މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށަކަށް ހެދުމަށް އިސްލާހެއް
މިސްކިތްތަކަށް ގެއްލުންދިނުން މިހާރު އާންމުވެފައިވާތީ އެކަން ހުއްޓުވުމަށް ޓެރަރިޒަމް މަނާކުރުމުގެ ޤާނޫނަށް އިސްލާހު ގެނައުމަށް ބިލު ހުށަހަޅާފައިވޭ
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ)
މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށަކަށް ހެދުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ހުށަހަޅުއްވައިފި އެވެ.
ރައްޔިތުންގެ މަޖިލީހަށް އޭނާ ހުށަހަޅުއްވާފައި ވަނީ ޤާނޫނު ނަންބަރު 2015/32 (ޓެރަރިޒަމް މަނާކުރުމުގެ ޤާނޫނު) އަށް އިސްލާހު ގެނައުމަށެވެ. އޭނާ އެ ބިލު ހުށަހެޅުއްވީ ހޯމަ ދުވަހު އެވެ.
މެމްބަރު ކުޑޫ އެކްސްގައި ކުރެއްވި ޕޯސްޓެއްގައި ވިދާޅުވީ މިސްކިތްތަކަށް ގެއްލުންދޭ ވާހަކަ އާންމުކޮށް ނުދެއްކި ނަމަވެސް މިސްކިތްތަކަށް ގެއްލުން ދިނުން މިހާރު އާންމުވެފައިވާ ކަމަށެވެ. ބިލު ހުށަހެޅީ އެހެންވެ ކަމަށް އޭނާ ވިދާޅުވި އެވެ.
"ކޮންމެ ފަހަރަކު މީޑިއާތަކުގެ ފަލަ ސުރުހީއަށް ނޭރި ނަމަވެސް، މިސްކިތްތަކަށް ގެއްލުންދިނުން އާންމުވެއްޖެ. މިއީ މިހާރުން މިހާރަށް ހުއްޓުވަން ޖެހޭ ކަމެއް،" އޭނާ ވިދާޅުވި އެވެ.
ބިލު ހުށަހަޅާ ސަބަބެއް ކަމަށް ބަޔާންކޮށްފައި ވަނީ ދިވެހިރާއްޖޭގެ ޖުމްހޫރިއްޔާގެ ޤާނޫއަސާސީގެ 10 ވަނަ މާއްދާގައި ދިވެހި ދައުލަތުގެ ދީނަކީ އިސްލާމްދީން ކަމަށް ބަޔާންކޮށްފައި ވާއިރު، ސައްތައިން ސައްތަ މުސްލިމުން ދިރިއުޅޭ މި ޤައުމުގައި، މިސްކިތްތަކަށް ގެއްލުން ދިނުން ޢާންމުވެ އެފަދަ ޢަމަލުތައް ތަކުރާރުވަމުންދާތީ އެކަން ހުއްޓުވުމެވެ.
މީގެ އިތުރުން، އެފަދަ ޢަމަލުތަކަކީ މިސްކިތުގެ ކަރާމަތަށް އުނިކަން ލިބޭފަދަ ޢަމަލުތަކެއް ކަމަށާއި، މިސްކިތުގެ ކަރާމަތް ހިފެހެއްޓުމަކީ އިސްލާމްދީނަށް ޙުރުމަތްތެރިކޮށް ހިތުމުގެ ތެރެއިންވާ ކަމެއްކަމަށް ވެސް ފާހަގަކޮށްފައިވެ އެވެ. އެ ބިލު ހުށަހަޅަނީ އެފަދަ ޢަމަލުތައް ޓެރަރިޒަމްގެ ޢަމަލުތަކުގެ ތެރޭގައި ހިމެނުމަކީ މުހިންމު ކަމެއްކަމަށް ޤާބޫލު ކުރާ ކަމަށް އޭނާ ވަނީ ފާހަގަކުރައްވާފަ އެވެ.
