ހުރްމުޒްގައި ނުތަނަވަސްކަން ބޮޑުވެ ތެޔޮ ފީފާއެއްގެ އަގު އަނެއްކާވެސް 97 ޑޮލަރަށްވުރެ މައްޗަށް

އެމެރިކާއާއި އީރާނާ ދެމެދު އޮތް ނުތަނަވަސްކަން އަލުން އިތުރުވެ، ހުރްމުޒް ކަނޑުއޮޅީގައި ހަމަލާ ބަދަލުކުރަން ފެށުމާއެކު، ދުނިޔޭގެ ބާޒާރުގައި ތެލުގެ އަގު އަނެއްކާވެސް އުފުލެން ފަށައިފި އެވެ. ހޯމަ ދުވަހު ޖީއެމްޓީ ގަޑިން ހެނދުނު 7:00 އާ ހަމައަށް ބަލާއިރު، ތެލުގެ އަގު ކަނޑައެޅުމުގައި ބަލާ މައިގަނޑު އެއް މިންގަނޑު ކަމަށްވާ ބްރެންޓް ކްރޫޑްގެ ތެޔޮ ފީފާއެއްގެ އަގު ވަނީ 97 އެމެރިކާ ޑޮލަރަށް އުފުލިފަ އެވެ.

މިއީ މިދިޔަ ހުކުރު ދުވަހު ބާޒާރު ބަންދުވިއިރު ހުރި އަގާ އަޅައިބަލާއިރު ގާތްގަނޑަކަށް 0.8 އިންސައްތައިގެ އިތުރުވުމެކެވެ. ހަމަމިއާއެކު، ވެސްޓް ޓެކްސަސް އިންޓަމީޑިއޭޓްގެ (ޑަބްލިއުޓީއައި) ތެޔޮ ފީފާއެއްގެ އަގު ވެސް ވަނީ 0.6 އިންސައްތަ މައްޗަށް އުފުލިފަ އެވެ. މިހާރު ޑަބްލިއުޓީއައި ފީފާއެއްގެ އަގު ހުރީ 92 ޑޮލަރުގަ އެވެ.

އެމެރިކާއިން އީރާނުގެ ރަށްތަކަށް އަމާޒުކޮށް ދެމުންދާ ހަމަލާތައް ފުޅާކުރަން ފަށާފައިވާ މި ދަނޑިވަޅުގައި، އީރާނުގެ އަސްކަރިއްޔާއިން ވެސް ވަނީ ރައްދު ހަމަލާތައް އިތުރުކޮށްފަ އެވެ. މި ގޮތުން، އިރާގުގެ އިރްބީލް އެއާޕޯޓު ކައިރިން ދަތުރު ކުރަމުން ދިޔަ އެމެރިކާގެ އަސްކަރިއްޔާގެ ޖާސޫސީ ބެލޫނަކަށް ޑްރޯން ހަމަލާއެއް ދީފައިވާނެ ކަމަށް އީރާނުގެ އަސްކަރިއްޔާއިން ހާމަކުރެ އެވެ.

މީގެ އިތުރުން، ކުރިއަށް އޮތް ދުވަސްތަކުގައި ހުރްމުޒް ކަނޑުއޮޅިން ދަތުރުކުރުން "މަނާ" ސަރަހައްދެއް ކަނޑައަޅާނެ ކަން އީރާނުގެ ގައުމީ ސަލާމަތާ ބެހޭ މަޖިލީހުގެ ސެކްރެޓަރީ މުހުސިން ރިޒާއީ ވަނީ ހާމަކުރައްވާފަ އެވެ. އަދި، އެ ސަރަހައްދަށް ވަންނަ ކޮންމެ އުޅަނދެއް، ދަތިކުރުމުގެ ފިޔަވަޅު އަޅާފައިވާ އުޅަނދުތަކުގެ ލިސްޓުގައި ހިމަނާނެ ކަމުގެ އިންޒާރު ވެސް އޭނާ ވަނީ ދެއްވާފަ އެވެ. ހަމަމިއާއެކު، ޔަމަނުގެ ކޯސްޓްގާޑުން ވަނީ އާދީއްތަ ދުވަހު ތެޔޮ ޓޭންކަރެއް ހިފަހައްޓާފަ އެވެ. އެ އުޅަނދު ހިފެހެއްޓީ، ހޫޘީންގެ ބާރުގެ ދަށުގައި އޮންނަ އަލް-ހުދައިދާ ގަވަރުނަރޭޓްގެ ރައުސު އީސާ ބަނދަރަށް "ހުއްދަނެތް" މުދާތަކެއް ބޭލުމަށްފަހު ފުރި ފަހުން ކަމަށް އެ ގައުމުގެ ސަރުކާރުގެ މީޑިއާތަކުން ރިޕޯޓްކޮށްފައިވެ އެވެ.

ދެ ގައުމުގެ ދެމެދުގައި އޮތް ދެކޮޅުވެރިކަން ނިމުމަކަށް ގެނައުމަށް ޓަކައި، މިދިޔަ ޖޫން މަހު އެމެރިކާއާއި އީރާނުން ވަނީ ފަހުމުނާމާއެއްގައި ސޮއިކޮށްފަ އެވެ. މި އެއްބަސްވުމުގައި ދެ ގައުމުން ސޮއިކުރީ ޕާކިސްތާނާއި ގަތަރު މެދުވެރިވެގެންނެ އެވެ. އަދި، މިއީ ހުރްމުޒް ކަނޑުއޮޅި ހުޅުވާލުމަށާއި، އިގްތިސާދީ ގޮތުން އަޅާފައިވާ ހުރަސްތަކަށް ހައްލެއް ހޯދުމަށް މަގުފަހިކުރުމުގެ ގޮތުން ވެވުނު އެއްބަސްވުމެކެވެ. ނަމަވެސް، އެ ފަހުމުނާމާގެ ދަށުން ވެފައިވާ އިގުރާރުތަކަށް އަމަލުކުރުމުގައި ދެ ފަރާތުން ވެސް އިހުމާލުވެފައިވާ ކަމަށް ބުނެ، އެއް ގައުމުން އަނެއް ގައުމަށް މިހާރު ދަނީ ތުހުމަތުތައް ކުރަމުންނެ އެވެ. މީގެ އިތުރުން، ދަތިކުރުމުގެ ފިޔަވަޅުތަކާއި ހުރްމުޒް ކަނޑުއޮޅިން ދަތުރުފަތުރު ކުރުމާ ގުޅޭގޮތުން އުފެދިފައިވާ ދެބަސްވުންތަކާއެކު، އަސްކަރީ ނުތަނަވަސްކަން ދަނީ އިތުރަށް ބޮޑުވަމުންނެވެ.