ދުނިޔޭގެ ޗެމްޕިއަން ޖަރުމަނުން ވޯލްޑް ކަޕްގެ ޖާގަ ކަށަވަރުކޮށްފި

އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕްގެ ޖާގައެއް، އެންމެ ފަހުގެ ޗެމްޕިއަން ޖަރުމަނުން ކަށަވަރުކޮށްފި އެވެ.

ފީފާ ވޯލްޑް ކަޕްގެ ޖާގަ ޖަރުމަނު ކަށަވަރު ކުރީ، ޔޫރަޕްގެ ކޮލިފިކޭޝަންގައި ބުރާސްފަތި ދުވަހުގެ ރޭ ނޮދަން އަޔަލެންޑްގެ މައްޗަށް ކުރި ހޯދައިގެންނެވެ.

ގްރޫޕް ސީގައި ބުރާސްފަތި ދުވަހުގެރޭ ނޮދަން އަޔަލެންޑާއި ބައްދަލުކުރި މެޗު ޖަރުމަނު ކާމިޔާބު ކުރީ ތިން ލަނޑު އެއް ލަނޑުންނެވެ.

ނޮދަން އަޔަލެންޑްގައި ކުޅުނު މިމެޗުގެ ދެވަނަ މިނިޓުގައި ޖަރުމަނަށް ކުރި ހޯދައިދިނީ ބަޔާން މިއުނިކްގެ މިޑްފީލްޑަރ ސެބަސްޓިއަން ރުޑީ އެވެ. މެޗުގެ 21 ވަނަ މިނިޓުގައި ޖަރުމަނަށް ލީޑު ފުޅާ ކޮށްދިނީ ހޮފެންހެއިމްގެ ފޯވާޑް ސެންޑްރޯ ވެގްނާ އެވެ. ޖަރުމަނުގެ ފަހު ލަނޑު މެޗު ނިމެން 4 މިނިޓަށް ވެފައިވަނިކޮށް ޖަހައިދިނީ ބަޔާންގެ މިޑްފީލްޑަރ ޖޯޝުއާ ކިމިޗެވެ. މެޗުގެ ފަހު މިނިޓުގައި ނޮދަން އަޔަލެންޑަށް ސުން ކަނޑުވާލައިދިނީ ޗާލްޓަންގެ ފޯވާޑް ޖޯޝް މެގެއްނިސް އެވެ.

މިގްރޫޕްގައި ބުރާސްފަތި ދުވަހުގެރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ރަށުން ބޭރުގައި އަޒަރުބައިޖާންގެ މައްޗަށް ޗެކް ރިޕަބްލިކް ކުރިހޯދީ ދެ ލަނޑު އެއް ލަނޑުންނެވެ. މިމެޗުގައި ޗެކް ރިޕަބްލިކްގެ ލަނޑުތައް ޖަހައިދިނީ ޖަން ކޮޕިކް އާއި އެންޓޮނިން ބަރަކް އެވެ. އަޒަރުބައިޖާންގެ ހަމައެކަނި ލަނޑު ލިބުނު ޕެނަލްޓީ އަކުން ކާމިޔާބު ކޮށްދިނީ އަފްރަން އިސްމައިލޯވް އެވެ.

މިގްރޫޕްގައި ރަށުން ބޭރުގައި ސެން މެރީނޯގެ މައްޗަށް ނޯވޭ ކުރި ހޯދީ އަށް ލަނޑު ސުން ލަނޑުންނެވެ. މިމެޗުގައި ނޯވޭގެ މުޙައްމަދު އަލްޔޫނުސީ ތިން ލަނޑު ޖަހައި ހެޓްރިކް ހެދިއިރު، ޖޯޝުއާ ކިންގ ވަނީ ދެލަނޑު ޖަހާފައެވެ. ނޯވޭގެ އެހެން ލަނޑުތައް ޖަހައިދިނީ މާކަސް ހެންރިކްސަން އާއި އޮލޭ ކްރިސްޓިއަން ސެލްނައެސް އަދި މާޓިން ލިނޭސް އެވެ.

ގްރޫޕް ސްޓޭޖްގައި ބާކީ އެއް މެޗު އޮތްއިރު، މިގްރޫޕުން ފީފާ ވޯލްޑް ކަޕްގެ ޖާގަ ޖަރުމަނު ހޯދީ ކުޅުނު ނުވަ މެޗުވެސް ކާމިޔާބުކޮށް ގްރޫޕްގެ އެއްވަނަ ކަށަވަރު ކޮށްގެންނެވެ. ޖަރުމަނަށް ނުވަ މެޗުން 27 ޕޮއިންޓް ލިބިފައިވާއިރު، ގްރޫޕްގެ ދެވަނާގައިވާ ނޮދަން އަޔަލެންޑަށް ލިބިފައިވަނީ 19 ޕޮއިންޓެވެ. ތިންވަނާގައިވާ ޗެކް ރިޕަބްލިކަށް 12 ޕޮއިންޓް ލިބިފައިވާއިރު، ނޯވޭ އަދި އަޒަރުބައިޖާނަށް ލިބިފައިވަނީ 10 ޕޮއިންޓެވެ. ގްރޫޕްގެ ފުލުގައިވާ ސެން މަރީނޯ އަށް ޕޮއިންޓެއް ލިބިފައެއްނުވެއެވެ.

ބުރާސްފަތި ދުވަހުގެރޭގެ މެޗު ތަކާއެކު، ނޮދަން އަޔަލެންޑަށް ވަނީ މިގްރޫޕްގެ ދެވަނަ މަޤާމް ކަށަވަރުވެ، ފީފާ ވޯލްޑް ކަޕް ކޮލިފައިންގެ ޕްލޭ އޯފްގެ ޖާގަ ލިބިފަ އެވެ.

މިގްރޫޕްގެ ފަހު މެޗުތައް ކުޅޭނީ އަންނަ އާދީއްތަ ދުވަހުގެ ރެއެވެ. އާދީއްތަ ދުވަހުގެރޭ އަމިއްލަ ދަނޑުގައި ޗެކް ރިޕަބްލިކް ނުކުންނާނީ ސެން މެރީނޯ އާ ދެކޮޅަށެވެ. އަދި އަމިއްލަ ދަނޑުގައި ޖަރުމަނު ނުކުންނާނީ އަޒަރުބައިޖާނާއި ދެކޮޅަށެވެ. ނޯވޭ އާއި ނޮދަން އަޔަލެންޑް ބައްދަލުކުރާ މެޗު ކުޅޭނީ ނޯވޭ ގައެވެ.