ހަޑި ހުތުރު ބަސްތައް ބޭނުންކޮށް، އެކި ފަރާތްތަކަށް ފުރައްސާރަ ކޮށްފައިވާ މައްސަލައިގައި މައާފަށް އެދެން މިނިސްޓަރު ޝަރީފް ބޭނުންފުޅެއް ނުވި
ކުރީގެ ރައީސް މުޙައްމަދު ނަޝީދު އަށް ލާދީނީއޭ ގޮވުމުގެ އިތުރުން، ޤާނޫނު އަސާސީ އެކުލަވާލި ޑްރާފްޓިން ކޮމެޓީގެ މުޤައްރިރު އިބްރާހީމް އިސްމާއީލް (އިބްރާ) އަށް ވެސް ޝަރީފް ވަނީ ފުރައްސާރަ ކޮށްފައި.
އަންގާރަ ދުވަހު އޮތް ނޫސްވެރިންގެ ބައްދަލުވުމުގައި އެންވަޔަރަމަންޓް މިނިސްޓަރު ޝަރީފް. | ރައީސް އޮފީސް
ވަޒީރު ކަމަށް ވަޑައިގެންނެވުމުގެ ކުރިން، އެކި ފަރާތްތަކަށް ފުރައްސާރަކޮށް އަދި ހަޑި ހުުތުރު ބަސްތައް ސޯޝަލް މީޑިއާގައި ބޭނުން ކޮށްފައިވާ މައްސަލައިގައި، މައާފަށް އެދުމަށް އެންވަޔަރަމަންޓް މިނިސްޓަރު އަލީ ޝަރީފް ދެކޮޅު ހައްދަވައިފި އެވެ.
ރައީސް ޑޮކްޓަރު މުޙައްމަދު މުޢިއްޒުގެ ކެބިނެޓަށް މި މަހުގެ ތެރޭގައި ގެންނެވި ބަދަލުގެ ތެރޭގައި، އެންވަޔަރަމަަންޓް މިނިސްޓަރަކަށް އައްޔަން ކުރެއްވީ ޝަރީފް އެވެ. މިނިސްޓަރު ކަމަށް ވަޑައިގެންނެވުމުގެ ކުރިން ވެސް ޝަރީފް ވަނީ ތިމާވެށީގެ ކަންކަމުގައި މަސައްކަތް ކުރައްވައިފަ އެވެ.
މިނިސްޓަރު ކަމަށް ވަޑައިގެންނެވުމުގެ ކުރިން އެކްސްގައި ޝަރީފް ކުރައްވާފައިވާ ބައެއް ކޮމެންޓުތަކާ ގުޅިގެން އޭނާ އަށް ވަނީ ފާޑު ކިޔުން އަމާޒުވެފަ އެވެ. އެގޮތުން ކުރީގެ ރައީސް މުޙައްމަދު ނަޝީދު އަށް ލާދީނީއޭ ގޮވުމުގެ އިތުރުން، ޤާނޫނު އަސާސީ އެކުލަވާލި ޑްރާފްޓިން ކޮމެޓީގެ މުޤައްރިރު އިބްރާހީމް އިސްމާއީލް (އިބްރާ) އަށް ވެސް ޝަރީފް ވަނީ ފުރައްސާރަ ކޮށްފަ އެވެ.
މީގެ އިތުރުން ދުނިޔޭގެ އެކި އެކި ލީޑަރުންނަށް ނިސްބަތްކޮށް ވެސް ޝަރީފް ވަނީ ފުރައްސާރަ ކޮށްފަ އެވެ. އެގޮތުން ފްރާންސްގެ ރައީސް އިމަނުއެލް މެކްރޮން އަށް ފުރައްސާރަ ކޮށްފައިވާއިރު، އިންޑިއާގެ ބޮޑު ވަޒީރު މޯދީ އަކީ ޓެރަރިސްޓެއް ކަމަށް ވިދާޅުވެފައިވެ އެވެ. މި ޕޯސްޓުތަކާ ގުޅިގެން ފާޑު ކިޔުން އަމާޒުވާން ފެށުމާ އެކު، ޝަރީފް ވަނީ ފަހުން އެ ޕޯސްޓުތައް ޑިލީޓު ކުރައްވައިފަ އެވެ.
އަންގާރަ ދުވަހު އޮތް ނޫސްވެރިންގެ ބައްދަލުވުމުގައި އެ ސުވާލު ކުރުމުން ޝަރީފް ވަނީ، މައުޟޫއާ ނުގުޅޭ ސުވާލެއް ކަމަށް ވިދާޅުވެ ޖަވާބު ދެއްވަން ދެކޮޅު ހައްދަވައިފަ އެވެ. ޝަރީފް ވިދާޅުވީ ހޯމަ ދުވަހު އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު އެކަމަށް ޖަވާބު ދެއްވާފައިވާ ކަމަށެވެ. ނަމަވެސް، ހޯމަ ދުވަހު ރައީސް މުޢިއްޒުއާ އެ ސުވާލު ކުރުމުން ރައީސް ވިދާޅުވީ ޝަރީފް އަކީ އެ މަޤާމަށް އެންމެ ޤާބިލު ބޭފުޅާ ކަމަށެވެ.
ތަކުރާރުކޮށް އެ ސުވާލު ކުރުމުން ވެސް މިނިސްޓަރު ޝަރީފް ވަނީ އެކަމަށް ޖަވާބެއް ދެއްވުމަށް، އަދި މައާފަށް އެދިވަޑައިގެންނެވުމަށް ދެކޮޅު ހައްދަވައިފަ އެވެ. ނަމަވެސް އިތުރު ސުވާލު ކުރުމުގެ ފުރުސަތުގައި އެއީ ރައްޔިތުންގެ ކަންބޮޑުވުން އިންތިހާ އަށް އޮތް ކަމެއް ކަމަށާއި، މިނިސްޓަރަކީ ރައްޔިތުންގެ ޓެކްސް ފައިސާ އިން މުސާރަ ނަންގަވާ ބޭފުޅެއް ކަމަށް ދެންނެވުމުން މިނިސްޓަރު ވަނީ ދުރު ޖަވާބެއް ދެއްވައިފަ އެވެ.
އެގޮތުން މިނިސްޓަރު ވިދާޅުވީ އިންޑިއާގެ ބޮޑު ވަޒީރު މޯދީ އަކީ "މޮންސްޓާ" އެއް ކަމަށް ޤަބޫލު ނުކުރައްވާ ކަމަށެވެ. މިނިސްޓަރު އެހެން ވިދާޅުވިއިރު، ކުރީގެ ޕޯސްޓުގައި ވިދާޅުވެފައި ވަނީ މޯދީ އަކީ ޓެރަރިސްޓެއް ކަމަށެވެ.
