުމުގެ ހައްގު އޮތް ކަމެއް ނޫން ކަމަށެވެ.
މީގެއިތުރުން، މާތް ﷲގެ ވާގިފުޅާއެކު އެފަދަ ކޮންމެ ރޭވުމެއް ބޭޒާރުކޮށް ހުއްޓުވާނެ ދިވެހި ދަރިން އަބަދުވެސް ތިބޭނެ ކަމަށް ވެސް ޝެއިޚް އިމްރާން ވިދާޅުވި އެވެ.
ޝެއިޚް އިމްރާން މިހެން ވިދާޅުވެފައިމިވަނީ ރައީސް ޑރ.މުހައްމަދު މުއިއްޒުގެ ސަރުކާރުން ރަސްމާލެ، އިންޓަގްރޭޓެޑް އައިލެންޑް މަންޒިލެއްގެ ގޮތުގައި "މޯލްޑިވްސް ވޯޓަރފްރަންޓް އެންޑް މެރީނާ" ތަރައްގީ ކުރުމަށް ޔޫއޭއީގެ އީގަލް ހިލްސް ކުންފުންޏަށް އެއްކޮށް ދިނުމާ ގުޅިގެންނެވެ.
މިކަންބޮޑުވުންތައް އުފެދިފައިވާ މިދަނޑިވަޅުގައި އަންގާރަ ދުވަހު ޝެއިޚް އިމްރާން ވަނީ، ރަސްމާލެ މުއާމަލާތުގެ ފުރިހަމަ މައުލޫމާތު ސަރުކާރުން ދިވެހި ރައްޔިތުންނަށް ހިއްސާކުރުމަށް ވެސް ގޮވާލައްވާފަ އެވެ.
ރަސްމާލެ މުއާމަލާތުގައި ހިމެނޭ ކުންފުނިން ހާމަކުރި މައުލޫމާތު އެއްދުވަސްތެރޭ ބަދަލުކުރީމުން އެނގެނީ މިކަމުގައި އަޑިނޭނގޭ ނުރައްކާތެރި އެތައްކަމެއް ފޮރުވިފައި ހުރިކަން ކަމާއި، މިއީ އަންނާންއޮތް ދިވެހި ޖީލުތަކުގެ ހައްގު ހިމެނޭ މުއާމަލާތެއް ކަމަށް ޝެއިޚް އިމްރާން ވިދާޅުވި އެވެ. އަދި މިކަމުގެ ފުރިހަމަ މައުލޫމާތު ހާމަކުރުމުގެ ކުރިން މި މުއާމަލާތް ކުރިއަށްގެންދެވިގެން ނުވާނެ ކަމަށް ވިދާޅުވި އެވެ.
