ޝެއިޚު ފަޒްލޫނާއެކު އިލްމުވެރިންގެ ކަޅި ރަސްމާލެއަށް

ރައްޔިތުންގެ ބޯހިޔާވަހިކަމަށް ރައްޔިތުންގެ ފައިސާއިން ހިއްކަމުންދާ ރަސްމާލެއިން ބޮޑު ބައެއް 99 އަހަރަށް ބޭރު ބަޔަކަށް ދިނުން ވެގެން ދިޔައީ މުއިއްޒު ދިވެހިންގެ ކޯތާފަތްމަތީގައި ޖެއްސެވި ބޮޑު ތަފާލަކަށެވެ. އެތަނުން އެންމެ އިންޗިއެއް ވެސް އަދި އެންމެ ވެލިފުކެއް ވެސް ބޭރު ބަޔަކަށް ނުދެއްވާނެ ކަމަށް ހަރުއަޑުން ވިދާޅުވި މުއިއްޒު އެ ނިންމެވީ އެތަނުން 500 ހެކްޓަރުގެ ބިން ކުއްޔަކާ ނުލައި ބޭރު ބަޔަކަށް ދޭށެވެ.

މިކަމުގެ ވާހަކަ އެދަނީ ފަތުއަޑު ކިޔާފައި ކުރިއަށެވެ. އާއްމުންގެ މެދުގަ އެވެ. ސިޔާސީ ބޭފުޅުންގެ މެދުގަ އެވެ. އިގުތިސާދީ މާހިރުންގެ ރައުޔު ތަކުގަ އެވެ. ނަމަވެސް އެކަމަށް އެއްޗެއް ވިދާޅުނުވެ އޮތީ ދީނީ އިލްމުވެރިންނެވެ. އެ ބިން ދޭ މީހާއާ ކުށެއްނެތް އެތައް ބަޔަކު ކޮންމެ ދުވަހަކު ވެސް ޝަހީދުކުރަމުންދާ ޒައިނިސްޓުންނާ ގުޅުން އޮތްކަމަށް ތަކުރާރުކޮށް ވާހަކަ ދެކެވެމުން ދަނިކޮށެވެ.

ރަސްމާލޭ ވޯޓަރފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ކުއްޔަށް ދިނުމާ ދެކޮޅަށް، ދީނީ އިލްމުވެރިންގެ ތެރެއިން ފުރަތަމަ ފާޑު ވިދާޅުވި ބޭފުޅަކީ އައްޝައިޚް ފަޒްލޫން މުހައްމަދު އެވެ. ސީދާ ސީދަލަށް ފަޒްލޫން އެހެއްދެވީ އެކަމާ ދެކޮޅެވެ.

ފަޒްލޫން އެކްސް އެކައުންޓުން ކުރެއްވި ޕޯސްޓެއްގައި ވިދާޅުވީ މި މަޝްރޫއަކީ އީގަލް ހިލްސްގެ ވެރިޔާގެ އެކުވެރި ޒަޔަނިސްޓުންނަށް ވެސް ރާއްޖޭގެ އިމާރާތްތައް ވިއްކައި އެ އިމާރާތްތައް ޒަޔަނިސްޓުންގެ ޖީލުތަކަށް ލިބޭ ގޮތަށް ފަރުމާކޮށް، ރާއްޖޭގައި ޒަޔަނިސްޓުން ވަޒަންކުރެވޭނެ ފަދައިން ހިންގޭ އަޑި ނޭނގޭ އަނދިރި ޖަރީމާއެއް ކަމަށެވެ.

"މިއީ އީގަލް ހިލްސްގެ ވެރިޔާގެ އެކުވެރި ޒަޔަނިސްޓުނަށް ވެސް ދިވެހިރާއްޖޭގެ އިމާރާތްތައް ވިއްކައި އެ އިމާރާތްތައް ޒަޔަނިސްޓުންގެ ޖީލުތަކަކަށް ލިބޭ ގޮތަށް ފަރުމާކޮށް، ދިވެހި ރާއްޖޭގައި ޒަޔަނިސްޓުން ވަޒަންވެރިކުރެވޭނެ ފަދައިން ހިންގޭ އަޑި ނޭގޭ އަނދިރި ޖަރީމާއެއް. މިއަދު މިކަމާ ދެކޮޅު ނަހަދައިފިނަމަ މާދަމާ ހިތާމަ ކުރަންޖެހޭނެ. ގައުމުގެ އަމްނާ އަމާންކަމާ އިސްތިގުލާލު ގެއްލިގެން ދިއުމުގެ ކުރިން މިކަމާ ދެކޮޅު ހަދަންޖެހޭ،" އޭނާ ވިދާޅުވި އެވެ.

ފަޒްލޫން ވިދާޅުވީ މުޅި މަޝްރޫއުގެ އެއްބަސްވުމުގެ މައުލޫމާތާއި ވަށައިގެންވާ ކަންކަމަށް ބަލާއިރު ފެންނަނީ ބޮޑެތި ކަންބޮޑުވުންތައް ކަމަށެވެ. އޭނާ ވިދާޅުވީ އީގަލް ހިލްސްގެ ވެބްސައިޓުގައިވާ ގޮތުން އެތަން ދެނީ 99 އަހަރުގެ މުއްދަތަކަށް އަދި އެތަނުގެ ޕްރޮޕަޓީއެއްގެ ވެރިފަރާތް ބަދަލުވާ ކޮންމެ ފަހަރަކު އައު ވެރިފަރާތަށް 99 އަހަރަށް އެ ތަން ލިބޭ ގޮތަށް ކަމަށެވެ.

"ނުވަދިހަ އަށް ވަނަ އަހަރު ވާރުތައިގެ ގޮތުން ނުވަތަ ގަނެގެންވިޔަސް އައު ވެރިޔަކަށް އެ ޕޮރޮޕަޓީ ލިބިއްޖެނަމަ އެތަން އެ މީހަކަށް އިތުރު 99 އަހަރަށް ލިބޭ ގޮތަށް. އެ މީހުންގެ ވެބްސައިޓުގައިވާ ގޮތުން ނަމަ މިއީ ނިމުމެއް ނެތި ކުރިއަށްދާނޭ ސިލްސިލާއެއް،" އޭނާ ވިދާޅުވި އެވެ.

ފަޒްލޫން އަށްފަހު އަދާލަތު ޕާޓީގެ ޖުޑިޝަރީ ކޮމެޓީގެ އިސް ފަނޑިޔާރު، ޑރ. މުހައްމަދު އިޔާޒް އަބްދުއްލަތީފް ވިދާޅުވީ އަބޫދާބީގެ ކުންފުންޏަކަށް 99 އަހަރަށް ރަސްމާލެ ކުއްޔަށް ދިނުމާ ގުޅޭ ގޮތުން ރައްޔިތުން ކުރާ ތުހުމަތުތަކާއި ކަންބޮޑުވުންތަކަށް ޖަވާބު ދެއްވައި ވައުދާ އެއްގޮތަށް އަމަލު ކުރެއްވުމަށް ރައީސް ޑރ. މުހައްމަދު މުއިއްޒަށް ގޮވާލައްވާ ކަމަށެވެ.

ޑރ އިޔާޒް، ރައީސް ޑރ. މުއިއްޒު ޓެގުކުރައްވައި ލިޔުއްވި ޕޯސްޓުގައި ވިދާޅުވީ ޤައުމުގެ އިސްތިގުލާލާއި މިނިވަންކަން ދެމެހެއްޓުމަކީ ކޮންމެ މުވާޠިނެއްގެ މައްޗަށް ވާޖިބުވެގެންވާ ކަމެއް ކަމަށެވެ.

ޑރ. އިޔާޒް ވިދާޅުވީ ދިގު މުއްދަތަކަށް ރާއްޖޭގެ ބައެއް ބޭރު ބަޔަކަށް ކުއްޔަށް ދިނުމަކީ، ޤައުމުގެ މިނިވަންކަން ގެއްލިގެން ހިނގައިދާނެ ކަމެއް ކަމަށް ގިނަ ބަޔަކު ބުނަމުން ދާއިރު، އަދި އެކަމުގެ ފުރަގަހުގައި އަޑި ނޭނގޭ އެތައް ކަމެއް ހުރި ކަމަށް ތުހުމަތުކުރެވެމުން ދާއިރު، އެ ކަންކަމުގެ ހަގީގަތް ބަޔާންކޮށް ސާފު ކޮށްދިނުމަކީ ސަރުކާރުގެ މައްޗަށް ލާޒިމް ކަމެއް ކަމަށެވެ.

"އެއްވެސް ކަމެއް ނުފޮރުވާ ހާމަކަން ބޮޑު ގޮތެއްގައި ވެރިކަން ކުރައްވާނެ ކަމަށް ޑރ. މުއިއްޒު ވަނީ ވައުދުވެވަޑައިގެންފައި. ވައުދާ އެއްގޮތަށް އަމަލު ކުރެއްވުމަށް ރައީސަށް އިލްތިމާސްކުރަން،" ޑރ. އިޔާޒް ވިދާޅުވި އެވެ.

ރަސްމާލެ ދިނުމާ ދެކޮޅަށް އިލްމުވެރިން އަޑުއުފުލަން ފެށުމާއެކު މި ސަރުކާރަށް ތާއީދު ކުރައްވައި ރައީސް މުއިއްޒު ޕްރޮމޯޓުކުރުމުގެ މަސައްކަތް ވެސް ކުރައްވާ ދީނީ އިލްމުވެރިޔާ ޒަމްޒަމް ފާރިޝް ވެސް ވަނީ ރަސްމާލެ ދިނުމާ ދެކޮޅަށް އެކްސްގައި ލިޔުއްވާފަ އެވެ.

ޒަމްޒަމް ފާރިޝް ވިދާޅުވީ ރަސްމާލެ ބިން ވިއްކާލި ވާހަކަ ދެކެވޭތީ އީގަލް ހިލްސްގެ ވެބްސައިޓު ބަލާލައިފިން ކަމަށެވެ. އެ ސައިޓުގައި އެވާގޮތަށް ރަސްމާލެ އެއްބަސްވުން އޮތް ނަމަ އެއީ ބަލައިގަނެވޭނެ ކަމެއް ނޫން ކަމަށެވެ. އޭގެ ސަބަބުން އެ ބިން އެއޮތީ ދިވެހީން އަތުން ތާއަބަދަށް ގެއްލިގެން ގޮސްފައި ކަމަށެވެ.

އޭނާ ވިދާޅުވީ ވާރުތަވާ ތަރިކައެއްގެ ގޮތުގަ ބޭރު ބައެއްގެ އަތް މައްޗަށް ދިވެހި ޤައުމުގެ ސަރަހައްދުން އެއްވެސް އެއްޗެއް ދިނުމަކީ، 99 އަހަރަށް އެއްބަސްވުމެއް ހެދުމުގެ އެއްވެސް ބޭނުމެއް، މާނައެއް އޮތް ކަމެއް ނޫން ކަމަށާއި އޭރުން ދެން އެ އަނބުރާ ދިވެހިންނަށް ލިބޭނެ ގޮތެއް ވިސްނާ ވިސްނާ ނޭނގުނު ކަމަށެވެ.

ކޮންމެއަކަސް އާއްމު ރައްޔިތުންނަށްފަހު، އިލްމުވެރިން މިކަމުގައި ބަސްވިދާޅުވާން ފެށުމަކީ ވެސް ހެޔޮ ފާލެކެވެ. ދެން އޮތީ އެ ވާހަކަތަކާއެކު، ޝެއިޚް ފަޒްލޫން އެ ވިދާޅުވާގޮތައް ޤައުމުގެ އަމްނާއަމާންކަމާއި އިސްތިގުލާލު ގެއްލިގެން ދިއުމުގެ ކުރިން މިކަމާ ދެކޮޅު ހެދުމެވެ.