ފަހަތުންް އަރައި ޗެލްސީ ބަލިކޮށް، ޗެމްޕިއަން އާސެނަލް ކުރިއަށް

އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅުނު މެޗުން ފަހަތުން އަރައި މޮޅުވެ، އެންމެ ފަހުގެ ޗެމްޕިއަން އާސެނަލް އިން ރެކޯޑު ދަމަހައްޓައިފި އެވެ.

އާސެނަލްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކޮށްފައި ވަނީ 2-1 އިންނެވެ. މެޗުގައި ޗެލްސީ އިން ލަނޑު ޖަހައި ކުރި ހޯދާފައި ވަނިކޮށް، އާސެނަލް އިން ވަނީ ފަހަތުން އަރައި ދެ ލަނޑު ޖަހައިގެން މޮޅުވެފައި އެވެ. 

މެޗު ފަށައިގެން ދެ ވަނަ މިނެޓުގައި ޗެލްސީ އަށް ލީޑު ނަގައިދިނީ މޯގަން ރޮޖާސް އެވެ. އެއީ ޖޮރެލް ހަޓޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ހަތަރު މިނެޓު ފަހުން އާސެނަލްގެ ރިކާޑޯ ކަލަފިއޯރީ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ނަތީޖާ އާސެނަލް އިން ހަމަހަމަ ކުރީ 25 ވަނަ މިނެޓުގައި ކައި ހަވާޓްޒް ޖެހި ލަނޑުންނެވެ. އެ ލަނޑު ޖަހަން ހަވާޓްޒް އަށް ފުރުސަތު ތަނަވަސްކޮށްދިނީ ޑެކްލަން ރައިސް އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި އާސެނަލް އަށް ލީޑު ނަގައިދިނީ މާާޓިން އޮޑެގާޑް އެވެ. އެއީ ކްރިސްޓޯސް ޒޯލިސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާ އެކު އާސެނަލް އިން މި ވަނީ ލީގުގައި މިހާތަނަށް ކުޅެފައިވާ ތިން މެޗުން ވެސް މޮޅުވެ، ނުވަ ޕޮއިންޓު ހޯދައިފަ އެވެ. އެ ޓީމު ދެ ވަނައިގައި އޮތްއިރު، އެއް ވަނައިގައި އޮތް މެންޗެސްޓަރ ސިޓީ އަށް ވެސް ތިން މެޗުން ލިބެނީ ނުވަ ޕޮއިންޓެވެ. ސިޓީ އިން ކުރި ހޯދަނީ ލަނޑުގެ ތަފާތުންނެވެ.