ވަޒީރު ސައީދު އާއި ވަޒީރު އަމީންގެ ދައުރު ޕާކިސްތާނުގައި ރައްޔިތުންގެ މަޖިލީހުން އަދާކުރުން، މިއީ ކުޑަކަމެއްނޫން!

މަޖިލީހުގެ ރައީސް އަބްދުއްރަހީމް އަބްދުﷲ ޕާކިސްތާނަށް ކުރައްވަމުން ގެންދަވާ ދަތުރުފުޅުގައި، ޕާކިސްތާނުން ސީދާ ރާއްޖެއަށް ދަތުރުކުރުމާއި ވިޔަފާރި އަދި އިންވެސްޓްމެންޓާ ބެހޭ ގޮތުން ބާއްވަވާ ބައްދަލުކުރެއްވުންތަކުން އުފެދޭ ސުވާލަކީ، މި ޕޯޓްފޯލިއޯތަކަށް ޤާނޫނީ ގޮތުން ޒިންމާވާ ކެބިނެޓް މިނިސްޓަރުންގެ ދައުރު ކޮބައިތޯ އެވެ. 

ޕާކިސްތާނު އިންޓަރނެޝަނަލް އެއަރލައިންސް (ޕީއައިއޭ) އިން ރަސްމީކޮށް ބަޔާންކުރި ގޮތުން، އެ އެއަރލައިންގެ ސީއީއޯ އާއި ރާއްޖޭގެ މަޖިލީހުގެ ވަފުދާ އެކު ޕާކިސްތާނާއި ރާއްޖެ ދެމެދު ޑައިރެކްޓް ފްލައިޓް ފެށުމާމެދު ބައްދަލުކުރެވުނެވެ. އަދި ޕީއައިއޭގެ ފްލީޓަށް ބޯޓުފަހަރު އިތުރުކުރުމަށްފަހު މި ސަރވިސް ފެށުމަށް ނިންމާނެ ކަމަށް ވެސް ބުނެފައިވެ އެވެ. މަޖިލިސް ރައީސް އަބްދުއްރަހީމް ވެސް، ރާއްޖެ އާއި ޕާކިސްތާނާއި ދެމެދު އެއަރ ކަނެކްޓިވިޓީ ރަނގަޅުވުމުން ޓުއަރިޒަމާއި ވިޔަފާރިއަށް ފައިދާވާނެ ކަމަށް ބަޔާންކުރެއްވި އެވެ.

އެވިއޭޝަންގެ ޒިންމާ އޮތީ ކާކުގެ އަތުގައި؟

ސިވިލް އެވިއޭޝަންއަކީ އެގްޒެކެޓިވްގެ ޕޯޓްފޯލިއޯއެކެވެ. 2026 އޭޕްރީލްގައި ކެބިނެޓް ރީސްޓްރަކްޗަރ ކުރުމަށްފަހު، މުހައްމަދު އަމީން އައްޔަނުކުރައްވާފައިވަނީ ޓުއަރިޒަމް އަދި ސިވިލް އެވިއޭޝަން މިނިސްޓަރު ކަމަށެވެ. ރާއްޖެއާއި ޕާކިސްތާނާ ދެމެދު އެއަރ ސާވިސަސް އެގްރީމެންޓެއް ކުރިންސުރެ އޮތް ނަމަވެސް، ޝެޑިއުލްޑް ފްލައިޓް ފެށުމަށް ރަސްމީ ޑެޒިގްނޭޝަނާއި ރެގިއުލޭޓަރީ ޕްރޮސެސްތައް ފުރިހަމަކުރަން ޖެހެ އެވެ. އެ ޒިންމާއަކީ މަޖިލީހުން ނުފޫޒު ހިންގަންޖެހޭ ކަމެއް ނޫނެވެ.

ވީމާ މިތަނުގައި އުފެދޭ ސުވާލުތައް ސާފެވެ:

މިނިސްޓަރު އަމީންގެ މިނިސްޓްރީ ނުވަތަ ޚާރިޖީ ވުޒާރާ ޕީއައިއޭއާ ކުރެވުނު މި މަޝްވަރާގައި ރަސްމީކޮށް ހިމެނިފައިވޭތޯ؟

ހިމެނިފައިވާނަމަ، މި ވަފުދަށް ދެވުނު މެންޑޭޓާއި ފޮލޯއަޕް ޕްރޮސެސް ސާފުކުރަންޖެހެ އެވެ. އެ ޒިންމާ ދެވިފައި ނުވާނަމަ، އައު އިންޓަރނެޝަނަލް އެއަރ ރޫޓެއް ފަދަ މުހިންމު މައުޟޫއެއްގައި ރާއްޖެ ތަމްސީލުކުރާ އެންމެ އިސް ސިޔާސީ މީހަކަށް މަޖިލީހުގެ ރައީސް ވެވަޑައިގެންފައިވަނީ ކީއްވެތޯ ސުވާލު އުފެދެ އެވެ.

އިގުތިސާދީ ޕޯޓްފޯލިއޯ ކޮބައިތޯ؟

މި ސުވާލު އިގުތިސާދީ ތަރައްޤީ، ޓްރާންސްޕޯޓް އަދި ޓްރޭޑް މިނިސްޓަރު މުހައްމަދު ސައީދުގެ ޕޯޓްފޯލިއޯއަށް ވެސް ހުށަހެޅެ އެވެ. ފެޑެރޭޝަން އޮފް ޕާކިސްތާން ޗެމްބަރ އޮފް ކޮމަރސް އެންޑް އިންޑަސްޓްރީ (އެފްޕީސީސީއައި) އާއެކު ބޭއްވި ބައްދަލުވުމުގައި، ޕާކިސްތާނުގެ ވިޔަފާރިވެރިންނާއި ޕްރޮޑަކްޓްތަކަށް ރާއްޖޭގެ މާކެޓުގައި އިތުރު ފުރުސަތު ހުރި ކަމަށް މަޖިލީހުގެ ރައީސް އަބްދުއްރަހީމް ބަޔާންކުރައްވާ، ދެ ޤައުމުގެ ދެމެދު ވިޔަފާރި އަދި އިގުތިސާދީ ގުޅުން އިތުރުކުރުމަށް ގޮވާލެއްވި އެވެ.

ޕާކިސްތާނުގެ ނޭޝަނަލް އެސެމްބްލީގެ ރެކޯޑުތަކުގައި ވެސް ވިޔަފާރި، އިންވެސްޓްމެންޓް، ޓުއަރިޒަމް، ކަނެކްޓިވިޓީ އަދި ބިޒްނަސް-ޓު-ބިޒްނަސް ގުޅުންތަކާމެދު މަޝްވަރާ ކުރެވުނު ކަމަށް ވެސް ލިޔެފައިވެ އެވެ. ނަމަވެސް އިންވެސްޓް މޯލްޑިވްސް އަކީ ސައީދުގެ މިނިސްޓްރީގެ ދަށުން ބޭރުގެ އިންވެސްޓްމެންޓް ޕްރޮމޯޓްކޮށް، ފެސިލިޓޭޓްކޮށް އަދި ރަޖިސްޓްރީ ކުރާ ސަރުކާރުގެ ލީޑް އެޖެންސީ އެވެ.

ޤާނޫނުއަސާސީގެ 132 ވަނަ މާއްދާއިން ކެބިނެޓް މެންބަރުންނަށް ޤައުމީ ސިޔާސަތު ނިންމުމުގައި ރައީސަށް އެހީތެރިވުމާއި އެ ދާއިރާތަކުން ސަރުކާރުގެ ކަންކަން ސުޕަވައިޒްކޮށް، އިމްޕްލިމެންޓްކޮށް އަދި ޑައިރެކްޓްކުރުމުގެ އިތުރުން ރިވިއު އަދި ކޯޑިނޭޓް ކުރުމުގެ ޒިންމާ އަދާކުރަންޖެހެ އެވެ.

ޕާލިމެންޓަރީ އެޑްވޮކަސީ ނިމޭ ތަނާ އެގްޒެކެޓިވް ނެގޯސިއޭޝަން ފެށޭ ތަން ކޮބައިތޯ؟

މަޖިލިސް ރައީސް އަބްދުއްރަހީމް އޭވިއޭޝަނާއި އިންވެސްޓްމެންޓްގެ މަޝްވަރާތަކަށް ރައީސްގެ ނުވަތަ މިނިސްޓަރުންގެ ރަސްމީ ނިންމެވުމަކަށް ވަޑައިގަންނަވާފައިވާނަމަ، އެކަން ސަރުކާރުން ސާފުކޮށް ބުނަން ޖެހެ އެވެ. އެފަދަ މެންޑޭޓެއް ނެތްނަމަ، ބޭރުގެ އޭވިއޭޝަން އަދި އިގްތިސާދީ ވެރިންނާ މި ލެވެލްގައި މަޝްވަރާކުރުމުގެ ޤާނޫނީ، އިދާރީ ބިނާ އަދި އޮނިގަނޑު ވެސް ސާފުކޮށްދެން ޖެހެ އެވެ.

މިހެންކަމުން ސަރުކާރުން ޖަވާބު ދޭން ޖެހޭ 4 ސުވާލެއް އެބައޮތެވެ.

ޕީއައިއޭ އާއެކު ބޭއްވި ބައްދަލުވުމުގައި ޓުއަރިޒަމް އަދި ސިވިލް އެވިއޭޝަން މިނިސްޓްރީ ނުވަތަ އެމްސީއޭއޭ ރަސްމީކޮށް ހިމެނިފައިވޭތޯ؟

ޕާކިސްތާނުގައި ބަޔާންކުރެވުނު އިންވެސްޓްމެންޓް ޕޮޒިޝަން މުހައްމަދު ސައީދުގެ މިނިސްޓްރީ ނުވަތަ އިންވެސްޓް މޯލްޑިވްސް އިން ތައްޔާރުކޮށްފައިވޭތޯ؟

މަޖިލީހުގެ ރައީސް އަބްދުއްރަހީމް މި ކަންކަން ކުރެއްވީ ރައީސްގެ ނުވަތަ ކެބިނެޓުގެ މެންޑޭޓެއްގެ ދަށުންތޯ؟

އެއްވެސް ރަސްމީ ކޮމިޓްމެންޓެއް، ވައުދެއް ނުވަތަ ފޮލޯއަޕް އެކްޝަނެއް މި ބައްދަލުވުންތަކުން ނިންމުނުތޯ؟

ސުވާލަކީ މަޖިލިސް ރައީސަށް ރާއްޖޭން ބޭރުގައި ރާއްޖެ ޕްރޮމޯޓް ކުރެވޭނެތޯއެއް ނޫނެވެ. އެއާ ޚިލާފަށް ރާއްޖޭގެ އޭވިއޭޝަން، އިންވެސްޓްމެންޓް އަދި އިގުތިސާދީ ސިޔާސަތު ހިންގަނީ، އެ ޒިންމާތައް ޤާނޫނުއަސާސީން އަދި ސަރުކާރުން ހަވާލުކޮށްފައިވާ މީހުން އަދި އިދާރާތަކުންތޯ ކުރެވޭ ސުވާލެވެ.