ބްރެޑް ޕިޓްއަށް ވާން އެއްމާބަނޑު ދެބެއިން ޕްލާސްޓިކް ސާޖަރީ ހަދައިފި

މަޝްހޫރު ތަރިންގެ މޫނާ އެއްގޮތް ކުރުމަށް ޕްލާސްޓިކް ސާޖަރީ ހެދުމަކީ މިހާރު އާންމު ކަމަކަށް ވެއްޖެއެވެ.

މިދިޔަ ހަފްތާގައި އެންމެ މަޝްހޫރު ވާހަކައަކަށް ވެގެންދިޔައީ ހޮލީވުޑްގެ މަޝްހޫރު އެކްޓްރެސް އެންޖެލީނާ ޖޯލީއަށް ވުމަށް އީރާނުގެ އަންހެނަކު ހެދި 50 އޮޕަރޭޝަނުގެ ވާހަކައެވެ.

މިހަފްތާގައި ވެސް މިވަނީ ހޮލީވުޑްގެ ތަރިއަކަށް ވުމަށް ޕްލާސްޓިކް ސާޖަރީއެއް ހަދާފައެވެ. ހޮލީވުޑްގެ ތަރި އަދި އެންޖެލީނާ ޖޯލީގެ ކުރީގެ ފިރިމީހާ ބްރެޑް ޕިޓްއަށް ވުމަށްޓަކައި އެއްމާބަނޑު ދެބެއިން ވަނީ ޕްލާސްޓިކް ސާޖަރީތަކެއް ހަދާފައެވެ.

ބްރެޑް ޕިޓްއަށް ވުމަށްޓަކައި މިފަހަރު ސާޖަރީ ހެދީ އެމެރިކާއަށް ނިސްބަތްވާ އެއްމާބަނޑު ދެ ބެއިން ކަމަށްވާ މެޓް އާއި މައިކްއެވެ. މެޓް އާއި މައިކް ކޮސްމެޓިކް ސާޖަރީ ހަދާފައި ވަނީ 20،000 ޑޮލަރަށެވެ.

މެޓް އާއި މައިކް ވަނީ އެމްޓީވީއަށް ގޮސް އިންޓަވިއު ވެސް ދީފައެވެ. އަދި ސާޖަރީ ހެދީ އަބަދުވެސް މަޝްހޫރު މޫނަކާ އެކު އުޅެން ބޭނުންވާތީ ކަމަށް އެ ދެ ޒުވާނުން ބުނެފައިވެއެވެ.

ސާޖަރީއަށް ފަހު މެޓް އާއި މައިކް ފެންނަ ގޮތް

މައިކް އާއި މެޓް ވަނީ ޕްލާސްޓިކް ސާޖަރީގެ އިތުރުން ނޭފަތާއި ކޮލުގެ އިންޕްލާންޓޭޝަނެއް ހަދާފައެވެ.

އެމްޓީވީއަށް މެޓް ބުނީ ބްރެޑްގެ ސިފައަށް ބަދަލުވުމުން އަންހެން ކުދިންގެ މެދުގައި އޭނާ މަޤުބޫލު ވާނެ ކަމަށާއި އޭނާގެ ފަހަތުން "އަންހެން ކުދިން ދުވާނެ" ކަމަށެވެ. އަދި އަންހެން ކުދިންގެ ސަމާލުކަން ނުލިބިގެން ދެން ހިތާމަކުރަން ނުޖެހޭނެ ކަމަށް އޭނާ ބުންޏެވެ.

މެޓްގެ ބޭބެ މައިކް ބުނީ މިކަހަލަ އުފަލެއް އަދި ދުވަހަކު ވެސް ނުލިބޭ ކަމަށެވެ. ސާޖަރީ ހެދުމުން އޭނާ ކުރީގެ ސިފައާ މެދު ދެރަވެ ހިތާމަ ކުރަ ދެން ނުޖެހޭނެ ކަމަށާއި އޭނާ މިހާރު ހުރީ އުފަލުން ކަމަށް މައިކް ބުންޏެވެ.

މެޓް އާއި މައިކްގެ އުމުރަކީ 21 އަހަރެވެ.