އިތިއޮޕިއާ ކާރިސާއަށް ސަމާލުކަން ނުލިބެނީ ހަމުގެ ކުލައިގެ ސަބަބުން ކަމަށް ވެދާނެ: ޑރ ޓެޑްރޯޒް

ހަނގުރާމައިގެ ސަބަބުން ސުންނާފަތިވެފައިވާ އިތިއޮޕިއާގެ ތިގްރޭ ސަރަހައްދުގައި އުފެދިފައިވާ ކާރިސީ ހާލަތަށް އެކަށީގެންވާ ސަމާލުކަން ލިބެމުން ނުދިއުމުގެ ފަހަތުގައި އޮތީ ނަސްލީ ތަފާތު ކުރުން ކަމުގައި ވެދާނެ ކަމަށް، ދުނިޔޭގެ ސިއްހަތު ޖަމިއްޔާގެ ޑައިރެކްޓަރ ޖެނެރަލް އަދި އިތިއޮޕިއާ ސަރުކާރުގެ އިސް މަޤާމުތަކެއް މީގެ ކުރިން އަދާ ކުރައްވާފައި ވާ ޑރ ޓެޑްރޯޒް އެޑަނޮމް ގެބްރިޔޭސޫސް ވިދާޅުވެއްޖެއެވެ.

ތިގްރޭ ސަރަހައްދުގައި އުފެދިފައި ވާ ކާރިސާއަކީ ދުނިޔޭގައި އުފެދިފައި ވާ އެންމެ ގެއްލުން ބޮޑު އިންސާނީ ކާރިސާ ކަމަށާ، 6 މިލިއަނެއްހާ މީހުން ތިބީ ޒަރޫރީ ޚިދުމަތްތައްވެސް ހޯދޭނެ ގޮތެއް ނެތިފައި ކަމަށް ވިދާޅުވެ ވާހަކަފުޅު ކުރިއަށް ގެންދަވަމުން ޑރ ޓެޑްރޯޒް ވަނީ، ޔޫކްރައިން މަސްރަހަށް ލިބެމުން ދާ ފަދަ ސަމާލުކަމެއް، އިތިއޮޕިއާއަށް ނުލިބެނީ ކީއްވެތޯ ޖަޒުބާތީ ރޫހެއްގައި ސުވާލު އުފައްދަވާފައެވެ.

ވާޗުއަލްކޮށް ކުރިއަށް ގެންދެވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ޑރ ޓެޑްރޯޒް ވިދާޅުވީ، އެކަމުގެ ސަބަބަކީ، ގައި ހަމުގެ ކުލައަށް ވެދާނެ ކަމަށެވެ. މި އަހަރުގެ އޭޕްރިލް މަހު އޮތް ނޫސްވެރިންގެ ބައްދަލުވުމެއްގައިވެސް ޑރ ޓެޑްރޯޒް ވަނީ، ދުނިޔޭގެ ފެންވަރުގައި އުފެދޭ ކުއްލި ނުރައްކާތަކުގެ ހާލަތުގައި ދޮން މީހުންނާއި ކަޅު މީހުންގެ ފުރާނަ ސަލާމަތް ކުރުމަށް، އެއްވަރުގެ ސަމާލުކަމެއް ދެވޭތޯ ސުވާލު ކުރައްވާފައެވެ.

އިތިއޮޕިއާގައި ހިންގަމުންދާ ހަމަނުޖެހުންތަކުގެ ސަބަބުން ތަފާތު އެކި ކަހަލަ އިންސާނީ ކާރިސާތައް ފެންމަތިވަމުން ދާއިރު، ހަށިގަނޑަށް ބޭނުންވާ މުހިންމު މާއްދާތައް ނުލިބުމުގެ މައްސަލަ މެލްނިއުޓްރިޝަންގެ މައްސަލަވެސް ދަނީ ބޮޑުވަމުންނެވެ. ޑަބްލިއުއެޗްއޯއިން ވަނީ، މި މައްސަލައަށް ހައްލު ހޯދުމަށް، އެހީގެ ގޮތުގައި 123.7 މިލިއަން ޑޮލަރު ހޯޑުމަށް ގޮވާލާފައެވެ. 200 މިލިއަނެއްހާ މީހުންގެ އާބާދީއެއް އޮތް އެ ސަރަހައްދުގައި، އެތައް މިލިއަން ބަޔަކު މިހާރުވެސް ތިބީ ބަނޑަށެވެ.

އިތިއޮޕިއާގައި ހަނގުރާމައާއި ހަމަނުޖެހުންތައް ދިގުލާ ގޮސްފައި ވާތާ މިހާރު ވަނީ އަހަރަކަށް ވުރެ ގިނަ ދުވަސް ވެފައެވެ. ހަނގުރާމަވެރިންނާއި ސަރުކާރަށް އެއްބާރުލުން ދޭ އަސްކަރިއްޔާއާއި ދެމެދު ވަރުގަދަ ހަމަލާތައް ބަދަލު ކުރަމުން ދާ އިރު، އެކި ގޮތް ގޮތުން ޝިކާރަ ވަމުން ދަނީ އާންމު ރައްޔިތުންނެވެ. އިތިއޮޕިއާގެ ތިގްރޭ ސަރަހައްދު ބަނޑަށް ޖެހިފައި ވާ ކަމަށް އދއިންވެސް ވަނީ ކަނޑައަޅާފައެވެ.