އާސެނަލްގެ އެއްބަސްވުން އައުކުރަން އާޓެޓާ އެއްބަސްވެއްޖެ

އިނގިރޭސި ޕްރިމިއާ ލީގު ޗެމްޕިއަން އާސެނަލްގެ ކޯޗު މިކޭލް އާޓެޓާ، އެ ކުލަބުގެ އެއްބަސްވުން އައުކުރަން އެއްބަސްވެއްޖެ އެވެ. 

މީޑިއާތަކުގަައި ބުނެފައިވާ ގޮތުން މި މަހުގެ ކުރީ ކޮޅު އާސެނަލް އިން ވަނީ، އާޓެޓާ އާއެކު އައު އެއްބަސްވުމެއްގެ މަޝްވަރާތައް ފަށައިފަ އެވެ. ގިނަ މަޝްވަރާތަކަކަށް ފަހު، މިހާރު އާޓެޓާ ވަނީ އާސެނަލްގެ އެއްބަސްވުން އައުކުރަން އެއްބަސްވެފައިކަމަށް ރިޕޯޓުތައް ބުނެ އެވެ. 

މީގެ އިތުރުން އާސެނަލްގެ އެއްބަސްވުން އާޓެޓާ އައުކުރާނީ ހަތަރު އަހަރުގެ މުއްދަތަކަށް ކަމަށް ބުނެފައިވެ އެވެ. އެހެންކަމުން، 2030 ވަނަ އަހަރުގެ ނިޔަލަށް އޭނާ އާސެނަލްގައި މަޑު ކުރާނެ ކަމަށް ރިޕޯޓުތަކުގައި ބުނެފައިވެ އެވެ. އައު އެއްބަސްވުމާ އެކު، އާސެނަލްގައި އާޓެޓާ އަށް ލިބޭ މުސާރަ ވެސް ބޮޑުވެގެން ދާނެ އެވެ. އާސެނަލްގައި މިހާރު އާޓެޓާ އަށް ލިބެނީ އަހަރަކު 10 މިލިއަން ޕައުންޑާއި، އިތުރު ފަސް މިލިއަން ޕައުންޑުގެ ބޯނަސް އެކެވެ. 

އައު އެއްބަސްވުމާ ބެހޭ ގޮތުން އެންމެ ފަހުން އާޓެޓާ ދެއްކި ވާހަކައަށް ބަލާއިރު، އޭނާ ވަނީ އާސެނަލްގެ ސަޕޯޓަރުން ކަންބޮޑުނުވުމަށް އެދިފަ އެވެ. އަދި ކުރިއަށް އޮތް ތަނުގައި އާސެނަލްގައި ހުންނަން ބޭނުންވާ ކަމަަށް ވެސް އާޓެޓާ ބުނެފައިވެ އެވެ. އާސެނަލްގައި ކުރަމުން އަންނަ މަސައްކަތްތަކާ ގުޅޭ ގޮތުން އާޓެޓާ ބުނީ، މިހާރު އޮތް ޓީމާ އެކު ކުރަމުން އަންނަ މަސައްކަތާ މެދު ހިތްހަމަޖެހޭ ކަަމަށެވެ. 

އާސެނަލްގެ ކޯޗުކަމާ އާޓެޓާ ހަވާލުވީ 2019 ވަނަ އަހަރު އެވެ. އޭނާގެ އިރުޝާދުގެ ދަށުން އާސެނަލް އިން ކުރިއެރުންތަކެއް ހޯދަމުން އައިސް، މިދިޔަ ސީޒަންގައި އާސެނަލް އިން ވަނީ ޕްރިމިއާ ލީގު ކާމިޔާބުކޮށްފަ އެވެ. ޕްރިމިއާ ލީގުގެ އިތުރުން އާޓެޓާ ވަނީ އާސެނަލް އާއެކު އެފްއޭ ކަޕް އާއި އެފްއޭ ކޮމިއުނިޓީ ޝީލްޑު ވެސް ކާމިޔާބުކޮށްފަ އެވެ. މިދިޔަ ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ވެސް އާސެނަލް ކުޅެފައިވެ އެވެ.