"އެ ވެރިން އެ ވެރިންނަށް" ހީނ ހީނ ހަލާކު!

މީހުން ބުނެ އުޅެ އެވެ. ގެންދަވާނީ ދައްކަވާންހުރި ތަނެއް ދައްކަވާފަ އެވެ. "ހަކުރު ދެންޏާ މުޅިން ވެސް ތިބޭނީ ބޮޑުބޭބޭންނެވެ". އެއީ ބޮޑު ހަގީގަތެއްކަމުގެ ލައްކަ ކުޅި ސަމާ މިދަނީ ފެންނަމުންނެވެ. އަންނާން އޮތް ޖީލުތަކަށް ވެސް މިއީ ރަނގަޅު އިބުރަތެކެވެ. ޕީއެޗްޑީ ހައްދަވާ ބޭފުޅުންނަށް ވެސް ރަނގަޅު ތީސިސްއަކަށް ފުދޭނޭ އެއްޗެކެވެ.

އެއީ ރައީސް ޔާމީންގެ ވެރިކަމެވެ. އެވެރިކަމުގައި ކަން ހިނގާދިޔަ ގޮތުގެ ވާހަކަ އިތުރަކަށް ދައްކާކަށް ނެތީމެވެ. ރައްޔިތުންގެ މަޖިލީހުގެ ވިލިނގިލީ ދާއިރާގެ ކުރީގެ މެންބަރު ސައުދު ހުސައިން އެކްސް އެކައުންޓުގައި ކުރެއްވި ޕޯސްޓުން އެކަނި ވެސް ހިސާބަކަށް އެވެރިކަން ސިފަކޮށްލާކަށް އުނދަގުލެއް ނުވާނެ އެވެ.

ސައުދު ވިދާޅުވި ވާހަކަފުޅު ހަމަ އެގޮތައް ނަކަލު ކޮށްލާނަމެވެ.

”ޕްރޮސެކިއުޓަރ ޖެނަރަލްގެ ވާހަކަ ރައީސް ޔާމީން ދައްކަވާ އަޑު އިވުމުން ހިތަށް އަރަ އެވެ. މިހާރު ދިވެހިރާއްޖޭގައި ފަހުގެ ތާރީޚްގައި ވެރިކަން ކޮއްފައިވާ ބައެއް ބޭފުޅުންނަށް އެބޭފޫޅުން ވެރިކަން ކުރެއްވި ގޮތް ހަދާންނެތުނީތޯ އެވެ. ނޫނީ ރައްޔިތުންނަކީ މޮޔައިން ކަމަށް ދެކި ހިތުހުރި ގޮތަކަށް ވާހަކަ ދައްކަވަނީތޯ އެވެ! 2013-2018 އަށް ދިވެހިރާއްޖޭގައި ވެރިކަން ކުރެއްވި ބޭފުޅަކު އެކިއެކި ފޯރަމްތަކުގައި ދައްކަވާ ވާހަކަތަކުން ފާހަގަވަނީ އެބޭފުޅާ އަދި މި ގައުމުގައި ވެރިކަން ނުކުރާކަހަލަ އެވެ. ޔާމީންގެ ވެރިކަމަކީ ދިވެހި ތާރީޚުގައި ހިނގާދިޔަ އެންމެ އަނިޔާވެރި، ކޮރަޕްޓު، އަދި ޚުދުމުޚްތާރު ވެރިކަމެވެ! ޕްރޮސެކިއުޓަރ ޖެނެރަލް ބޭނުންކޮށްގެން އެބޭފުޅާ އާއި ޚީޔާލުތަފާތުވާ އެންމެންނަށް ނުހައްގު ދައުވާ ކުރުމާއި، ސިޔާސީ ގިނަ ބަޔަކު ފްރޭމްކޮށް ޖަލަށްލާ ހިންގެވީ އަދިރި ދައުލަތެކެވެ! ވިސްނާ ބަޔަކަށް އިބުރަތެއް!"

ސައުދު އެ ވިދާޅުވި ވާހަކަތައް އާއްމު ރައްޔިތުން ރައީސް ޔާމީންގެ ވެރިކަމުގައި ދެއްކި އެވެ. މުޒާހަރާތަކުގައި ގޮވާ ނެގި އެވެ. ލަވަތައް ހަދައިގެން އޭރުގެ ހާލަތު ސިފަކޮށް ވެސް އުޅުނެވެ. އެކަމަކު އެ ވާހަކަތައް އޭރު ޤަބޫލު ނުކުރީ އޭރުގެ ޕީޕީއެމް މީހުންނެވެ. އޭގެ ތެރެއިން ވެސް އެ ޕާޓީގެ އިސް ސަފުގައި ތިބި މީހުންނެވެ. ޚާއްސަކޮށް މިއަދު ވެރިކަން ކުރާ ޕީއެންސީގެ މަތިފަޑީގައި ތިބި މީހުންނެވެ.

އޭރު ޔާމީން ވަރެއް ނެތިގެން އުޅުނު އެ ވެރިންގެ ނަޒަރުގައި ޔާމީނަކީ ހުދުފޮތިކޮޅެކެވެ. އެހާމެ ސާފު ބޯކިރު ފޮދެކެވެ. "ޒާހިދު ވަރައަވެރި" ބޭފުޅެކެވެ. "ދެވަނަ އެއް ނުވާ އިންސާފްވެރި ވެރިއެކެވެ". "ޤައުމުގެ ތަރައްޤީގެ ބާނީއެވެ." "ރައްޔިތުންގެ ލޯލާރިއެއްގައި ވެސް ނުޖެހޭ ފަސްބައި ސާފު" ބޭފުޅެކެވެ. "ހިތްތިރި"، "ހާމަކަންބޮޑު ދެފުށް ފެންނަ ވެރިކަމެއް" ކުރެއްވި ބޭފުޅެކެވެ. ކުރުކޮށް ފޮނިކޮށް ބުނަނީނަމަ "ރާއްޖޭގެ ތާރީޚުގައި ވެސް އެފަދަ ދެވަނައެއް ނުވާނޭ އިޚްލާސްތެރި، ރައްޔިތުންނަށް ޓަކައި ނަމޫނާ ވެރިކަމެއް ކޮށްދިން ވެރިއެކެވެ".

އެކަމަށްޓަކައި އެވެރިން ތިބީ ޔާމީނަށް ޓަކައި ޤުރުބާން ވާށެވެ. ޖާނާއި މާލުންނެވެ. ޔާމީނަށް ޓަކައި ކޮންމެ ފަދަ ތުރާލެއް އުފުލަން ވެސް ހިތުން ރުހުމުން ޤަބޫލު ވެގެންނެވެ. ޔާމީނުގެ ބަދަލުގައި ޖަލުގައިން އޮންނަން ވެސް އޯކޭ ވެގެންނެވެ.

ބަދަލުވީ ވެރިކަމެވެ. ޔާމީނަށް ވެރިކަން ގެއްލުނީ އެވެ. ޔާމީނުގެ މޯހިރުން ވެރިކަމަށް އެވެރިންގެ ފަޅިން ޔާމީނު ނޫން މީހަކަށް އާދެވުނީ އެވެ. މުއިއްޒުއަށް ވެރިކަން ލިބުނީ އެވެ. އެ ވެރިންނަށް ބާރު ލިބުނީ މުއިއްޒުގެ ފަރާތުންނެވެ. އެއްކަލަ ޔާމީން ގޯސްވީ އެވެ. ރާގު ބަދަލުވީ އެވެ. ކީހާޅެން ފަރިއްސަށް ވީ އެވެ. ތޮށިގަނޑު ފަޅާލާފައި ހަމައިސްކޮޅަށް ދެމިލީ އެވެ. ކުރިން އިދިކޮޅު މީހުން ދެއްކި ހުރިހާ ވާހަކައެއް ހަގީގަތެއް ކަމަށް އެވެރިން ބުނަން ފެށީ އެވެ. ކުރިން ނޭނގިހުރި އިތުރު ވާހަކަތަކާއެކުގަ އެވެ. އެއީ ހަގީގަތްކަމަށް ދަލީލު ކޮށްދޭނެ ހެކިތަކާއެކުގަ އެވެ. އެ ވެރިން ވެސް ބައިވެރިވެގެން ހިންގި ކަންތައްތަ ކާވެސް އެކުގަ އެވެ.

އިތުރަށް އެ ވާހަކަތަކެއް އަހަރެން ދައްކާކަށް ނެތީމެވެ. ރައީސް ޔާމީނަށް ދެވަނަ ދައުރެއް ހޯދައިދީފައި ނޫނީ ނުނިދާނެ ކަމަށް ވިދާޅުވި ފަލާހުގެ އެކަނި ވާހަކައިން މިފަހަރު ފުއްދާލާނަމެވެ. ފަލާހު އެކްސް އެކައުންޓުގައި ވިދާޅުވި ވާހަކަތައް ބަހުން ބަހަށް ނަކަލު ކޮށްލާނަމެވެ. ފަލާހު ވިދާޅުވި އެވެ.

"އިންސާނާގެ ލަދުހަޔާތް ނެތިއްޖެނަމަ ދެން ހަމަ ކޮންމެފަދަ ވާހަކައެއް ވެސް އޭނާ ދައްކަފާނެ އެވެ. ކޮރަޕްޝަން ހިންގުމުން ދުނިޔޭގެ ފެންވަރުގެ ރެކޯޑު ރާއްޖޭގައި ހެދީ މީނާ އިސްވެ ހުރެ ހިންގިވެރިކަމުގައިކަމާއި، އޭރުގެ އެންޓި ކަރަޕްޝަން ކޮމިޝަން މިކަލޭގެ ބޭއްވީ ކޯމާގައި ކަން ނުދަންނަ މީހަކު މި ޤައުމުގައި އުޅެނީތޯ އެވެ. ހަމަ އަންތަރީސް ވެއްޖެ އެެވެ! ގ. ދޫވެހި ނަމުގައި އެޅި ގަނޑުވަރާއި، މިހާރު ހަމަ އެނަމުގައި ހެންވޭރު ކޮޅުގައި އަޅުއްވައިގެން އުޅޭ 18 ބުރީގެ 5 ތަރީގެ ހޮޓަލަކީ ކޮންތަނެއް ދަވާލައިގެން އެޅި ތަންތަންތޯ ސުވާލު ކުރާމީހުން މަދީތޯ އެވެ. ސިންގަޕޫރާއި ދުބާއީގެ ފިކްސްޑިޕޮޒިޓް އަދި އިންވެސްޓްމަންޓް އެކައުންޓުތަކުގައި ހުރި ޑޮލަރުތަކުގެ މަތީން ހަމަ ގައިމު ވެސް އެމްޑީޕީ މީހުން ހަނދާން ނުނެތޭނެ ނޫންތޯ އެވެ؟ ރައްޔިތުން ކަންބޮޑުވެ ފިތިބާރުވެ، ރުޅިގަދަވެ ތިމާ މީހާ ވެރިކަމުން ބޭލި ހަނދާން ނެތުނީ ހެއްޔެވެ؟ އަޅެ މަނިއްޕުޅުގެ ވެރިކަން ކުރިއިރު ސުޕްރީމް ކޯޓްގެ ބެންޗު ބޭނުން ގޮތަކަށް ބަދަލުނުކުރޭތޯ އެވެ؟ ސުޕްރީމް ކޯޓުން ޓިނު ނަގައިގެން އެ ކޯޓުގެ އިސް ފަނޑިޔާރުން ހައްޔަރު ނުކުރޭތޯ އެވެ؟ ޖަލަށް ނުގެންދޭ އެވެ؟ ޕާޓީ ބަދަލުކުރީމަ މަޖިލިސް މެންބަރުންގެ ގޮނޑި ގެއްލޭ ގޮތަށް ގާނޫނު ފާސްނުކުރޭތޯ އެވެ؟ ހުރިހާ މިނިވަން މުއައްސަސާތަކެއް ޕެރަލއިޒްކޮށް ނުލައްވަންތޯ އެވެ؟ އޭރު ގައުމުގައި ތިބި ހުރިހާ ސިޔާސީ ލީޑަރުން ހައްޔަރު ނުކުރޭތޯ އެވެ؟ ⁠އޭރުގެ ނާއިބު ރައީސުންވަކިނުކުރޭތޯ އެވެ؟ ⁠އުއްތަމަ ފަޑިޔާރު ވަކިނުކުރޭތޯ އެވެ؟ މިވާހަކަ ދައްކާނެ މީހުން މިއަދު ނެތްކަމަށް ހީވީމަ 'ރައީސް ޔާމީން' ހުދުކާފޫރަށް ބަދަލުވެއްޖެ ނޫންތޯ އެވެ؟ އެހެންވެ އަމިއްލަ އަމިއްލަ އަށް ތިމަންނާއަކީ ރައީސް ޔާމީނޭ ނިދީގައި ވެސް ތިޔަ ކިޔުއްވަނީ ނޫންތޯ އެވެ!"

ބުނާނެ އެއްޗެއް ނެތެވެ. މިފެންނަނީ ދުނިޔޭގެ ދެކޮޅެވެ. ދުނިޔެ ދައްކަމުންދާ ކުލަ ބަދަލުވުންތަކުގެ ލާމަސީލު މިސާލެކެވެ. މިއީ އަންނާން އޮތް ޖީލުތަކަށް އިބުރަތުން ފުރިގެންވީ ސާފު މަންޒަރު ތަކެކެވެ. އިއްޔެއާ މިއަދު ފެންނަ ބޮޑު މަންޒަރެވެ. އެވެރިން އެވެރިންނަށް އެދައްކާ ވާހަކަތަކުން ހަމަ ހީނ، ހީނ ހަލާކެވެ.