ރައީސް މުއިއްޒު ވެވަޑައިގެންނެވި ވައުދުތައް ދޮގު ވައުދަކަށް ނަހައްދަވާ، ބޮޑު ޕަސެންޓެއް މިއަދާ ހަމައަށް ރަނުން ރަނަށް ފުއްދަވާފައިވާތީ ރައްޔިތުން ތިބީ އުފަލުން: ފަލާހު
17 ސެޕްޓެމްބަރު 2026 | ބުރާސްފަތި 09:50ރައީސް މުއިއްޒު ވެވަޑައިގެންނެވި ވައުދުތައް ފުއްދަވަމުންދާތީ ރައްޔިތުން ތިބީ އުފަލުން ކަމަށް މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވަނީ ވިދާޅުވެފައި. ނަމަވެސް، ސަރުކާރުން ވައުދުތައް ނުފުއްދައި މަޝްރޫއުތައް ހުއްޓިފައިވާތީ އާންމުންގެ ފާޑުކިޔުންތައް އަމާޒުވަމުންދާކަން ފާހަގަކުރެވޭ
ކޮންގްރެސް ޕާޓީގެ މަތީ މަޖިލީހުގެ މެންބަރުންގެ އެދިވަޑައިގަތުމުގެ މަތީން ކުރިއަށްގެންދިޔަ ބައްދަލުވުމުގައި މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވާހަކަ ދައްކަވަނީ | ޕީއެންސީ
ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުތައް ދޮގު ވައުދުތަކަކަށް ނަހައްދަވައި، އޭގެ ތެރެއިން ބޮޑު އިންސައްތަ އެއް މިއަދާ ހަމައަށް ރަނުން ރަނަށް ފުއްދަވާދެއްވާފައިވާތީ ރައްޔިތުން ތިބީ އުފަލުން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވިދާޅުވެއްޖެ އެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކޮންގްރެސްގައި، 2028 ވަނަ އަހަރުގެ ރިޔާސީ އިންތިޚާބުގެ ޕީއެންސީ ޓިކެޓް ރައީސް މުއިއްޒަށް އެރުވުމަށް ހުށަހެޅި ގަރާރަށް ވާހަކަދައްކަވަމުން ފަލާހު ވިދާޅުވީ، މުއިއްޒު ވެރިކަމަށް ގެނައުމަށްޓަކައި ރައްޔިތުން ވޯޓު ދިނީ އެންމެ ރަނގަޅު ވިސްނުމުގައި ކަމަށާއި، އެއީ އެޅުނު އެންމެ ރަނގަޅު ފިޔަވަޅުކަން މިއަދު ރައްޔިތުން ގަބޫލުކުރާ ކަމަށެވެ.
އެގޮތުން 2023 ވަނަ އަހަރު ޕީއެންސީ ވަރަށް ކުޑަ ޕާޓީއެއްގެ ގޮތުގައި އޮތްއިރު އެ ޕާޓީން ދެއްކި ކެންޑިޑޭޓަކީ ރާއްޖޭގެ ވެރިކަން ކުރަން އެވަގުތު ނެރެވޭނެ އެންމެ ރަނގަޅު ކެންޑިޑޭޓް ކަމަށް ރައްޔިތުން ޤަބޫލުކުރި ކަމަށެވެ.
މިއަދު ދިވެހި ރައްޔިތުން އެބަ އުފާކުރޭ. އެ އުފާކުރާ މައިގަނޑު ސަބަބަކީ އެ ދުވަހު އެ ބޭފުޅުންނަށް އެލެވުނު ވޯޓަކީ ހަގީގަތުގައި އެބޭފުޅުންނަށް ހެޔޮ ވިސްނިގެން އެބޭފުޅުންގެ ހިޔާލަށް ގެނެވުނުގޮތަކީ އެބޭފުޅުންނަށް ވިސްނުނު ގޮތަކީ އެންމެ ރަނގަޅު ގޮތް ކަން އެ ހުރިހާ ރައްޔިތުންނަށް ގަބޫލު ކުރެވުނީތީ. ދިވެހި ރައްޔިތުން އެދުނު ގޮތަށް ރަނުން ރަނަށް ރައީސް ޑރ މުހައްމަދު މުއިއްޒު އެމަނިކުފާނުގެ ޒަޢާމަތުގައި މި ވޭތުކުރަމުންދާ ތިން އަހަރާ ހަމައަށް އައި އިރުގައި އެމަނިކުފާނުވެވަޑައިގެންނެވި ވައުދުތައް އެއީ ދޮގު ވައުދުތަކަކަށް ނަހައްދަވާ ރަނުން ރަނަށް ފުއްދަވަން މަސައްކަތް ކުރައްވާ އޭގެ ތެރެއިން ބޮޑު ޕަސެންޓެއް މިއަދާ ހަމައަށް ފުއްދަވާފަވާތީ ދިވެހި ރައްޔިތުން ތިބީ ވަރަށް އުފަލުންއިބްރާހީމް ފަލާހު
މީގެ އިތުރުން ރައީސް މުއިއްޒު އަށް 2028 ވަނަ އަހަރުގެ ޕީއެންސީގެ ރިޔާސީ ޓިކެޓް އެރުވުމަށް ހުށަހެޅުނު ގަރާރަށް ތާއިދު ކުރައްވާ ފަލާހު ވިދާޅުވީ، ރައްޔިތުންގެ މަޖިލީހުގައި ސަރުކާރު ތަމްސީލުކުރައްވާ 73 މެންބަރުންނަކީ ރާއްޖޭގެ 93 ދާއިރާގެ ތެރެއިން 73 ދާއިރާ ތަމްސީލުކުރައްވާ ބޭފުޅުން ކަމަށެވެ. އަދި މިއީ ރާއްޖޭގެ ޖުމްލަ އާބާދީއަށް ބަލާއިރު ގާތްގަނޑަކަށް 80 އިންސައްތަ ރައްޔިތުން ކަމަށެވެ.
މިއަދު މި އެދެނީ މި ޕާޓީގެ ރައީސް ޑރ. މުއިއްޒުގެ އަރިހުން މިއެދެނީ މަނިކުފާނު ދެވަނަ ދައުރަކަށް 2028 ގަ ކުރިމަތިލެއްްވުމަށް އަޅުގަނޑުމެންގެ ދާއިރާތަކުގެ ހުރިހާ ރައްޔިތުން މަނިކުފާނުގެ އަރިހުގަ ވަރަށް ބޮޑަށް އެދޭއިބްރާހީމް ފަލާހު
މީގެއިތުރުން ފަލާހު ވިދާޅުވީ، ބުރާސްފަތި ދުވަހު ހުށަހެޅިގެންދިޔަ ގަރާރަކީ މަޖިލީހުގެ 73 މެންބަރުން ނިސްބަތްވާ ހުރިހާ ރައްޔިތުންގެ ވަރަށް ބޮޑު ތާއީދަކާއި ސަޕޯޓެއް އޮތް ގަރާރެއް ކަމަށެވެ. އަދި ޕާޓީގެ ރައީސް މުއިއްޒަށް 2028 ވަނަ އަހަރުގެ ޕީއެންސީގެ ރިޔާސީ ޓިކެޓް އެރުވުމަށް އެ މެންބަރުންނާއި ރައްޔިތުން "ލޮލުން ބޮލުން ހިތުން" އެދޭ ކަމަށާއި، މި ނިންމުމަށް ވަރަށް ބޮޑަށް ތާއީދުކުރައްވާ ކަމަށް ވެސް އޭނާ ވިދާޅުވި އެވެ.
ރައީސް މުއިއްޒު ރަނުނަށް ވައުދު ފުއްދަވަމުން ގެންދަވާ ވާހަކަ ފަލާހު ވިދާޅުވި ނަމަވެސް، ސަރުކާރުން ވައުދުތައް ނުފުއްދައި މަޝްރޫއުތައް ހުއްޓިފައިވާތީ ރައްޔިތުންގެ ފާޑުކިޔުންތައް އަމާޒުވަމުންދާކަން ފާހަގަކުރެވެ އެވެ. ވައުދުތައް ނުފުއްދޭ ތަނުގައި ކުރީ ސަރުކާރުން ފަށާފައިވާ ގިނަ މަޝްރޫއުތަކެއް ވެސް މިހާރު ވަނީ ހުއްޓިފަ އެވެ. އަދި އެކިއެކި މުނާސަބަތުތަކާ ދިމާކޮށް އަޅާފައިވާ ބިންގާތައް އެޅި ގޮތަށް ހުރެ، ބައެއް ތަންތަން ޖަންގައްޔަށް ބަދަލުވެފައިވާއިރު އެއްވެސް އަމަލީ މަސައްކަތެއް ނުފެށި އެތައް ތަނެއް އެބަހުއްޓެވެ. މީގެ އިތުރުން ވައުދުތައް ނުފުއްދައި، ރައްޔިތުންނަށް ދޮގުހެދުމާއި އޮޅުވާލުން މި ސަރުކާރުގެ ތެރޭގައި އަށަގެންފައިވާ ކަމަށް ބުނެ ގިނަ ބަޔަކު ދަނީ ސަރުކާރަށް ފާޑުކިޔަމުންނެވެ.
