އެފްރިކާގެ އެންމެ ބޮޑު އެއާޕޯޓު ބިނާކުރުމުގެ ބިޔަ މަޝްރޫޢު އިތިއޯޕިއާ ގައި ރަސްމީކޮށް އިފްތިތާޙުކޮށްފި

އިތިއޯޕިއަން އެއާލައިނުން، އެފްރިކާގެ އެންމެ ބޮޑު އެއާޕޯޓު ބިނާކުރުމުގެ ބިޔަ މަޝްރޫޢު ރަސްމީކޮށް އިފްތިތާޙުކޮށްފިއެވެ.

12.5 ބިލިއަން ޑޮލަރުގެ މި މަޝްރޫޢު ކުރިއަށްދަނީ އިތިއޯޕިއާގެ ބިޝޮފްޓޫ ގަ އެވެ. މި މަޝްރޫޢު އެއްކޮށް ނިންމުމަށް ތާވަލުކޮށްފައިވަނީ 2030 ވަނަ އަހަރަށެވެ.

އިތިއޯޕިއާގެ ސަރުކާރު ހިއްސާވާ އެއާލައިނުން ވަނީ، އެޑިސް އަބާބާގެ އިރުދެކުނުން ގާތްގަނޑަކަށް 45 ކިލޯމީޓަރު ދުރުގައި އޮންނަ މި ސަރަޙައްދުގައި ހަތަރު ރަންވޭ ހިމެނޭހެން މި އެއާޕޯޓު ފަރުމާކުރުމުގެ އެއްބަސްވުމުގައި ސޮއިކޮށްފަ އެވެ.

"ބިޝޮފްޓޫ އިންޓަރނޭޝަނަލް އެއާޕޯޓަކީ އެފްރިކާގެ ތާރީޚުގައި ވެސް ހިންގާ ވައިގެ ދަތުރުފަތުރުގެ އެންމެ ބޮޑު އުމްރާނީ މަޝްރޫޢު،" ކަމަށް އެ ޤައުމުގެ ބޮޑުވަޒީރު އަބީ އަޙްމަދު ޢަލީ ވިދާޅުވި އެވެ. މި އެއާޕޯޓުގައި އެއްފަހަރާ 270 މަތިންދާބޯޓު ޕާކުކުރެވޭނެ ޖާގަ އޮންނާނެ ކަމަށާއި، އަހަރަކު 110 މިލިއަން ފަސިންޖަރުންނަށް ޚިދުމަތް ދިނުމުގެ ޤާބިލުކަން މި އެއާޕޯޓަށް ލިބިގެންވާނެ ކަމަށްވެސް އޭނާ ފާހަގަކުރެއްވި އެވެ.

ބޮޑުވަޒީރު ވިދާޅުވި ގޮތުގައި، މިއީ މިހާރު އިތިއޯޕިއާ ގައި ބޭނުންކުރާ މައި އެއާޕޯޓުގެ ޖާގަ އަށް ވުރެ ހަތަރު ގުނަ ބޮޑު މިންވަރެކެވެ. އަދި މިހާރު ބޭނުންކުރާ އެއާޕޯޓަށް އޮތް ބާރުބޮޑުވެ، ކުރިއަށް އޮތް ދެތިން އަހަރެއްގެ ތެރޭގައި އެ އެއާޕޯޓުގެ އެންމެ މަތީ ކެޕޭސިޓީ އަށް ދާނެ ކަމަށް ވެސް އޭނާ ވިދާޅުވި އެވެ.

އެއާލައިންގެ އިންފްރާސްޓްރަކްޗަރ ޑިވެލޮޕްމަންޓް އެންޑް ޕްލޭނިންގ ޑިރެކްޓަރ އަބްރަހަމް ތެސްފާޔޭ ނޫސްވެރިންނަށް މަޢުލޫމާތު ދެއްވަމުން ވިދާޅުވީ، މި މަޝްރޫޢުގެ 30 އިންސައްތަ ޚަރަދުކުރާނީ އެއާލައިނުން ކަމަށާއި، ބާކީ ބައި ހަމަޖައްސާނީ އެކި މާލީ އިދާރާތަކުން ނަގާ ލޯނުތަކުން ކަމަށެވެ.

ބިން ތައްޔާރު ކުރުމުގެ މަސައްކަތަށް މިހާރުވެސް 610 މިލިއަން ޑޮލަރު ކަނޑައަޅާފައިވާއިރު، އެ މަސައްކަތް އެއް އަހަރު ދުވަހުގެ ތެރޭގައި ނިންމާލެވޭނެ ކަމަށް އޭނާ ވިދާޅުވި އެވެ. އަދި މަޝްރޫޢުގެ މައިގަނޑު މަސައްކަތްތައް ކުރާ ކޮންޓްރެކްޓަރުން 2026 ވަނަ އަހަރުގެ އޮގަސްޓް މަހު އަމަލީ މަސައްކަތް ފެށުމަށް ވަނީ ހަމަޖެހިފަ އެވެ.

މި މަޝްރޫޢަށް ފުރަތަމަ ޚަރަދުވާނެ ކަމަށް އަންދާޒާކޮށްފައިވަނީ 10 ބިލިއަން ޑޮލަރެވެ.

މި މަޝްރޫޢަށް ފައިސާ ފޯރުކޮށްދޭ ފަރާތްތަކުގެ ތެރޭގައި އެފްރިކަން ޑިވެލޮޕްމަންޓް ބޭންކް ހިމެނެ އެވެ. އެ ބޭންކުން 500 މިލިއަން ޑޮލަރުގެ ލޯނެއް ދިނުމުގެ އިތުރުން، އިތުރު 8.7 ބިލިއަން ޑޮލަރު ހޯދުމަށް މަސައްކަތްކޮށްދޭނެ ކަމަށް މިދިޔަ އަހަރު ވަނީ ބުނެފަ އެވެ.

"މެދުއިރުމައްޗާއި، ޔޫރަޕް، ޗައިނާ އަދި އެމެރިކާގެ މާލީ އިދާރާތަކުން މި މަޝްރޫޢަށް ފަންޑުކުރުމަށް ބޮޑު ޝައުޤުވެރިކަމެއް ވަނީ ފާޅުކޮށްފައި،" އަބްރަހަމް ވިދާޅުވި އެވެ.

އިތިއޯޕިއަން އެއާލައިނަކީ އެފްރިކާގެ އެންމެ ބޮޑު އެއާލައިނެވެ. 2024/25 ވަނަ އަހަރުގެ ތެރޭގައި އެ އެއާލައިނުން އައު ހަ މަންޒިލަކަށް ދަތުރުތައް ފަށާފައިވާއިރު، އެ ކުންފުނީގެ އާމްދަނީ ވެސް ދަނީ ހަލުވިކަމާއެކު އިތުރުވަމުންނެވެ.