އިންޓަނޭޝަނަލް ބްރޭކް މަދުކުރަން ފީފާ އިން މަޝްވަރާކުރަނީ!
7 އޮކްޓޯބަރު 2017 | ހޮނިހިރު 00:16އިންޓަނޭޝަނަލް ބްރޭކް ދޭ އުސޫލަށް ވެންގާ އަދި މޮރީނިއޯ ވަނީ ފާޑުކިޔާފައި
ރާއްޖެ އަދި ފަލަސްތީން ބައްދަލުކުރި މެޗެއްގެ ތެރެއިން
ސީޒަން ތެރޭގައި ދޭ އިންޓަނޭޝަނަލް ބްރޭކްތައް މަދުކޮށް، ބްރޭކްގެ މުއްދަތު އިތުރުކުރަން ފީފާ އިން ތައްޔާރުވެއްޖެއެވެ.
ރިޕޯޓްތައް ބުނާގޮތުން މިހާރު އިންޓަނޭޝަނަލް ބްރޭކް ދޭ އުސޫލް ބަދަލުކުރުމަށް ފީފާއިން ވަރަށް އަވަހަށް މަޝްވަރާތައް ފަށާނެއެވެ.
އެގޮތުން މިހާރު ކޮންމެ ސީޒަނެއްގައިވެސް ދޭ ހަތަރު އިންޓަނޭޝަނަލް ބްރޭކްގެ އަދަދު މަދުކޮށް، ކޮންމެ ބްރޭކަކަށް ދޭ ދެ ހަފްތާގެ މުއްދަތު އިތުރުކުރުމަށް މަޝްވަރާކުރާނެ ކަމަށް ރިޕޯޓްތައް ބުނެއެވެ.
މިހާރު އިންޓަނޭޝަނަލް ބްރޭކްސްތައް ދޭ ކަލަންޑަރު 2024 ވަނަ އަހަރުގެ ނިޔަލަށް ވަނީ ނިންމާފައެވެ. އެހެންނަމަވެސް ކްލަބްތައް، ބްރޮޑްކާސްޓަރުން، ލީގުތައް އަދި ކްލަބްތައް އެއްބަސްވެގެން އަދިވެސް އެ އުސޫލް ބަދަލުކުރުމުގެ ފުރުސަތު އެބައޮތެވެ.
މެންޗެސްޓާ ޔުނައިޓެޑްގެ ކޯޗު ހޯޒޭ މޮރީނިއޯ އަދި އާސެނަލްގެ ކޯޗު އާސެން ވެންގާ ވަނީ އިންޓަނޭޝަނަލް ބްރޭކްދޭ އުސޫލަށް ވަރަށް ބޮޑަށް ފާޑުކިޔާފައެވެ. އެގޮތުން އެ ކޯޗުން ބުނީ ކްލަބްތަކުގެ ފޯމު އެންމެ ރަނގަޅުވާ ދުވަސްކޮޅު އިންޓަނޭޝަނަލް ބްރޭކަށް ފޮނުވާލަން ޖެހުމަކީ ޓީމުގެ ފޯމު ގެއްލެން ދިމާވާ ސަބަބެއްކަމަށެވެ.
އިންޓަނޭޝަނަލް ބްރޭކްގައި ކްލަބްތަކުގެ ކުޅުންތެރިންނަށް އަނިޔާގެ މައްސަލަތައް ދިމާވާ މައްސަލަ ފެންމަތިވާއިރު، ގައުމުތަކުގެ ކޯޗުންގެ އެންމެ ބޮޑު ޝަކުވާ އަކީ އިންޓަނޭޝަނަލް މެޗުތަކަށް ޓީމު ތައްޔާރުކުރަން ލިބޭ މުއްދަތު މަދުވުމެވެ.
