އަޅުގަނޑު މަގުފުރައްދަން ނޫޅޭ!: "ޑޯންޓް ޓްރައި ޓު ޓްރެކް މީ އިންޓު ދަ ރޯންގް ޑައިރެކްޝަން"
11 ސެޕްޓެމްބަރު 2026 | ހުކުރު 13:43ރައީސް މުއިއްޒުގެ ވައުދުފުޅުތަކާ ގުޅޭގޮތުން ސުވާލުކުރުމުން ވަޒީރުން ޖަވާބުދާރީނުވެ، ނޫސްވެރިންނަށް ދަނީ ބިރުދައްކަމުން. ސަރުކާރުގެ ތެރޭގައި އޮތް ބިރުވެރިކަމާއި ޚުދުމުޚުތާރު ސިޔާސަތުތަކުގެ ސަބަބުން ވަޒީރުންނަށް މިނިވަންކަމާއެކު މަސައްކަތްކުރަން ހުރަސްއެޅިފައިވާކަން ފާހަގަކޮށް، ރާއްޖޭގެ ޑިމޮކްރެޓިކް ނިޒާމު ނުރައްކަލަށް ހުށަހެޅިފައިވާކަމަށް ގިނަ ބަޔަކު ދަނީ ބުނަމުން
ރައީސް ޑރ. މުހައްމަދު މުއިއްޒު އަދި ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން | ޓްރާންސްޕޯޓް މިނިސްޓްރީ
ރައީސް ޑރ. މުހައްމަދު މުއިއްޒުގެ ސަރުކާރުގެ ތެރެއިން ފެންނަމުންދާ ކަންކަމަކީ، ދިވެހިރާއްޖޭގެ ޑިމޮކްރެޓިކް ވެއްޓާއި ގާނޫނީ ހަމަތަކާ މުޅިން އިދިކޮޅު، ގައުމު ހަރުކަށި، ޚުދުމުޚުތާރު މިސްރާބަކަށް ވައްޓާލަމުންދާ މަންޒަރެވެ. ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި އަމަލުކުރެއްވި ގޮތާއި ދެއްކެވި ވާހަކަތަކަކީ މިކަމުގެ އެންމެ ފުރިހަމަ މިސާލެވެ.
ރައްޔިތުންނަށް ހިއްސާ ލިބޭގޮތަށް 10 ރިސޯޓު ތަރައްގީކޮށް، ރައްޔިތުންގެ ޖީބަށް ޑޮލަރުން ފައިދާ ވެއްދުމުގެ ނަމުގައި ރައީސް މުއިއްޒު ވެވަޑައިގެންފައިވާ ބޮޑު ވައުދަފުޅަށް ބަލާއިރު، އަދި ވެސް ރައްޔިތުންނަށް ވާނުވާ އެއް އެނގޭ ވަރެއް ނުވެ އެވެ. މި ހިނގާ ސެޕްޓެމްބަރު މަސް ނިމި، އޮކްޓޯބަރަށް އަޅައި، ނޮވެމްބަރު މަހު މަޝްރޫއުގެ މަސައްކަތް ފަށާނެ ކަމަށް ރައީސް މުއިއްޒު ވިދާޅުވެފައިވާއިރު، އެ ރިސޯޓުތައް ހަދަނީ ކޮން ތަނެއްގައިކަން މިނިސްޓަރު އަމީން އަށް ވެސް ވިދާޅެއް ނުވެވުނެވެ. ނުވަތަ ގަންނާ ކުރައްވާ ބިރެއްގެ ބޮޑުކަމުން އެ ކަން ހާމަނުކުރެއްވީ ކަމުަގައި ވެދާނެ އެވެ.
ނޫސްވެރިންގެ ބައްދަލުވުމުގައި މި މުހިންމު ސުވާލު ދެންނެވުމުން މިނިސްޓަރު އަމީން ރުޅި އިސްކުރައްވާ ވާހަކަދެއްކެވުމަކީ ޒިންމާދާރުކަން ކުޑަ، އަދި ރައްޔިތުންނަށް ޖަވާބުދާރީވެވަޑައިގަންނަވާން ބޭނުންނުވާ ކަމުގެ ފާޅުކަން ބޮޑު ހެއްކެކެވެ. ނޫސްވެރިޔާ ދެންނެވި ސުވާލަށް ސާފު ޖަވާބެއް ދެއްވުމުގެ ބަދަލުގައި، މިނިސްޓަރު އަމީން ވިދާޅުވީ އެއީ އެމަނިކުފާނުގެ މަސްއޫލިއްޔަތެއް ނޫން ކަމަށެވެ. އަދި ވިދާޅުވީ އެމަނިކުފާނަށް އެނގިވަޑައިގަންނަވާނެ ކަމަށާއި، އެމަނިކުފާނު މަގުފުރައްދާ، ނުބައި މަގަކުން ގެންދަން މަސައްކަތް ނުކުރުމަށް އެދިވަޑައިގަންނަވާ ކަމަށެވެ.
"އަޅުގަނޑަށް އެނގޭނެތާ، ޑޯންޓް ޓްރައި ޓު ޓްރެކް މީ އިންޓު ދަ ރޯންގް ޑައިރެކްޝަން"
މިއީ ސަރުކާރުގެ ވަޒީރުންގެ ކިބައިން ފެންނަންޖެހޭ އަޚުލާގީ މިންގަނޑަށް ނުފެތޭ ފަދަ އިހުތިރާމު ކުޑަ ޖަވާބެކެވެ. ކޮންމެއަކަސް ޔަގީން ވާ އެއްކަމެއް އެބައޮތެވެ. ރައީސް މުއިއްޒުގެ ސަރުކާރުގައި ވަޒީރުން ތިއްބެވީ އަމިއްލަ ޚިޔާލެއް ފާޅުކުރަން ނުކެރި، ބޮޑު ބިރުވެރިކަމެއްގެ ތެރޭގައި ކަމެވެ. ރައީސް މުއިއްޒު ގެންގުޅުއްވާ ހަރުކަށި ސިޔާސަތުތަކުގެ ސަބަބުން ކެބިނެޓްގެ މެންބަރުންނާއި ސަރުކާރުގެ އިސްވެރިންނަށް ނަފްސާނީ ގޮތުން ބިރުވެރިކަމާ ކުރިމަތިލާން ޖެހިފައިވާ މިންވަރެވެ. އެނގި ހުރެ ވެސް މައުލޫމާތު ހާމަ ކުރަން ޖެހިލުންވާ މިންވަރެވެ.
މި ފަހުން މިކަމަށް ލިބުނު އެންމެ ބޮޑު އެއް ބާރަކަށް ވެގެން ދިޔައީ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެންބަރުންގެ އަދަދު އިތުރުކުރުމުގެ ކެމްޕޭނާ ގުޅުވައިގެން، ޕީއެންސީގެ ޕާލިމަންޓަރީ ގްރޫޕުގެ ލީޑަރު އިބްރާހީމް ފަލާހަށް ޝުކުރު އަދާކުރެއްވުމުން ކުރީގެ ވަޒީރު ޑރ. އަބްދުﷲ ޚަލީލް އެ ޕާޓީގެ ލީޑަރޝިޕް ގްރޫޕުން ވަގުތުން ބޭރުކުރެއްވި ހާދިސާ އެވެ. މެންބަރުންގެ އަދަދު އިތުރުކުރަން ކުރާ މަސައްކަތްތަކާ ގުޅޭ ގޮތުން ޕީއެންސީގެ ލީޑަރޝިޕް ވައިބަރ ގްރޫޕުގައި އެކި ބޭފުޅުން ރައީސް މުއިއްޒު އަށް ނިސްބަތްކުރައްވައި "ސާބަސް ރައީސް، ޝުކުރިއްޔާ ރައީސް" ޖައްސަވަމުން ގެންދެވި ވަގުތު، ޑރ. ޚަލީލް ލިޔުއްވީ "ޝުކުރިއްޔާ ލީޑަރު ފަލާހް" މިފަދައިންނެވެ. މި މެސެޖާ ގުޅިގެން ރައީސް މުއިއްޒު ކޯފާވެ، ވަގުތުން ޚަލީލް އެ ގްރޫޕުން ބޭރުކޮށްލެއްވި އެވެ.
ރައީސް މުއިއްޒު އަކީ ކޮންމެ ކަމެއްގައި ވެސް އެމަނިކުފާނުގެ އަމުރުފުޅު ނޫންގޮތަކަށް ނުކުރެވޭނެ، އަދި އިދިކޮޅު ނުވަތަ ތަފާތު ޚިޔާލެއް ބަލައިނުގަންނަވާ، އުތުރު ކޮރެއާގެ ޚުދުމުޚުތާރު ލީޑަރުންގެ ސިފަތައް ގައިގައި ހުންނެވި ވެރިއެއްކަން މިފަދަ ކަންކަމުން ދަނީ ތަކުރާރުކޮށް ސާބިތުވަމުންނެވެ. މި ފާޑުކިޔުންތަކަށް އިތުރު ބާރެއް ލިބިގެންދިޔައީ، ވެރިކަންކުރާ ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހު ދެއްކެވި ވާހަކަތަކުންނެވެ. ރައީސް މުއިއްޒުގެ ނަންފުޅު ކިޔުމުން ސަޕޯޓަރުން އަތްޖަހާ ގޮތް ދުނިޔޭގައި އޮތް އެންމެ އަނިޔާވެރި، އިންސާނީ ހައްގުތައް އެއީ ކޮންއެއްޗެއްކަން ނުދަންނަ އުތުރު ކޮރެއާގެ ރައްޔިތުން އެ ގައުމުގެ ލީޑަރަށް އަތްޖަހާ އުސޫލާ އެއްގޮތް ކޮށް، އެއީ "ވަރަށް ރީތި" ކަމެއް ކަމަށް ފަލާހު ޕޯޑިއަމެއްގައި ވިދާޅުވުމަކީ މުޅި ދިވެހި ގައުމާއި ރައްޔިތުން ލަދުގަންނަން ޖެހުނު ކަމެކެވެ.
ދިވެހިރާއްޖެއަކީ މިނިވަން، ޑިމޮކްރެޓިކް ހަމަތަކެއްގެ މަތީގައި ހިންގަމުން އަންނަ ގައުމަކަށް ވާއިރު، ވެރިކަންކުރާ ޕާޓީގެ އިސްވެރިޔަކު މިފަދަ އަނިޔާވެރި، ޚުދުމުޚުތާރު ނިޒާމުތަކަށް ތައުރީފުކުރައްވާ ވާހަކަދެއްކެވުމަކީ ސަރުކާރުގެ ވިސްނުން ހުރިގޮތް ހާމަކޮށްދޭ ކަމެކެވެ. އުތުރު ކޮރެއާގައި ރައްޔިތުން އެފަދައިން އަތްޖަހަނީ ލޯބިން ކަމަށް ބުންޏަސް، ހަގީގަތަކީ އެއީ އެގައުމުގެ ވެރިމީހާ ދެކެ ގަންނަ ބިރާއި، ނުރުހުން ފާޅުކޮށްފިނަމަ މަރާލަފާނެ ކަމުގެ ބިރު އޮތްވަރުން މަޖުބޫރުވެގެން ކުރާކަމެއް ކަމެވެ. އެފަދަ ނުރައްކާތެރި، އަނިޔާވެރި ނިޒާމުތަކުގެ އަމަލުތައް ދިވެހިރާއްޖެއަށް ވެއްދުމަށް މަސައްކަތްކުރުމަކީ ރައީސް މުއިއްޒުގެ ވެރިކަމުގެ ދަށުގައި ދިވެހިންގެ މިނިވަންކަމާއި ހައްގުތައް ގެއްލި، ނުރައްކަލަކަށް ހުށަހެޅިފައިވާ މިންވަރު އަންގައިދޭ ވަރަށް ބޮޑު ސިގްނަލެކެވެ.
ހަމައެކަނި މިނިސްޓަރު އަމީން އެއް ނޫނެވެ. އެހެން ވަޒީރުން ވެސް މިއަދު މި ރައީސް ދެކެ ގަންނަވަނީ އަމަށަކު ބިރެއް ނޫނެވެ. އެންމެ އާދައިގެ ރައްޔިތު މީހާ ފަދައިން، ގައުމުގެ ވަޒީރުން ވެސް އެތިބެނީ، ނޭވާލެވޭ ގޮތަކުން މަގާމުން ދުރުވާން ޖެހޭނެ ކަމުގެ ބިރަށް ސިހިސިހި އެވެ. ރައީސް މުއިއްޒު މި ގައުމު ހިންގަވަމުންގެންދަނީ ހަރުކަށި، ޑިކްޓޭޓަރ ސްޓައިލަކަށް ކަމަށް ބެލެވޭއިރު ވައުދުތައް ނުފުއްދި، ސުވާލުކުރުމުން ނޫސްވެރިންނަށް ބިރުދައްކައި، އަދި އުތުރު ކޮރެއާ ފަދަ ނިޒާމުތައް މިސާލަކަށް ނަގަމުންދާ މިފަދަ ސަރުކާރަކަށް ދިވެހި ރައްޔިތުން އިތުރަށް ކެތްކޮށްގެން ތިބެވެން ނެތްކަމާއި، މިކަމާ ދެކޮޅަށް ތެދުވާންޖެހިފައިވާކަން މިއަދު މިވަނީ ވަރަށް ބޮޑަށް ހާމަވެފަ އެވެ.
