ގަލްފްގެ ގައުމުތަކާއި ގަތަރާ ދެމެދު ޖެހިފައިވާ މައްސަލާގައި އެގައުމާ ދެކޮޅަށް އަޅާފައިވާ ސަރަޙައްދީ ބަންދާ ގުޅިގެން 2022 ވަނަ އަހަރުގެ ފީފާ ވޯލްޑް ކަޕްގެ ތައްޔާރީތަކަށް ހުރަހެއް ނެތް ކަމަށް ގަތަރުން ބުނެފި އެވެ.

ގަލްފްގެ ގައުމުތައް ކަމަށްވާ ބަހްރެއިން، މިސްރު، ސައުދީ އަރަބިއްޔާ އަދި ޔޫއޭއީ ގުޅިގެން ގަތަރާ ދެކޮޅަށް އަޅާފައިވާ އިގްތިޞާދީ ދަތިކުރުމުގެ ފިޔަވަޅުތަކުގެ ސަބަބުން އެއްގަމު މަގުން ގަތަރަށް ވަދެވެން އޮންނަ ހަމައެކަނި ބޯޑަރު ބަންދުކޮށް، ކަނޑާއި ވައިގެ މަގުން ގަތަރަށް ވަދެވެން އޮންނަ ގިނަ މަގުތަކެއް ވަނީ ބަންދުކޮށްފަ އެވެ.

ގަތަރުގެ ބަންދާއި ގުޅިގެން ވޯލްޑް ކަޕް ބޭއްވުމަށްޓަކައި އިމާރާތް ކުރާ އަށް ސްޓޭޑިއަމްގެ އިމާރާތުގެ މަސައްކަތަށް ބޭނުންވާ ސާމާނު ހޯދުމުގައި ވަނީ އެހެން މަގެއް ހޯދަން ޖެހިފައެވެ.

ވޯލްޑް ކަޕްގެ ތައްޔާރީތަކާއި ގުޅޭ ގޮތުން މަޢުލޫމާތު ދެމުން ގަތަރުގެ ވޯލްޑް ކަޕް ސުޕްރީމް ކޮމިޓީގެ ސެކްރެޓަރީ ޖެނެރަލް ހަސަން އަލް ތަވާދީ އޭއެފްޕީ އަށް ވިދާޅުވީ، ވޯލްޑް ކަޕްގެ މައްސަލާގައި ފާޑުކިޔުމުގެ ހަމަލާތައް އަމާޒުވި ކަމަށާއި، ގަތަރުން އަބަދުވެސް ފާޑުކިޔުންތަކާ ކުރިމަތިލާނެ ކަމަށެވެ.

ތަވާދީ ވިދާޅުވީ ވޯލްޑް ކަޕްގެ ތައްޔާރީތަކަށް ސާމާނު ހޯދުމަށް ހުރި ގޮންޖެހުންތަކުން އަރައިގަންނަމުންދާ ކަމަށާއި، އިމާރާތް ކުރުމުގެ މަސައްކަތްތަކުގެ އަގު ކުޑަކޮށް އުފުލުނު ނަމަވެސް، އެމަސައްކަތް ކުރިއަށްދާ ކަމަށެވެ. އަދި ތާވަލް ކޮށްފައިވާ ގޮތަށް މަސައްކަތްތައް ކުރިއަށްދާ ކަމަށާއި، ސަރަހައްދީ ބަންދާ ގުޅިގެން 2022 ވަނަ އަހަރުގެ ފީފާ ވޯލްޑް ކަޕް ބޭއްވުމާ ގުޅޭ މަސައްކަތްތަކުގައި ގަތަރަށް އެއްވެސް ހުރަހެއް ނެތް ކަމަށް ތަވާދީ ވިދާޅުވި އެވެ.

ގަތަރާއި ގަލްފްގެ އެހެން ގައުމުތަކާ ދެމެދު ޖެހިފައިވާ ޑިޕްލޮމެޓިކް މައްސަލައިގެ ފެށުމަކީ ގަަތަރުން ޓެރަރިޒަމަށް ޚަރަދު ކުރުން ކަމަށް ގަލްފްގެ ގައުމުތަކުން ބުނެ އެވެ. އެހެންނަމަވެސް ޓެރަރިސްޓް ޖަމާއަތްތަކަށް ޚަރަދުކުރާ ކަމަށް ބުނެ ކޮށްފައިވާ ތުހުމަތުތަކަށް ގަތަރުން ދެކޮޅު ހަދައެވެ.

އެއްގަމު މަގުން ގަތަރަށް ވަދެވެން އޮންނަ ހަމައެކަނި މަގަކީ ގަތަރާއި ސައުދީ އަރަބިއްޔާ ގުޅޭ ސަރަހައްދީ ބޯޑަރެވެ. ސައުދީ އަރަބިއްޔާ އިން ވަނީ ގަތަރުގެ ސަރަހައްދީ ބޯޑަރު ބަންދުކޮށް، ސައުދީގެ ކަނޑުގެ ސަރަޙައްދުން ގަތަރަށް ދަތުރުފަތުރުކުރުން މަނާކޮށްފަ އެވެ.

ގަތަރަށް ދަތުރުފަތުރު ކުރެވޭ ގިނަ މަގުތައް ބަންދު ކުރުމާ ގުޅިގެން، ވޯލްޑް ކަޕް ކޮމިޓީއަށް ވަނީ މުބާރާތުގެ ތައްޔާރީތަކަށް ބޭނުންވާ ސާމާނު އެތެރެކުރުމަށް ދެވަނަ ވިސްނުމަކަށް ދާން ޖެހުނެވެ. އެހެންނަމަވެސް ދުނިޔޭގެ ފުޓްބޯޅައިގެ މައި އިދާރާ (ފީފާ) އިން، މުބާރާތް ގަތަރުގައި ބޭއްވުމުގެ ބަދަލުގައި ދެވަނަ ވިސްނުމަކަށް ނުދާނެ ކަމުގެ ޔަގީންކަން އެބައޮތް ކަމަށް ގަތަރުގެ ވޯލްޑް ކަޕް ކޮމިޓީން ބުނެ އެވެ.