ބޮލުން ގުޅިފައިވާ އެއްމާބަނޑު ދެބެން ކާމިޔާބުކަމާއެކު ވަކިކޮށްފި

ސެއިންޓް ލުއިސްގެ ކުޑަކުދިންގެ ހޮސްޕިޓަލެއްގައި ކުރިއަށްގެންދިޔަ 25 ގަޑިއިރުގެ އޮޕަރޭޝަނަކަށްފަހު، ބޮލުން ގުޅިފައިވާ އެއްމާބަނޑު ދެބެން ކާމިޔާބުކަމާއެކު ވަކިކޮށްފި އެވެ.

އުމުރުން ދެ އަހަރުގެ މި ދެބެން ކާމިޔާބުކަމާއެކު ވަކިކުރުމާ ގުޅިގެން، އެ ކުދިންނަށް ފުރަތަމަ ފަހަރަށް އެކަކު އަނެކަކުގެ މޫނު މިހާރު ވަނީ ފެނިފަ އެވެ. ހިޔާބް އަދި ވުބްތޯ ނަމަކަށް ކިޔާ މި ދެ އަންހެން ކުދިން އުފަންވީ އިތިއޯޕިއާގަ އެވެ. މި ދެބެން އުފަންވީ "ކްރެނިއޯޕޭގަސް" ކިޔާ ވަރަށް މަދު ހާލަތެއްގަ އެވެ. ދެބެންގެ ބޯ ގުޅިފައިވާއިރު، ދެ ބެން ތިބެނީ އިދިކޮޅަށް އެނބުރިގެންނެވެ. ނޭޝަނަލް ލައިބްރަރީ އޮފް މެޑިސިންއިން ހާމަކުރާ ގޮތުގައި، މިއީ އެއްމާބަނޑު ކުދިން ގުޅިފައި ހުންނަ ހާލަތްތަކުގެ ތެރެއިން 6 އިންސައްތައަށްވުރެ ވެސް މަދު ހާލަތެކެވެ. އަދި މިއީ ކޮންމެ 2.5 މިލިއަން އުފަންވުމަކުން އެއް ފަހަރު ދިމާވާ ކަމެކެވެ.

ވޭތުވެދިޔަ ގާތްގަނޑަކަށް ދެ އަހަރު ދުވަހު، މި ދެބެންނަށް އެކަކު އަނެކަކުގެ އަޑު އިވުނު ނަމަވެސް، މޫނެއް ނުފެނެ އެވެ. އެސްއެސްއެމް ހެލްތު ކާޑިނަލް ގްލެނަން ޗިލްޑްރަންސް ހޮސްޕިޓަލުން ނެރުނު ބަޔާނެއްގައި ބުނެފައިވަނީ، އެ ކުދިން ވަކިނުކޮށް ގުޅިފައި ތިބިނަމަ، ސިއްހީ ގޮތުން ދިގުމުއްދަތުގެ ބޮޑެތި ނުރައްކާތަކަކާ ކުރިމަތިލާން ޖެހުނީސް ކަމަށެވެ.

މި ދެބެން އިތިއޯޕިއާއިން އެމެރިކާގެ މިސޫރީއަށް ދިޔައީ 2025 ވަނަ އަހަރު އެވެ. އެ ހޮސްޕިޓަލުގެ ގާތްގަނޑަކަށް 30 ސިއްހީ މާހިރުންގެ ޓީމަކުން ވަނީ، މި ނުރައްކާތެރި އަދި އުނދަގޫ އޮޕަރޭޝަން ކުރުމަށްޓަކައި ގާތްގަނޑަކަށް އެއް އަހަރު ދުވަހު ތައްޔާރުވެފަ އެވެ.

މި ދެބެންގެ މައިންބަފައިންނަށް ވިސާ ނުލިބުމުގެ ސަބަބުން އެމީހުން ތިބީ އިތިއޯޕިއާގަ އެވެ. އެހެންކަމުން، މި ދެބެން ދަތުރުކުރީ ބެލެނިވެރިއަކާ އެކުގަ އެވެ. ހޮސްޕިޓަލުން ބުނި ގޮތުގައި މި މަސައްކަތުގައި ކުޑަކުދިންގެ ބަލިތަކަށް ފަރުވާދޭ ބައިނަލްއަގުވާމީ ވިއުގައަކާއި ހިލޭ ސާބަހަށް މަސައްކަތްކުރާ ޖަމިއްޔާތަކުގެ އެހީތެރިކަން ލިބިފައިވެ އެވެ.

ހޮސްޕިޓަލުގެ އޮފިޝަލުން މި އޮޕަރޭޝަންގެ ކާމިޔާބީ އިއުލާނުކުރީ މިދިޔަ ބުދަ ދުވަހު އެވެ. ފެބްރުއަރީ މަހު ކުރި މި އޮޕަރޭޝަނަށް 25 ގަޑިއިރު ހޭދަވި ކަމަށް ހޮސްޕިޓަލުން ބުނެ އެވެ. މި އޮޕަރޭޝަނުގައި ސަރޖަނުންނަށް ޖެހުނީ ދެބެންގެ ދެމެދުގައި ގުޅިފައިވާ ލޭހިނގާ ނާރުތައް ވަރަށް ފަރުވާތެރިކަމާއެކު ވަކިކުރާށެވެ.

ސާޖިކަލް ޓީމުގެ އިސްވެރިޔާ އަދި އެމެރިކާގައި މިފަދަ އޮޕަރޭޝަނެއް ކުރި ފުރަތަމަ އަންހެން ނިއުރޯސަރޖަން ޑރ. ޖޮއާނާ ކެމްޕް ވިދާޅުވީ، ދެބެންގެ ސިކުނޑި ބޮޑަށް ހުރީ ވަކިން ނަމަވެސް، ބައެއް ކުދި ތަންތަން ގުޅިފައި ހުރުމުން އެކަމަށް ވަރަށް ބޮޑަށް ތައްޔާރުވާން ޖެހުނު ކަމަށެވެ. އޮޕަރޭޝަން ތިއޭޓަރު ތެރޭގައި ދެބެން ވަކިކޮށް، ކުޑަ ތަންކޮޅެއް ދުރުގައި ބޭއްވުމުން އެއީ ވަރަށް ތަފާތު އިހުސާސެއް ކުރެވުނު މަންޒަރެއް ކަމަށް އޭނާ ވިދާޅުވި އެވެ.

"އަހަރެމެން އެންމެންނަށްވެސް އެ ވަގުތު ހައިރާންކަމެއް ލިބި، މަޑުޖެހިލެވުނު،" ޑރ. ކެމްޕް ވިދާޅުވި އެވެ.

ހޮސްޕިޓަލުން ބުނާ ގޮތުގައި މި ދެބެންގެ ފަރުވާގެ އިތުރު މުހިންމު މަރުހަލާއެއް މިހާރު ވަނީ ކަނޑައެޅިފަ އެވެ. އެގޮތުން ވުބްތޯގެ ނޭފަތާއި ބޯކަށިގަނޑު މަރާމާތުކުރުމަށް ކުރި "ކްރެނިއޯޕްލާސްޓީ" ސާޖަރީ ކާމިޔާބުވެފައިވާއިރު، ހިޔާބްގެ މިފަދަ އޮޕަރޭޝަނެއް މި އަހަރުގެ ފަހުކޮޅު ކުރިއަށްދާނެ އެވެ.

ހޮސްޕިޓަލުން ނެރުނު ބަޔާނުގައިވާ ގޮތުން، މި ދެބެންނަށް މިހާރު ފަރުވާ ދެމުންދަނީ މިސޫރީގެ މެރީލޭންޑް ހައިޓްސްގައި ހުންނަ ރެންކަން ޖޯޑަން ޕީޑިއަޓްރިކް ބްރިޖް ހޮސްޕިޓަލުގަ އެވެ.