މާލެ ސަރަހައްދުގައި ހިނގާ ނުރައްކާތެރި އެކްސިޑެންޓްތައް އިތުރުވަމުންދާ މައްސަލައަށް ދާއިމީ ހައްލެއް ހޯދައިދިނުމަށް މެންބަރު ކުޑޫ އެދިވަޑައިގެންފި
28 ސެޕްޓެމްބަރު 2026 | ހޯމަ 13:27މަގުމަތީގެ ރައްކާތެރިކަން ކަށަވަރުކުރުމަށްޓަކައި އެއްގަމު ދަތުރުފަތުރުގެ ގާނޫނަށް އިސްލާހު ގެނެސް، ނުރައްކާތެރިކޮށް އުޅަނދު ދުއްވާ ފަރާތްތަކަށް ދޭ އަދަބުތައް ހަރުކަށިކުރުމަށް މެންބަރު ކުޑޫ ހުށަހަޅުއްވައިފި. މީގެ އިތުރުން، އެކްސިޑެންޓްތަކުގެ ތަހުގީގުތައް އަވަސްކުރުމާއި، ސްޕީޑް މޮނިޓަރިންގ ކެމެރާ ހަރުކުރުމުގެ އިތުރުން ކަމާގުޅޭ މުއައްސަސާތައް މަޖިލީހަށް ހާޒިރުކޮށް އާންމުންގެ ޚިޔާލު ހޯދުމަށް ވެސް މެންބަރު އެދިވަޑައިގެންފައިވޭ
ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
މާލެ ސަރަހައްދުގައި ހިނގާ ނުރައްކާތެރި މަގުމަތީގެ އެކްސިޑެންޓްތައް އިތުރުވަމުންދާ މައްސަލައަށް ދާއިމީ ހައްލެއް ހޯދުމަށްޓަކައި، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ފޮނުއްވައިފި އެވެ.
މި ސިޓީގައި މެންބަރު ކުޑޫ ވަނީ މަގުމަތީގެ ރައްކާތެރިކަން ކަށަވަރުކުރުމަށްޓަކައި ކަމާގުޅޭ މުއައްސަސާތަކުން އަޅަންޖެހޭ ފިޔަވަޅުތައް އެޅުމަށް ބާރުއެޅުމުގެ ގޮތުން މަޖިލީހުގެ ތެރެއިން ކުރެވިދާނެ ކަންކަން ފާހަގަކުރައްވާފަ އެވެ.
މެންބަރު ކުޑޫ ފާހަގަކުރެއްވި ގޮތުގައި، މަގުމަތީގެ ނުރައްކާތެރި ހާދިސާތައް އިތުރުވުމުގެ ސަބަބުން އާންމު ރައްޔިތުންގެ މެދުގައި ބިރުވެރިކަން އުފެދި، ޚާއްސަކޮށް ޒުވާނުންގެ ފުރާނަ ގެއްލި، ދާއިމީ ނުކުޅެދުންތެރިކަމާ ކުރިމަތިލާންޖެހޭ ހާދިސާތައް ވަނީ އިތުރުވެފަ އެވެ. މިފަދަ މައްސަލަތަކުގައި އިންސާފު ގާއިމުކުރުމަށް ހުރަސްތަކެއް ކުރިމަތިވަމުންދާކަން ފާހަގަކުރައްވައި، 4 އޮގަސްޓް 2025 ގައި ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ އާއި ޖުޑިޝިއަރީ ކޮމިޓީ ގުޅިގެން އަޑު އެހުމެއް ބާއްވައިދެއްވުމަށް ހުށަހަޅުއްވާފައިވީ ނަމަވެސް މިހާތަނަށް މިކަމަށް ހައްލެއް ހޯދައިދީފައި ނުވާކަން މެންބަރު ކުޑޫ ފާހަގަކުރެއްވި އެވެ.
މި މައްސަލައަށް ހައްލެއް ހޯދުމަށް މެންބަރު ހުށަހެޅުއްވި ކަންތައްތަކުގެ ތެރޭގައި، މަގުމަތީގެ ނުރައްކާތެރި ހާދިސާތަކާ ގުޅޭގޮތުން އާންމު ރައްޔިތުންގެ ޚިޔާލު ހޯދުމަށް އާންމު ފޯރަމެއް ބޭއްވުމާއި، ކަމާގުޅޭ މުއައްސަސާތަކުގެ އިސްވެރިން ކޮމިޓީއަށް ހާޒިރުކޮށް މައުލޫމާތު ސާފުކުރުން ހިމެނެ އެވެ. މީގެ ތެރޭގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި މޯލްޑިވްސް ޕޮލިސް ސަރވިސް އަދި ޕްރޮސިކިއުޓަރ ޖެނެރަލްގެ އޮފީސް ހިމެނެ އެވެ.
މީގެ އިތުރުން ދިވެހިރާއްޖޭގެ އެއްގަމު ދަތުރުފަތުރުގެ ގާނޫނަށް ގެންނަންޖެހޭ އިސްލާހުތައް ގެނައުމަށް ވެސް މެންބަރު ވަނީ ބާރުއަޅުއްވާފަ އެވެ. އެގޮތުން ނުރައްކާތެރިކޮށް އުޅަނދު ދުއްވައިގެން މީހަކު މަރުވާ ހާދިސާތަކުގައި ދެވޭ އަދަބުތައް ބޮޑުކުރުމާއި، ލައިސަންސް ބާތިލުކުރުމާއި، ތަކުރާރުކޮށް ގަވާއިދާ ޚިލާފުވާ ފަރާތްތަކަށް ދާއިމީކޮށް ލައިސަންސް ހިފެހެއްޓޭނެ ނިޒާމެއް ގާއިމުކުރުމަށް ވަނީ ހުށަހަޅުއްވާފަ އެވެ. އަދި އެކްސިޑެންޓްތަކުގައި އަނިޔާވާ ފަރާތްތަކަށް ލިބޭ ބަދަލު ކަށަވަރުކޮށްދޭނެ އިންޝުއަރެންސް ނިޒާމެއް ގާއިމުކުރުމުގެ މުހިންމުކަން ވެސް ފާހަގަކުރެއްވި އެވެ.
މެންބަރުގެ ސިޓީގައި އިތުރަށް ވިދާޅުވެފައިވަނީ، އެކްސިޑެންޓްތަކުގެ ތަހުގީގުތަކާއި ޝަރީއަތްތައް އަވަސްކުރުމަށްޓަކައި ވަކި މުއްދަތުތަކެއް ކަނޑައެޅުމުގެ މުހިންމުކަމެވެ. އަދި މާލެއާއި ހުޅުމާލޭގައި ބާރު ސްޕީޑުގައި އުޅަނދު ދުއްވުން ހުއްޓުވުމަށްޓަކައި ސްޕީޑް މޮނިޓަރިންގ ކެމެރާތަކާއި އޮޓޮމެޓިކް އެންފޯސްމަންޓް ސިސްޓަމްތައް ގާއިމުކުރުމަށް ބޭނުންވާ ބަޖެޓާއި ވަސީލަތްތައް ކަމާގުޅޭ އިދާރާތަކަށް ހަމަޖައްސައިދިނުމަށް ވެސް މެންބަރު ވަނީ އެދިވަޑައިގެންފަ އެވެ.
މި ހުށަހެޅުންތަކަކީ ރައްޔިތުންގެ ފުރާނައާއި މުދާ ރައްކާތެރިކޮށް، މަގުމަތީގެ އަދުލުގެ ނިޒާމަށް ރައްޔިތުންގެ އިތުބާރު ހޯދުމަށްޓަކައި ހުށަހެޅި ކަންކަން ކަމަށް މެންބަރު މުހައްމަދު އިބްރާހީމް (ކުޑޫ) ވިދާޅުވި އެވެ. އެހެންކަމުން މެންބަރު ވަނީ މި މައްސަލައަށް އަވަސް ހައްލެއް ހޯދުމަށް މަޖިލީހުގެ ރައީސްގެ އެހީތެރިކަމަށް އެދިވަޑައިގެންފަ އެވެ.
