ޑޯންޓް ޓްރައި ޓު ޓްރެކް މީ އިންޓު ދަ ރޯންގް ޑައިރެކްޝަން، އަޅުގަނޑަކީ ޓޫރިޒަމް މިނިސްޓަރު، އަޅުގަނޑަށް އެނގޭނެ: މިނިސްޓަރު އަމީން
10 ސެޕްޓެމްބަރު 2026 | ބުރާސްފަތި 13:03ކޮންމެ ރައްޔިތަކީ ރިސޯޓް ހިއްސާދާރަކަށް ހެދުމަށް ރައީސް އިއުލާންކުރެއްވި މަޝްރޫއުގެ ދަށުން ތަރައްޤީކުރާ 10 ރިސޯޓު ތަރައްގީ ކުރުމުގެ މަސައްކަތް ބާރު ސްޕީޑުގައި ކުރިއަށްދާ ކަމަށް މިނިސްޓަރު މުހައްމަދު އަމީން ވިދާޅުވެއްޖެ. ނަމަވެސް މި މަޝްރޫއުގެ ތަފްސީލުތައް ދެއްވަން މިނިސްޓަރު އަމީން ވަނީ ދެކޮޅު ހައްދަވާފައި
ޓޫރިޒަމް މިނިސްޓަރު މުހައްމަދު އަމީން | ސޯޝަލް މީޑިއާ
އެމަނިކުފާނު ނުބައި މިސްރާބަކަށް ގެންދިއުމަށް މަސައްކަތް ނުކުރުމަށާއި، އެމަނިކުފާނަކީ ޓޫރިޒަމް މިނިސްޓަރު ކަމަށް ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެ އެވެ.
މިނިސްޓަރު އަމީން މިފަދައިން ވިދާޅުވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީ އިން ދެންނެވި ސުވާލަށް ޖަވާބު ދެއްވަމުންނެވެ. އެގޮތުން، ދިވެހި ކޮންމެ ރައްޔިތަކީ ރިސޯޓު ހިއްސާދާރަކަށް ހެދުމަށް 10 ރިސޯޓެއް ތަރައްގީކޮށް ރައްޔިތުންގެ ޖީބަށް ޑޮލަރުން ފައިދާ ލިބޭނެ ނިޒާމެއް ގާއިމުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވުމާ ގުޅިގެން ރާއްޖެޓީވީން ވަނީ އެ ރިސޯޓުތައް ތަރައްގީ ކުރަނީ ކޮން ސަރަހައްދުތަކެއްގައިތޯ އަދި އެ މަޝްރޫއަށް ފައިނޭންސް ހަމަޖެހުނީތޯ ސުވާލުކޮށްފަ އެވެ.
މި ސުވާލަށް ޖަވާބު ދެއްވަމުން މިނިސްޓަރު އަމީން ވިދާޅުވީ ރިޔާސީ ބަޔާނުގައި ރައީސް މުއިއްޒު މި މަޝްރޫއު އިއުލާނުކުރެއްވުމާ ގުޅިގެން ބާރު ސްޕީޑުގައި މަސައްކަތް ކުރިއަށްދާ ކަމަށާއި، ތަންތަން އައިޑެންޓިފައި ކުރެވި މިހާރު އޮތީ ޕްލޭނިންގ ސްޓޭޖްގައި ކަމަށެވެ. އަދި މިވަގުތު ޕްރޮޖެކްޓް ކުރިއަށް ދަނީ ފިނޭންސް މިނިސްޓްރީ އަދި ޓޫރިޒަމް މިނިސްޓްރީ ގުޅިގެން ކަމަށް މިނިސްޓަރު އަމީން ވިދާޅުވި އެވެ.
ނަމަވެސް މިނިސްޓަރު އަމީން ވަނީ މިކަމުގެ އިތުރު ތަފްސީލު ދެއްވަން ދެކޮޅު ހައްދަވާފަ އެވެ.
އަޅުގަނޑެއް ނޫން ކަންނޭނގެ އެތަންތަން އިއުލާނުކޮށް ޕަބްލިކަށް ހަމަ އިރާދަކުރެއްވިއްޔާ ކުރިއަށް އޮތް ހަމަ ވަރަށް އަވަހަށް މީގެ ޑީޓެއިލްސްތައް ޕަބްލިކަށް ދަންނަވާނަން އެނގޭތޯ. އަޅުގަނޑަށް އެނގޭނެތާ ޑޯންޓް ޓްރައި ޓު ޓްރެކް މީ އިންޓު ދަ ރޯންގް ޑައިރެކްޝަން. އަޅުގަނޑަށް އެނގޭނެ ނޫންތޯ އަޅުގަނޑަކީ ޓޫރިޒަމް މިނިސްޓަރުމުހައްމަދު އަމީން
ރައީސް މުއިއްޒު ވަނީ މި މަޝްރޫއުގެ ދަށުން 10 ރިސޯޓު ގާއިމުކުރުމަށް މާލެ އަތޮޅާއި އެކި އަތޮޅުތަކުން ބިންތަކާއި ފަޅުތަކާއި ރަށްތައް ކަނޑައަޅައި މި ހަފްތާތެރޭގައި ނިމޭނެ ކަމަށް ވިދާޅުވެފަ އެވެ. އަދި ނޮވެމްބަރު މަހު މި މަޝްރޫއުގެ ބައެއް މަސައްކަތްތައް ފެށިގެން ދާނެ ކަމަށާއި، ތިން އަހަރު ތެރޭގައި މި ރިސޯޓުތައް އޮޕަރޭޝަނަށް ގެނެވޭނެ ކަމަށް އުއްމީދު ކުރައްވާ ކަމަށް ރައީސް މުއިއްޒު ވިދާޅުވި އެވެ.
